Read O Debleskro Drom - I Bibla an o Romano Rakepen 2021 Kolossarja 4 Bible Online

Kolossarja 4 - O Debleskro Drom - I Bibla an o Romano Rakepen 2021 bible

Kolossarja 4

¹Tumer kai han raja, ap tumende penau: Awenn tchatches ap tumare budepangre un djan lentsa mishto trujel! Ma bistrenn, kai hi tumen ninna i rai an o bolepen!

²Ma mukenn tele, te mangenn o Debles! Parkrenn tumen hako tsiro pash leste!

³Mangenn o Debles ninna menge, te krell lo menge i drom pre, te penas nai leskro lab i menshenge, te sikras lende, te hi o Jesus Kristo ko drom, kai anell men pash o Debleste. Kowa djinan i menshe i rah tsiro gar. Har me kowa i menshenge penom, wom doleske an o stilepen.

⁴Mangenn o Deblestar, te rakrap kowa jaake, har o Dewel kamella!

⁵Djiwenn tumaro djipen jaake, te dikenn i wawar, kai tumer patsle han! Rodenn i drom, te rakrenn lentsa pral o Debleste!

⁶Rakrenn lentsa kamles, un trashenn gar, te penenn o tchatchepen! Jek te putchell tumendar tchomone pral tumaro patsepen, palle rakrenn leha jaake, har kowa koleske mishto hi.

⁷Me bitchrau miro latcho phrales, o Tichiko, pash tumende, te penell lo tumenge lauter, hoi mantsa djal. Job budrell mantsa o Jesuseske, maro rajeske, un krell peskri budi mishto. Koles bitchrau pash tumende, te djinenn tumer, har menge djala, te wenn tumer soreles an o dji.

⁹Leha khetne bitchrau miro latcho phrales, o Onesimo, kai rikrell soreles ap o patsepen. Kowa hi jek tumendar. Kol dui penenn tumenge lauter, hoi kate djala.

¹⁰O Aristarcho, kai mantsa an o stilepen hi, penell tumenge “Atchenn o Debleha!” Ninna o Marko un ko Josua, kai ninna Justo kharella, penenn tumenge “Atchenn o Debleha!” O Marko hi o kakeskro tchawo o Barnabestar. Te well lo pash tumende, lenn les kamles pre, har penom tumenge glan i tsiro! Kolla triin mursha hi bibolde, kai ap o Jesus Kristeste patsenna. I tsele biboldendar, kai kate hi, krenna kol triin kokres mantsa khetne o Debleskri budi. Jon dan man soor an miro dji.

¹²Ninna o Epafras penell tumenge: “Atchenn o Debleha!” Kowa hi jek tumendar, un budrell o Jesus Kristeske. Job mangell o Debles hako tsiro tumenge, te wenn tumer soreles an o patsepen, te djinenn lauter, hoi o Dewel tumendar kamella un te krenn kowa ninna.

¹³Me nai penau, har bud job o Deblestar mangas tumenge un kol patslenge an i forja Laodicea un Hierapolis.

¹⁴Ninna o Luka un o Demas penenn tumenge: “Atchenn o Debleha!” O Luka hi ko dramaskro, koles mer lauter o djijestar kamah.

¹⁵Penenn i patslenge an o foro Laodicea mendar: “Atchenn o Debleha!” Penenn kowa ninna i Nimfa, un kol tsele patslenge, kai wenn khetne an lakro kheer!

¹⁶Tumer te draweran[7] kau liil, palle denn les ninna i patslende, kai wenn khetne an o foro Laodicea. Un drawerenn ninna ko liil, hoi tchinom kolenge!

¹⁷Penenn ap o Archippo: Kre koi budi, hoi o rai Jesus tut das! Muk gar tele!

¹⁸Me, o Paulo, tchinau tumenge miro wasteha kal laba: “Atchenn o Debleha!” Ma bistrenn man, kai hom an o stilepen! O Debleskro latchepen djal tumentsa!