Read O Debleskro Drom - I Bibla an o Romano Rakepen 2021 Josua 13 Bible Online

Josua 13 - O Debleskro Drom - I Bibla an o Romano Rakepen 2021 bible

Josua 13

¹Un o Josua was phuro. Les his i lengsto djipen. Kote penas o baro Dewel ap leste. Tu wal phuro, un tut his i lengsto djipen. Un koi hi gomme bud them, hoi gar dren lino hi:

²Kol themma, kai i Filistarja djiwenn, un o tselo them Geshur;

³un ko them, kai i Kanaanitarja djiwenn, mank o pani Shihor, hoi glan o them Egiptia nashell, un o foro Ekron, kai kote tchiddo hi, kai norden hi; un kol pantch forja, pral kolende pantch Filistarja i raja hi: Gaza, Ashdod, Ashkelon, Gat un Ekron; koi pashel ko them, kote kai o kham pralstunes hi, un kai i Awarja djiwenn;

⁴un ko tselo them, kai i Kanaanitarja djiwenn, fun o foro Meara, kai i Sidonarja djiwenn, bis pash o foro Afek un bis ap ko them Amor;

⁵un ko tselo them, kai i Gebalarja djiwenn, un kote, kai o kham pre-djal kol tsele berge, kai kharenn Libanon, fun o foro Baal-Gad, hoi tella pash i berga Hermon tchiddo hi, bis tele ap o drom, hoi an Lebo-Hamat djal;

⁶un o pralstuno them mank i berge Libanon un o foro Misrefot-Majim. Kol tsele Sidonarja, kai kote djiwenn, kolen tradau me win glan kol Israelitarjen. Witse tu kol barra, hoi sikrenn, hawe Israelitarja hawo kotar them lenna, jaake har me tuke penom, te kress kowa.

⁷Kre kowa kanna, te dess kolen dran i enja khera un ko paash kol familjendar dran o kheer Manasse pengro kotar them, hoi lengro well.

⁸Ko wawar paash kol familjendar dran o kheer Manasse, ninna kol familje dran i khera Ruben un Gad, jon lan pengro kotar them ap i wawar rig o panjestar Jordan, kote kai o kham pre djal. O Mose, koles o baro Debleskro tchatcho wast his, das len les kote:

⁹Ko tselo pralstuno them mank i forja Medeba un Dibon; un i tsele forja, pral kolende o Sihon o rai his, fun o foro Aroer, hoi pash ko pani Arnon tchiddo hi, un ko foro mashkral an i tala, bis kote kai o them Ammon hi. O Sihon his o baro rai pral i Amorarja un djiwas an o foro Heshbon;

¹¹o them Gilead; un ko them, kai djiwenn i Geshurarja un i Maachatarja; un i tsele berge, hoi kharenn Hermon; un ko tselo them Bashan bis pash o foro Salka;

¹²Pral kau them his glan kowa o Og dran Bashan o baro rai. Kowa djiwas an kol forja Astarot un Edrei, un his jek kolendar, kai kol bare menshendar pral atchan, kai ‘riese’ kharedo wenna. Pral kolende was o Mose o sorleder an o kurepen un tradas len krik.

¹³Kol menshen dran Geshur un Maacha tradan i Israelitarja gar krik. Doleske djiwenn jon gomme kau diwes mank i Israelitarjen.

¹⁴I menshenge dran o kheer Levi was kek kotar them dino. Jon lenn pengro kotar kol viechendar, hoi i Israelitarja o baro Debleske anenna, kai o Israeleskro Dewel hi. Jaake well kowa, hoi i Levitarjen hunte well djipaske, o baro Deblestar. Jaake penas lo les lenge.

¹⁵Un o Mose das i familjen dran o kheer Ruben lengro kotar them.

¹⁶Kau them djas o forestar Aroer, hoi pash o pani Arnon tchiddo hi, un ko forestar, hoi mashkral an i tala tchiddo hi, pral o tselo pralstuno them bis pash o foro Medeba,

¹⁷un dureder bis pash o foro Heshbon. An kau pralstuno them hi kol forja tchiddo: Dibon, Bamot-Baal, Bet-Baal-Meon

¹⁸Jahaz, Kedemot, Mefaat,

¹⁹Kirjatajim, Sibma, Zeret-Shahar ap koi berga hoi an i tala tchiddo hi;

²⁰Bet-Peor, Ashdot-Pisga, un Bet-Jeshimot,

²¹un kol wawar forja an o pralstuno them, ninna ko tselo them, kai o Sihon o rai his. Job his o baro rai pral i Amorarja, un djiwas an o foro Heshbon. Koles das o Mose an o kurepen. Ninna das o Mose kol rajen dran o them Midian, kai an o Sihoneskro them djiwan un kolen job pral peskro them tchiwas: O Ewi, o Rekem, o Zur, o Hur, un o Reba.

²²Mank kolende, kolen i Israelitarja o chareha maran, his ninna ko durkepaskro, o Bileam, koleskro dad o Beor his.

²³Un o them, hoi i menshenge dran o kheer Ruben his, djas bis pash o pani Jordan. Kau tselo them un leskre gaba un forja lan i familje dran o kheer Ruben, te well lo lengro.

²⁴Un o Mose das i familjen dran o kheer Gad lengro kotar them:

²⁵Ko foro Jaser un i tsele forja an o them Gilead un o paash them Ammon bis pash o foro Aroer, hoi ap koi rig o forestar Rabba tchiddo hi, kai o kham pre djal.

²⁶Lengro them his ko kotar them, hoi gomme pral atchas ko themestar, pral koleste o Sihon o rai his — kowa kai djiwas an o foro Heshbon. Kau them djas fun o foro Heshbon bis pash i forja Ramat-Mizpe un Betonim, un fun o foro Mahanajim bis pash o them Debir[22]. Koi pashel hi koi tala ap koi rig o panjestar Jordan, kai o kham pre djal, bis pash o pani Kinneret. Kote his kol forja tchiddo: Bet-Haram, un Bet-Nimra, un Sukkot un Zafon.

²⁸Kau tselo them un leskre gaba un forja lan i familje dran o kheer Gad, te well lo lengro.

²⁹Un o Mose das o paash kol familjendar dran o kheer Manasse lengro them:

³⁰ko tselo them Bashan bis pash o foro Mahanajim; o them Bashan his o them, kai o Og o baro rai his; un i tsele gaba, kai kharenn ‘Jaireskre gaba’, un hi an o them Bashan tchiddo — kolla his 60 (shob-deesh) gaba.

³¹Un o paash kol familjendar dran o kheer Machir — koleskro dad o Manasse his — kolen das o Mose o paash them Gilead. Kote hi kol forja Astarot un Edrei tchiddo, kai o rai pral Bashan, o Og, djiwas.

³²Un kawa hi kau them, hoi o Mose win das, har his lo an o telstuno them, kai i Moabarja djiwan, ap koi rig o panjestar Jordan, kai o kham pre djal un wergel o foro Jericho.

³³I menshenge dran o kheer Levi was kek kotar them dino. Kowa, hoi len hunte well djipaske, well lengro baro Deblestar, kai o Israeleskro Dewel hi. Jaake penas lo lenge.