Read O Debleskro Drom - I Bibla an o Romano Rakepen 2021 Galatarja 4 Bible Online

Galatarja 4 - O Debleskro Drom - I Bibla an o Romano Rakepen 2021 bible

Galatarja 4

¹Me penau tumenge: O tchawo, kai lell jek diwes lauter peskro dadestar, koles hi tchi penepaske pral peskro brawlepen, jaake rah har job tikno hi. Job hi har i budepaskro, ninna te hi ko tselo brawlepen leskro.

²Job hi an i wasta kolendar, kai denn garda ap leste, bis te well ko tsiro, kai leskro dad penas, te lell job ko brawlepen.

³Jaake djas menge kowa ninna. An ko tsiro, har gomme gar patslo hams, hams har tikne tchawe un hams tel i soor kolendar tardo, kai hi i raja pral kai phub, un hams ap lende pandlo.

⁴Har ko tchatcho tsiro was, bitchras o Dewel peskro tchawes. Kowa was i mensho, un pandlo ap o Moseskre laba.

⁵Job was, te lell lo kolen win, kai hi pandlo ap o Moseskre laba, jaake te was mer o Debleskre tchawe.

⁶Kanna ham leskre tchawe. Doleske das o Dewel peskro tchaweskro Ducho an mare djia. Kowa dell gole: Tata, miro dad!

⁷Kanna hal tu buder gar har i budepaskro, kai les tchi hi. Tu hal kanna o Debleskro tchawo. Un doleske leh tu ninna kowa, hoi o Dewel peskre tchawende della.

⁸An ko tsiro, kai prindjran tumer o Debles gar, hans wawarenge koi, har te wans le o Dewel.

⁹Kanna prindjrenn tumer o Debles. Feteder hi, te penau me: O Dewel prindjrell tumen. Har nai tchiwenn tumer tumen pale tel kol sorja, ap kolende i menshe pandlo hi? Tumer shunenn pale ap laba, hoi tchi moldo hi, un an lende kek soor hi.

¹⁰Tumer denn jak ap diwessa, tchonna, bersha un bare tsirja un rikrenn len dren.

¹¹Me trashau tumenge, kai miri budi pash tumende tchitcheske his.

¹²Mire phrala, me mangau tumen, wenn jaake, har me hom! Me wom ninna jaake har tumer, wom jek, kai hi gar pandlo ap o Moseskre laba. Hans tumer tchilatcho ap mande,

¹³har me o ersto kopo pash tumende homs? Na-a, kowa hans gar. Tumer djinenna, har me tumenge o Debleskro latcho lab penom, koi djas mange gar mishto.

¹⁴Ninna te his miro nasslepen tumenge gar shukar, dikan tumer gar tele ap mande, witar gar bitchran man tumendar krik. Na-a! Tumer lan man pre, har te woms o Debleskro bolepaskro, har te woms o Jesus Kristo kokres.

¹⁵Tumer hans jaake bachtelo ap ko tsiro! Kai atchas tumari bacht? Ap ko tsiro lans tumare jaka win un dans len mande.

¹⁶Kanna, kai penau tumenge o tchatchepen, han tumer tchilatcho ap mande?

¹⁷Kowa hi gar mishto, hoi kol menshe krenna, kai nashenn tumenge palla, te shunenn tumer ap lende. Jon kamenn tumen mandar krik te lell, te nashenn tumer lenge palla.

¹⁸Me penau tumenge: Nashenn kowa palla, hoi latcho hi! Krenn kowa hako tsiro, ninna te hom me gar pash tumende!

¹⁹Mire phrala! Me kamau tumen o djijestar, har te wans mire tchawe. Jaake har i djuwjat duka hi, te lell li i ternepen, jaake hi man pale duka tumenge, bis te well o Jesus Kristo diklo an tumende.

²⁰Me kamoms, te woms kanna nai pash tumende un te rakroms nai jaake, te djal kowa an tumaro dji! Me hom kate tardo un djinau gar, hoi te krap.

²¹Tumer kamenn jaake te djiwell har o Moseskre laba penenna. Djinenn tumer gar, hoi kol laba penenna?

²²Kote hi tchinlo: O Abrahames his dui tchawe. Ko jekeskri dai his i budepaskretsa, i Hagar. Un ko wawareskri dai his i rajetsa, i Sara.

²³I budepaskretsa las o tchawes, har menshe kowa kaman. I rajetsa las o tchawes, har o Dewel kowa penas.

²⁴Kal dui djuwja hi har dui koowa, hoi o Dewel i menshentsa an Israel win kras. Jek koowa kras o Dewel lentsa win ap i berga Sinai. Kote lan i menshe o Moseskre laba. Kol laba hi o rai pral lende, jaake har his i rai pral i Hagar tardo.

²⁵I Hagar hi har i berga Sinai an Arabia. Jaake har kote i menshe ap o Moseskre laba pandlo wan, jaake hi kanna o foro Jerusalem peskre menshentsa ap o Moseskre laba pandlo.

²⁶Hi ninna i foro Jerusalem an o bolepen. Ko Jerusalem hi har i rajetsa, i Sara. Lakre tchawe hi gar pandlo ap o Moseskre laba. Joi hi mari dai.

²⁷Latar hi tchinlo: Ab bachtelo, ninna te nai lal tu kek tchawe! De gole i bachtjatar, ninna te was tutar kek ternepen boldo! Kanna hi tut budeder tchawe har koja, kai his o romeha khetne.[8]

²⁸Mire phrala, tumer han o Debleskre tchawe. Tumer wan boldo, har o Dewel kowa kamas, jaake har o Isaak boldo was, har o Dewel kowa penas.

²⁹An ko phuro tsiro his jaake: Ko tchawo, kai was boldo, har i menshe kowa kaman, kowa las koles palla, kai was boldo dran o Debleskri soor. Kowa hi kau diwes ninna jaake.

³⁰O Debleskro lab penell koi pral: Trade koi budepaskretsa peskro tchaweha tutar krik, te lell job gar peskro dadeskro brawlepen. Ko brawlepen lell ko tchawo, koleskri dai i rajetsa hi.[9]

³¹Mire phrala, mer ham gar i tchawe kolatar, kai hi i budepaskretsa. Mer ham i tchawe kolatar, kai hi i rajetsa!