Read O Debleskro Drom - I Bibla an o Romano Rakepen 2021 Josua 14 Bible Online

Josua 14 - O Debleskro Drom - I Bibla an o Romano Rakepen 2021 bible

Josua 14

¹Un kalla hi kol kotja them, hoi i Israelende dino wan an o them Kanaan. O rashai Eleasar un o Josua, koleskro dad o Nun his, khetne kol pralstunentsa pral i bare familjende, jon his kolla, kai dan ko them win, te lell haki familja peskro kotar them.

²Jaake har o baro Dewel kowa o Moseske penas, witsran le barra, hoi sikrenn, hawo them hakeno kol enja-te-paash bare khera lella.

³Kol menshen dran kol dui-te-paash wawar khera das o Mose pengro kotar them ap i wawar rig o panjestar Jordan. I Levitarjen das lo kek them.

⁴Hakeno o Josefeskre dui tchawendar was jek bari familja: o kheer Manasse un o kheer Efrajim. Un o kheer Levi las kek kotar them, kokres forja, kai le dren djiwenn, un koi phub, kai lengre vieche chan.

⁵Un jaake har o baro Dewel ap o Mose penas, te krenn le, jaake kran i Israelitarja un dan o them win.

⁶Har i Israelitarja pash Gilgal his, wan i mursha dran o kheer Juda pash o Josua. Un o Kaleb, koleskro dad o Jefunne his, dran o kheer Kenas, penas ap leste: “Tu djineh, hoi o baro Dewel ap o Debleskro mursheste, o Moseste, penas, har hams an o foro Kadesh-Barnea, har trul tute un mande djas.

⁷40 (star-deesh) bersha homs kote phuro, har o Mose, koles o baro Debleskro tchatcho wast his, man dran o foro Kadesh-Barnea bitchras, te dikap man tchorchanes an o them trujel. Un har pale wom, penom leske, har kote tchatchepah win dikas.

⁸Mire phrala, kai mantsa pre djan, kran i menshenge daar. Me rikrom ap o baro Debleste, kai miro Dewel hi, un patsom leske.

⁹Ap ko diwes das o Mose pes sowel, un penas: ‘Ko them, kai tiri heri pre stakras, hi tuke un tire tchawenge hako tsireske doleske, kai tu rikral ap o baro Debleste, kai miro Dewel hi, un patsal leske.’

¹⁰Un kanna dik, o baro Dewel rikras man ap o djipen, jaake har lo kowa penas. Kanna djan 45 (star-deesh-te-pantch) bersha trujel, fun ko tsiro, har o baro Dewel kal laba ap o Mose penas, har i Israelitarja an o mulo them trujel djan. Kanna hom 85 (ochta-deesh-te-pantch) bersha phuro.

¹¹Un me hom kau diwes gomme jaake sorelo, har ap ko diwes, har o Mose man win bitchras. Koi soor, hoi man an ko tsiro his, hi man kanna ninna gomme, jaake te nai kurap man un djap win an o kurepen.

¹²Un kanna de man kol berge, kolendar o baro Dewel an ko diwes rakras! Tu shunal an ko diwes, te djiwenn kol Anakarja koi an bare sorele forja. Te hi o baro Dewel mantsa, palle nai tradap len win, har o baro Dewel kowa penas.”

¹³Kote rakras o Josua o Debleskri bacht pral o Kaleb win, koleskro dad o Jefunne his, un das les o foro Hebron, te well lo leskro.

¹⁴Jaake was o foro Hebron o Kaleb dino, koleskro dad o Jefunne his dran o kheer Kenas. Ninna kau diwes hi kau foro leskre tchawenge doleske, kai rikras o Kaleb ap o baro Debleste, kai o Israeleskro Dewel hi, un patsas leske.

¹⁵O foro Hebron kharas glan kowa Kirjat-Arba[23] pal o barester mursh mank i Anakarja. Un o kurepen his trujel an o them Kanaan, un i menshe nai djiwan an latchepen khetne.