Read O Debleskro Drom - I Bibla an o Romano Rakepen 2021 1. Tessalonikarja 5 Bible Online

1. Tessalonikarja 5 - O Debleskro Drom - I Bibla an o Romano Rakepen 2021 bible

1. Tessalonikarja 5

¹Mire phrala, mer hunte tchinas tumenge tchi pral ko tsiro, kai kowa lauter wella.

²Tumer djinenna, o rai Jesus wella har i tchorepaskro an i rati.

³Te penenn i menshe: “Lauter hi mishto, kek kurepen hi kai, un men hunte well kek daar”, palle well i bibacht pral lende, un jon nai nashenn gar krik. Koi bibacht well pral lende jaake sik, har i duka wenn pral i djuwjate, kai lell i ternepen.

⁴Tumer, kamle phrala, ma djiwenn jaake har an i kali rat har kolla, kai prindjrenn o Debles gar! Palle well ko diwes gar pral tumende har i tchorepaskro an i rat.

⁵Tumer lauter djan ap o tchatcho drom, un djiwenn gar an o tchilatchepen. Kowa hi har te djiwenn ap o diwes, un gar an i rat.

⁶Doleske, te sowas mer gar har i wawar, te rikras mare jaka pre, un te das jak har djiwah!

⁷Koon sowella, sowell an i rat. Un koon kamell pes mato te pijell, krell kowa ninna an i rati.

⁸Mer djiwah ap o diwes. Doleske das jak, har te djiwas! Jaake har i kurepaskro riwell i sasterno gad ap peste, te nai dukrell les kek, jaake riwas mer o patsepen un o kamlepen ap mende har i ripen. I kurepaskro tchiwell ninna i sasterni stadi ap peskro shero, te dukrell les kek ap leskro shero. Jaake nai dukrell men kek, te dikah mer ap o Jesus Kristeste, un djinah soreles, te lell men o Jesus Kristo dran o tchilatchepen un o merepen win.

⁹O Dewel kamell gar, te well leskri choli pral mende. Na-a, job kamell, te dell men maro rai, o Jesus Kristo, o Debleskro djipen.

¹⁰Kowa meras menge, te djiwas leha khetne, mer, kai gomme djido ham, un ninna kolla, kai meran.

¹¹Dran kowa, rakrenn kal laba jek ap o wawareste, te dell jek o wawares soor, jaake har tumer kowa ninna krenna!

¹²Mire phrala, mer mangah tumen: Shunenn ap tumare pralstunende, kai budrenn mashkral tumende! O Dewel tchiwas len an pengri budi, te sikrenn le tumen, hoi job kamella!

¹³Jon krenn o Debleskri budi. Awenn latches un kamles ap lende! Un mukenn kek tchingepen mashkral tumende te well!

¹⁴Mire phrala, kanna penah tumenge, hoi te krenn: Denn kolen trad, kai kamenn gar te budrell! Rakrenn kolentsa mishto, kai hi dareno! Krenn kolen soreles, kai hi gar sorelo an o patsepen! Denn kekes sik pre!

¹⁵Ma awenn tchilatcho ap kolende, kai tchilatcho ap tumende wan! Mukenn gar tele, te wenn latches ap hakeneste mashkral tumende, ninna ap i tsele wawar menshende!

¹⁶Awenn bachtelo hako tsiro!

¹⁷Mangenn o Debles hako tsiro!

¹⁸Parkrenn tumen pash leste pral halauter! Kowa kamell o Dewel lauterendar, kai djan ap o Jesuseskro drom.

¹⁹Mukenn o Debleskro Ducho mashkral tumende te budrell!

²⁰Shunenn ap kol laba, hoi o Dewel i patsleske an o dji tchiwas!

²¹Denn jak, te well ko lab, hoi job penas, tchatchepah o Deblestar! Un rikrenn kowa, hoi mishto hi!

²²Rikrenn tumen pale dran hako tchilatcho koowa!

²³O Dewel kras i drom, te was pash leste. Lestar mangau, te krell lo tumaro tselo djipen djudjo glan leste, te rikrell lo tumen an peskre wasta, jaake te hatsell lo kek doosh ap tumende ap ko diwes, kai well maro rai, o Jesus Kristo, pale.

²⁴O Dewel das tumen pash peste gole, job mukell tumen gar, un krell kowa, hoi job penas.

²⁵Mire phrala, mangenn lestar ninna menge!

²⁶Penenn i tsele patslenge mendar: “Atchenn o Debleha!” Un denn len i tchum!

²⁷Me penau tumenge soreles an o lab maro rajestar, o Jesusestar: Drawerenn[4] kau liil glan i tsele patslende!

²⁸O latchepen maro rajestar, o Jesus Kristestar, djal tumentsa!