Read O Debleskro Drom - I Bibla an o Romano Rakepen 2021 Galatarja 1 Bible Online

Galatarja 1 - O Debleskro Drom - I Bibla an o Romano Rakepen 2021 bible

Galatarja 1

¹Me, o Paulo, tchinau kau liil ap i patslende, kai wenn khetne an o them Galatia. O Jesus Kristo das an miro wast, te penap i menshenge leskro lab. Me hom gar i menshendar bitchedo. Kowa, kai bitchras man, hi o Jesus Kristo un o Dewel, maro dad. Kowa kras les i mulendar djido.

²Me un i tsele phrala, kai pash mande hi, mer penah tumenge:

³Latchepen un bacht tumenge! Ko dell tumen o Dewel, kai maro dad hi, un maro rai, o Jesus Kristo.

⁴Job meras, te lell lo mari doosh[1] ap peste. Kowa kras lo, te lell lo men win dran ko tchilatcho tsiro, an hoi mer djiwah. Kowa kamas o Dewel, maro dad jaake.

⁵Koles sharas kanna un hako tsiro! Amen.

⁶Mange atchas o rakepen krik, har me shunom, kai tumer mukan jaake sik o Jesuseskro drom. O Dewel das tumen gole, te patsenn ap o Jesus Kristeste, kai his jaake latcho ap tumende. Un kanna shunenn tumer ap menshende, kai kamenn tumen ap i wawar drom te anell.

⁷Tchatchepah, dell kek wawar drom, te wenn tumer pash o Debleste! Kolla menshe kamenn tumen dinelo te krell. Jon rissrenn o tchatchepen pral o Jesus Kristeste trujel.

⁸Kowa, kai penell, te dell i wawar drom har ko drom, hoi mer tumende sikram, kowa te well praassedo o Deblestar, ninna te wams mer kowa, ninna te wals i bolepaskro dran o bolepen pash tumende un penals kowa.

⁹Jaake har mer jek kopo penam, penau me kanna pale: Te well jek pash tumende un penell tumenge, te dell i wawar drom pash o Debleste har ko drom, hoi mer tumende sikram, kowa te well praassedo o Deblestar!

¹⁰Penenn mange, rakrau me kanna jaake, har kamenn i menshe kowa te shunell? Na-a! Me rakrau jaake, har o Dewel kowa kamella. Me kamau gar, te sharenn man i menshe. Te wals kowa jaake, woms gar o Jesus Kristeskro budepaskro.

¹¹Mire phrala, djinenn, o Jesuseskro drom hoi me tumende sikrom, hi gar i menshengro koowa.

¹²Me shunom kowa gar i menshendar. I mensho sikras les mande witar gar. O Jesus Kristo kokres sikras les mande.

¹³Tumer shunan, har me djiwom an o biboldengro patsepen, un lom kolen palla, kai patsenn ap o Jesus Kristeste, un kamom, te marap len.

¹⁴Me rikrom man ap o biboldengro patsepen feteder har bud wawar bibolde, kai jaake phuro his har me. Miri tseli sorjah kamom kowa te krell, hoi mare phure penan.

¹⁵O Debles his i wawar drom mange. Job kamas mande peskro tchawes te sikrell, te djinap, koon job hi. Har me gomme gar boldo homs, rodas job man win. Un job his mange latcho un das man gole, te djap pash kolende, kai kek bibolde hi, te penap lenge leskro tchawestar. Har o Dewel man pash lende bitchras, putchom gar i menshendar, te penenn le mange, hoi te krap,

¹⁷djom witar gar an o foro Jerusalem pash kolende, kai glan mande o Jesusestar bitchedo wan, te penenn le i menshenge leskre laba. Lendar putchom gar, hoi te krap. Na-a, me djom an o them Arabia un wom pale pale an o foro Damaskus.

¹⁸Pal triin bersha wom me an o foro Jerusalem, te dikap o Kefases.[2] Deesh-te-pantch diwessa atchom pash leste.

¹⁹Kol wawar bitchepangren, kai o Jesus Kristo glan mande pash i menshende bitchras, kolendar dikom me kekes kote har o Jakobo kokres, o Jesuseskro phraal.

²⁰O Dewel djinella, kai kawa lauter tchatcho hi, hoi me tumenge tchinau. Me chochau gar.

²¹Pal kowa wom me an i themma Syria un Cilicia.

²²An o them Judea prindjran man kol patsle gar.

²³Jon shunan, hoi wawar pral mande penan: “Ko mursh, kai men palla las un kamas o patsepen ap o Jesuseste paash te krell, ko mursh penell kanna i menshenge, te djan le ap o Jesuseskro drom.”

²⁴Un jon sharan o Debles pral halauter, hoi job ap mande kras.