Read O Debleskro Drom - I Bibla an o Romano Rakepen 2021 1. Tessalonikarja 4 Bible Online

1. Tessalonikarja 4 - O Debleskro Drom - I Bibla an o Romano Rakepen 2021 bible

1. Tessalonikarja 4

¹Mire phrala, mer sikram tumende, har te djiwenn tumaro djipen jaake, te well o Dewel bachtelo pral tumende. Un kowa krenn tumer. Kanna mangah tumen jaake har maro rai, o Jesus, mangals tumendar: Krenn kowa gomme budeder un feteder!

²Tumer djinenna, hoi job tumendar kamella. Mer penam les tumenge.

³O Dewel kamell, te djiwenn tumer i djudjo djipen, te sowell kek rom i djuwjah khetne, kai hi gar peskri romni, un kek djuwel i mursheha, kai hi gar peskro rom.

⁴Hako mursh hunte djiwell peskri romjah jaake khetne, har glan o Debleste mishto hi. Job hunte dikell gar ap late, har te wals li tchi moldo.

⁵I chantch hunte chal les gar pre, har kowa hi pash i menshende, kai prindjrenn o Debles gar.

⁶Kek hunte chochell peskro phrales. Koon kowa krella, koles dell o Dewel i phagi. Jaake penam tumenge, un dam tumen trad.

⁷O Dewel das men gole, te djiwas i djudjo djipen. Job das men gar gole, te kras djungelo koowa.

⁸Koon kamell kol laba gar te shunell, kowa tchiwell o Debles ap i rig, un gar i menshes. Un o Dewel hi kowa, kai das peskro Ducho an tumende.

⁹Me hunte tchinap tumenge gar, te well tumen i baro dji i patslenge. O Dewel penas tumenge kowa an o dji.

¹⁰Un tumer krenn o latchepen ap i patslende an o tselo them Macedonia. Mire phrala, mukenn gar tele, te krenn kowa budeder un feteder!

¹¹Djiwenn tumaro djipen jaake, te nai rakrenn i menshe gar djungeles pral tumende! Krenn tumari budi! Budrenn jaake, te well tumen doha djipaske, jaake har tumenge penam!

¹²Palle hunte lenn tumer tchi kolendar, kai hi gar patslo. Un jon rakrenn nai gar tchilatches pral tumende.

¹³Mire phrala, mer kamah, te djinenn tumer, hoi hi kol patslentsa, kai meran, te well tumenge gar ropaske har kolenge, kai prindjrenn o Debles gar un djinenn gar, hoi pal o merepen wella.

¹⁴Mer patsah, te meras o Jesus un stas i mulendar pale pre. Doleske djinah ninna, ap ko diwes, kai well o Jesus pale, anell o Dewel ninna kolen khetne leha, kai an o patsepen meran.

¹⁵Mer penah tumenge, hoi o rai Jesus menge penas. Mer, kai ham gomme djido ap ko diwes, kai well o Jesus pale, wah gar sikeder pash leste har kolla, kai meran.

¹⁶Ap ko diwes, kai well maro rai Jesus tele dran o bolepen, shunah, har jek gole della. O Debleskro pralstuno bolepaskro dell bari gole, un jek phurdell an o Debleskri bashepaskri[3]. Palle stenn kol mule pre, kai patsan ap o Jesus Kristeste.

¹⁷Palle wah mer, kai ham gomme djido, lentsa khetne pre hadedo un ap i wolke pash o rajeste, o Jesuseste, an o bolepen anlo. Un pash leste atchah hako tsiro.

¹⁸Te dell jek o wawareste soor kal labentsa!