Read O Debleskro Drom - I Bibla an o Romano Rakepen 2021 1. Tessalonikarja 2 Bible Online

1. Tessalonikarja 2 - O Debleskro Drom - I Bibla an o Romano Rakepen 2021 bible

1. Tessalonikarja 2

¹Mire phrala, tumer djinenna, har wam pash tumende, un penam tumenge o Debleskro lab. Kowa his gar tchitcheske.

²Glan ko tsiro, kai wam pash tumende, hams an o foro Filipi. Ninna te wam kote palla lino un dino, har tumer djinenn, djam pal kowa pash tumende an o foro Tessalonika. O Dewel das men i soor, te penas tumenge o Debleskro latcho lab, ninna te his pash tumende bud menshe, kai kran menge o djipen phares.

³Jaake nai dikenn tumer, kowa, hoi tumenge penam, was gar dran i tchilatcho dji, un hi kek chochepen. Witar gar kamam tumen gosewe labentsa te taprell.

⁴Na-a, o Debleske ham moldo, te das lo men koi budi, te sikras mer i menshende o Jesuseskro drom. Doleske rakrah mer lestar. Kowa krah gar, te dikenn i menshe latches ap mende, na-a, mer kamah, te dikell o Dewel latches ap mende. Job djinella, hoi an maro dji hi.

⁵Tumer djinenna, mer rakram tumenge gar pal o mui. Witar gar penam o Debleskro lab, te las lowe i menshendar. O Dewel djinella, me penau o tchatchepen.

⁶Mer rodam gar o sharepen i menshendar, gar tumendar, witar gar i wawarendar.

⁷Mer ham o Jesus Kristeskre bitchepangre un nai penams tumenge soreles, hoi te krenn. Kowa kram gar. Na-a, mer hams kamlo ap tumende, har i dai ap peskre tchawende.

⁸Tumer hans an mare djia, un doleske sikram tumende gar kokres o Debleskro drom, na-a, mer djiwam ninna tumentsa khetne; jaake baro his maro kamlepen tumenge.

⁹Mire phrala, tumer djinenna, har phari mari budi his, har hams pash tumende, un sikram tumende o Debleskro drom. Ap o diwes un an i rat budram, te djiwas gar dran tumari possita.

¹⁰O Dewel dikas, har djiwam mashkral tumende. Un tumer, kai ap leste patsenna, dikan ninna, te djiwam jaake pash tumende har o Dewel kamella, un djam pal o tchatchepen, te hatsas kek i doosh[1] ap mende.

¹¹Tumer djinenna, mer rakram tumentsa har i dad peskre tchawentsa. Hakenes tumendar rakram an o dji latche un sorele labentsa, te djiwenn tumer jaake, te well o Dewel sharedo. Job das tumen gole, te djiwenn pash leste an o bolepen un lenn leskro railepen.

¹³Doleske mukah gar tele, te parkras men pash o Debleste, te patsan tumer o Debleskro lab, hoi tumenge penam. Un tumer haiwan, ko lab well tchatchepah o Deblestar un gar i menshendar. Un tumaro djipen sikrella, te patsenn tumer ap ko lab.

¹⁴Mire phrala, tumare menshe lan tumen palla. Jaake djas tumenge har kol patsle biboldenge an o them Judea. Lengre menshe, i bibolde, lan len ninna palla.

¹⁵I bibolde maran o Jesus Kristes. Glan leste maran le o Debleskre rakepangren. Men lan le ninna palla. Jon choirenn o Debles. Un ap i tsele menshende hi jon tchilatcho.

¹⁶Jon mukenn men gar, te penas mer o latcho lab i wawarenge, kai kek bibolde hi, te nai wenn kolla ninna ap o Debleskro drom. Jaake was i biboldengri doosh jaake baro, bareder djal gar. Un o Debleskri choli was soreles pral lende.

¹⁷Mire phrala, ninna te dikam men nai i tsiro gar, hams hako tsiro pash tumende maro djijeha. Maro dji nashell pal tumende, un mer kram lauter, te dikas tumen.

¹⁸Me, o Paulo, kamom budeder kope pash tumende te well. Un o beng was hako kopo koi mashkral.

¹⁹Mer ham bachtelo pral tumende. Un mer dikah ap ko diwes, kai well maro rai Jesus pale. Palle nai sharah men tumentsa.

²⁰Tumer han maro railepen un mari bacht.