Read O Debleskro Drom - I Bibla an o Romano Rakepen 2021 Filiparja 2 Bible Online

Filiparja 2 - O Debleskro Drom - I Bibla an o Romano Rakepen 2021 bible

Filiparja 2

¹Me djinau, tumer rakrenn i menshenge o Jesuseskre laba an o dji. Tumare laba wenna dran o kamlepen, un krenn lengre djia soreles. O Debleskro Ducho rikrell tumen khetne, un tumen hi i baro dji i wawarenge.

²Kowa lauter krell man bachtelo. Krenn man gomme bachtleder, te well tumen jek dji un jek djipen, un te kamell hakeno o wawares o djijestar! Rikrenn khetne un tchingrenn tumen gar!

³Kek te krell tchomone, hoi leske kokres mishto hi, witar tchi, te well lo sharedo pash i menshende! Kek te krell, har te wals lo feteder har ko wawar! Na-a, ap hakeneste penau: Dik jaake ap o wawareste, har te wals lo bareder har tu!

⁴Kek te dikell ap peste kokres, te djal leske mishto! Job te dikell ninna ap ko wawareste, te djal koleske ninna mishto!

⁵Djiwenn jaake, har o Jesus Kristo djiwas!

⁶Ninna te his lo o Dewel, mukas lo peskro railepen un peskri soor, hoi les an o bolepen his.

⁷Job das kowa lauter pre, un was i mensho, un djiwas har i menshe. Job was i budepaskro o Debleske,

⁸un shunas ap leste, un mukas, te wan i menshe rai pral leste, un maran les, un dan les ap o trushel.

⁹Doleske kras o Dewel, te well job bareder har hako wawar rai.

¹⁰Un hakeno an o bolepen un ap i phub un tel i phub hunte perell glan leste tele ap i tchanga[1].

¹¹Un lauter hunte penenna: “O Jesus Kristo hi o rai pral lauter!” Un jaake sharenn le o Debles, maro dades an o bolepen.

¹²Mire kamle phrala un phenja, tumer shunan hako tsiro ap kowa, hoi me tumenge penom, har pash tumende homs, ninna kanna, kai gar pash tumende hom. Me penau tumenge: Krenn lauter, te atchenn ap o Debleskro drom, bis te han pash leste! Shunenn ap o Debleste, un trashenn lestar!

¹³Job sikrell tumen, hoi job kamella. Ninna krell lo an tumende, te kamenn tumer kowa, hoi job kamella, un te nai krenn kowa ninna.

¹⁴Lauter kowa, hoi tumer krenna, krenn les i bachtelo djijestar, un tchingrenn gar!

¹⁵Jaake djiwenn tumer, har mishto hi. Un kek hatsell i doosh ap tumende. Tumer han o Debleskre tchawe, un djiwenn mashkral kol menshende, kai hi tchilatcho un nashran pen an bud dinelo koowa. Mashkral kolende han tumer har i momlia an i rati,

¹⁶te rikrenn tumer ap o Debleskro latcho lab, hoi o djipen della. Te krenn tumer kowa lauter, palle hom me bachtelo ap ko diwes, kai o Jesus Kristo pale wella. Jaake his miri budi pash tumende gar tchitcheske.

¹⁷Me anom tumen ap o Debleskro drom. Doleske hom me glan leste tardo har i rashai, kai anell leske tumaro patsepen. Ninna te meroms pash miri budi o Jesus Kristeske, hom me kanna bachtelo tumentsa khetne pral tumaro patsepen.

¹⁸Awenn tumer ninna bachtelo koi pral! Awa, awenn bachtelo mantsa!

¹⁹Kamau te bitchrap o Timotes sik pash tumende, un patsau, te krell maro rai Jesus i drom, te bitchrap les. O Timoteo, te well lo pale pash mande, nai penell lo mange, har tumenge djala, te wap bachtelo pral tumende.

²⁰Man hi kek wawar har job, koles sawo baro dji hi tumenge, un job kamell, te djal tumenge mishto.

²¹Kol wawar krenn lauter, hoi lenge mishto hi. Jon krenn gar, hoi o Jesus Kristo kamella.

²²Tumer prindjrenn o Timotes un djinenn, har mishto leskri budi hi. Har me i menshende o Jesuseskro drom sikrom, his lo mange koi, har hi i tchawo peskro dadeske koi.

²³Koles kamau me pash tumende bitchrell, jaake sik har djinau, hoi kate mantsa djala.

²⁴Me patsau te mukell man o rai Jesus sik pash tumende te well.

²⁵Kanna bitchrau maro phrales, o Epafrodito, pash tumende pale. Koles bitchran tumer pash mande, te anas lo man kowa, hoi man hunte well djipaske. Peskri tseli sorjah kras lo mantsa o Debleskri budi.

²⁶Tumer shunan, kai job nasselo was. Har job shunas, kai tumer djinenn kowa, rowas leskro dji, un job kamas pash tumende te well.

²⁷Job his tchatchepah ap o merepen tchiddo. O Dewel his leske latches, un rikras peskro wast pral leste. Gar kokres leske his lo latches, ninna mange his lo latches, te well mange gar budeder ropaske.

²⁸Doleske bitchrau les sik pash tumende, te dikenn les tumer, te wenn bachtelo, un te well ninna mange buder gar ropaske.

²⁹Lenn les o djijestar pash tumende pre! Job hi maro phraal an o patsepen ap o rajeste, o Jesuseste. Sawe phrala har job hi tumenge bud moldo.

³⁰Har tumer wan nai gar pash mande, his job mange koi, un leskro djipen his leske gar bud moldo. Leskri budi o Jesus Kristeske anas les pash o merepen.