Read O Debleskro Drom - I Bibla an o Romano Rakepen 2021 Kolossarja 3 Bible Online

Kolossarja 3 - O Debleskro Drom - I Bibla an o Romano Rakepen 2021 bible

Kolossarja 3

¹O Dewel kras tumen o Jesus Kristeha i mulendar djido. Doleske tchiwenn tumaro dji ap kowa, hoi hi an o bolepen! Kote hi o Jesus Kristo ap i tchatchi rig o Deblestar beshdo![6]

²Dikenn ap kowa, hoi an o bolepen hi! Ma dikenn ap kowa, hoi ap i phub hi!

³Tumer meran. Un tumaro newo djipen hi kanna o Jesus Kristeha pash o Debleste an o bolepen, ninna te dikenn kowa kanna gomme gar.

⁴Ap ko tsiro, kai nai dikell hakeno o Jesus Kristes, dikenn le ninna tumen pash leste an leskro railepen.

⁵Ma krenn buder kowa, hoi kran an tumaro phuro djipen: Ma lubrenn trujel! Ma krenn djungelo un wi-ladjedo koowa! Ma mukenn tchilatcho koowa an tumaro shero trujel te djal! Ma nashenn pal i lowe! Koon pal i lowe nashella, koleske hi peskre lowe har leskro dewel.

⁶Kol menshe, kai shunenn gar ap o Debleste, kolla krenna sawo koowa. Doleske well o Debleskri choli pral lende.

⁷Ap ko phuro tsiro, har tumer gar ap o Jesus Kristeste patsan, kran tumer ninna kowa lauter.

⁸Kanna djiwenn tumer buder gar tumaro phuro djipen. Doleske tchiwenn i choli tumendar krik, ninna o tchilatchepen, o djungelo rakepen pral o wawareste, wi-ladjede laba! Ma chochenn tumen!

¹⁰Djiwenn kanna o newo djipen! Mukenn tumen o Deblestar bud un budeder newes te krell, jaake te prindjrenn o Debles feteder un djinenn, hoi job kamella! Palle wenn tumer jaake har job, kai tumen o newo djipen das.

¹¹Kote, kai o Dewel i menshen newes kras, kote hi jek jaake bud moldo har o wawar: I bibolde un kolla, kai kek bibolde hi; kolla, kai ap o mass tchinlo hi un kolla, kai gar ap o mass tchinlo hi; wi-themarja un diwje; raja un budepangre. O Jesus Kristo djiwell an hakeneste mendar.

¹²Tumer han kanna o Debleskre menshe, kolen job peske win rodas. Job kamell tumen o djijestar. Doleske hunte well tumen i baro dji o wawareske, te well hakeno latcho ap o wawareste, te krell pes kek bareder har o wawar, te rakrell hakeno latches o wawareha, te dell kek o wawares sik pre,

¹³te choirell pes kek sik pral o wawareste. Un bistrenn ko tchilatcho koowa, hoi i wawar ap tumende kran! Jaake har o rai, o Jesus Kristo, tumari doosh bistras, hunte krenn tumer kowa ninna.

¹⁴Bareder har lauter hi o kamlepen, hoi wella o Deblestar. Te kamenn tumer i wawaren o djijestar, palle krenn tumer lauter, hoi o Dewel tumendar kamella, un hoi tumen khetne rikrella.

¹⁵O Jesus Kristo das tumen pash peste gole, te djiwenn lauter leha khetne. Djiwenn kanna jaake, te han tumer jek dji un jek djipen! Un parkrenn tumen pash o Debleste!

¹⁶Ma mukenn tele, te rakrenn un shunenn o lab o Jesus Kristestar! Rakrenn les tumenge an o dji! Awenn gosewo koi pashel, te sikrell jek o wawareste, har te djal lo ap o Debleskro drom! Giwenn Debleskre gilja un sawe gilja, hoi sharenn o Debles, ninna sawe gilja, hoi o Debleskro Ducho an tumende tchiwella! Awa, giwenn o Debleske, un sharenn les an tumare djia!

¹⁷Un lauter, hoi tumer krenna un penenna, kowa krenn un penenn jaake, te well maro rai Jesus sharedo! Un parkrenn tumen pash o Debleste, maro dadeste, lautereske, hoi o Jesus Kristo tumenge kras!

¹⁸Tumer djuwja, ma hadenn tumen pral tumare romende! Jaake kamell kowa tumaro rai Jesus tumendar.

¹⁹Tumer mursha, awenn kamlo ap tumare romjende, un gar chojedo!

²⁰Tumer tchawe, shunenn hako tsiro ap tumaro dadeste un ap tumari date! Kowa kamell o rai Jesus tumendar.

²¹Tumer dada, ma awenn gar jaake chojedo ap tumare tchawen, te darenn le tumendar an o dji!

²²Tumer budepangre, shunenn hako tsiro ap tumare rajende, kolenge tumer hunte budrenna! Ma krenn tumari budi jaake, te sharenn tumen i menshe! Na-a! Budrenn lenge o tchatcho djijestar, un jaake, har kamell o rai Jesus kowa tumendar.

²³Lauter, hoi tumer krenna, krenn kowa o djijestar o Jesuseske, maro rajeske, un gar i menshenge!

²⁴Djinenn, maro rai, o Jesus Kristo, dell tumen peskro brawlepen an o bolepen. Leskre budepangre han tumer.

²⁵Koon o tchilatchepen krella, kowa lell i phagi. Pash o Debleste hi hakeno jaake bud moldo har o wawar.