Read O Debleskro Drom - I Bibla an o Romano Rakepen 2021 Kolossarja 1 Bible Online

Kolossarja 1 - O Debleskro Drom - I Bibla an o Romano Rakepen 2021 bible

Kolossarja 1

¹Me, o Paulo, tchinau kau liil khetne maro phraleha, o Timoteo. O Jesus Kristo bitchras man, te penap i menshenge leskro lab. Jaake kamell kowa o Dewel. Mer tchinah kau liil ap o Debleskre tchawende an o foro Kolossa. Tumer han mare phrala un phenja an o patsepen ap o Jesus Kristeste. Latchepen un bacht tumenge! Kowa dell tumen o Dewel, maro dad, an o dji!

³Mer shunam, har tumer patsenn ap o Jesus Kristeste, un har tumer i tsele patslen o djijestar kamenna. Doleske parkrah men tumenge pash o Debleste hako tsiro, kai mangah les tumenge. Job hi o dad maro rajestar, o Jesus Kristestar.

⁵Tumaro patsepen un kamlepen well dran kowa, kai dikenn tumer ap ko diwes, kai djiwenn tumer o Debleha khetne an o bolepen. Kowa shunan tumer ap ko tsiro, har tumenge o latcho lab o Jesus Kristestar penlo was. Un ko lab hi tchatcho.

⁶Kau latcho lab was gar tumenge kokres penlo. Na-a, kau lab well ap i tseli phub penlo. Un bud un budeder menshe wenna patsle. Jaake hi ninna pash tumende: Tumer shunan ko latcho lab, un haiwan tchatchepah, kai hi o Dewel latches ap tumende.

⁷Kau lab penas tumenge maro kamlo phraal, o Epafras. Kowa budrella o Jesus Kristeske har mer. Job krell peskri budi mishto pash tumende.

⁸Job penas menge, har baro tumaro kamlepen hi, hoi das tumen o Debleskro Ducho.

⁹Un har mer kowa shunam, mangam o Debles tumenge, un mukam gar tele, te mangas lestar, te dell lo an tumende o goswepen, hoi dell o Debleskro Ducho, te haiwenn tumer, hoi o Dewel kamella.

¹⁰Palle djiwenn tumer jaake, te well o Dewel sharedo, un krenn lauter, hoi hi latcho un mishto glan leskre jaka. Un dran tumaro djipen well bud latcho koowa. Un tumer prindjrenn o Debles hako tsiro feteder.

¹¹Lestar mangah, te dell lo tumen peskri bari soor, te wenn tumare djia soreles, te djan bachteles dureder ap leskro drom, ninna an ko tsiro, kai hi tumaro djipen pharo.

¹²Parkrenn tumen o tselo djijestar pash o Debleste, kai hi tumaro dad an o bolepen! Job kras tumen moldo, te djiwenn tumer khetne i wawar patslentsa pash leste an o bolepen, kai hi kek tamlepen.

¹³Job las men win dran i wasta kolestar, kai hi o rai pral o tamlepen[1] un o tchilatchepen, te djiwas mer khetne peskro Tchaweha, koles job o djijestar kamella. Kowa hi maro rai,

¹⁴kai plaissras menge peskro rateha, un las mari doosh[2] mendar krik.

¹⁵Kek nai dikell o Debles. Har leskro tchawo ap i phub was, sikras job har o Dewel hi. O Jesus Kristo hi jaake har peskro dad. Un job hi bareder har lauter, hoi kerdo was.

¹⁶Dran leste was lauter kerdo, hoi hi an o bolepen un ap i phub, kowa, hoi dikah, un hoi gar dikah. Mank lende hi bare raja un i sorele pralstune un lauter, kai hi len penepaske mashkral o bolepen un i phub. Lauter wan dran leste, un wan leske kerdo.

¹⁷O Jesus Kristo his glan hako wawareste koi. Un lauter, hoi koi hi, rikrell lo djides.

¹⁸Job hi o pralstuno pral i tsele patslende. Har o Dewel les i mulendar djido kras, das lo les o newo djipen glan hako wawareste, koles o Dewel newes krella. Jaake kras o Dewel, kai hi o Jesus Kristo o pralstuno pral halauter, hoi koi hi.

¹⁹O Debles his an peskro dji, te djiwell lo an peskro tchaweste, te well o tchawo jaake har o dad.

²⁰Un o Jesus Kristo hi ko drom, kai o Dewel un i menshe pale mala wenna. Har job ap o trushel meras, un peskro rat ratas, anas o Dewel lauteren pash peste khetne, hoi hi an o bolepen un ap i phub.

²¹Ninna tumen anas o Dewel pash peste. Glan i rah tsiro djiwan tumer dur lestar, kran tchilatcho koowa, un kaman o Debles gar.

²²Kanna wan tumer o Debleskre mala. Har peskro tchawo tumenge meras, las lo tumari doosh tumendar un kras tumen djudjo un erligo glan leste.

²³Jek koowa hunte krenn tumer: Atchenn ap o Jesuseskro drom! Patsenn soreles ap leste! Mukenn gar tele, te dikenn ap kowa, hoi tumen hi pash o Debleste! Rikrenn soreles ap leskro latcho lab, hoi tumenge penlo was! Ko lab was penlo ap i tseli phub. Ninna me, o Paulo, hunte penap ko lab i menshenge. Kowa hi miri budi.

²⁴Un kanna hom bachtelo an kol duka, hoi anom tumenge ap mande. Jaake har o Jesus Kristo anas duka ap peste i patslenge, jaake hunte anap me ninna duka ap mande i patslenge.

²⁵Lengro budepaskro wom me. O Dewel das man koi budi, te penap tumenge o tselo Debleskro lab.

²⁶I rah tsiro djinan i menshe ap i tseli phub gar, hoi o Dewel kamas te krell. Kanna djinenn les o Debleskre menshe.

²⁷Kolen sikras o Dewel, har baro un shukar ko drom hi, hoi anell ninna kol menshen pash leste, kai kek bibolde hi. Un ko drom hi o Jesus Kristo, kai djiwell an tumende. Doleske djinenn nai, te djiwenn tumer leha khetne an o bolepen.

²⁸Un kau Jesuseskro drom sikrah mer i menshende, un penah hakeneske an o dji, te djal lo ap kau drom. Mer penah lenge o Debleskro lab jaake, te haiwenn le les mishto. O Dewel kamella, te well hakeno baro un sorelo an o patsepen ap o Jesus Kristeste.

²⁹Dran kowa budrau i tseli sorjah, hoi o Jesus Kristo an mande das.