Read O Debleskro Drom - I Bibla an o Romano Rakepen 2021 Josua 16 Bible Online

Josua 16 - O Debleskro Drom - I Bibla an o Romano Rakepen 2021 bible

Josua 16

¹Un o khereske Josef peran i barra jaake, te las lo ko them, hoi djas fun o pani Jordan — fun kotar, kai o foro Jericho tchiddo hi — bis pash o foro Betel. Ko drom, hoi sikras, har dur o them djal[32], djas fun koi rig o forestar Jericho, kai o kham pre djal un kai kol tikne panja hi, dureder an o mulo them, un dureder bis an kol berge, kai o foro Betel tchiddo his.

²Un o forestar Betel djas o drom dureder pash o foro Lus un an o them dren un pale win, kai i Arkarja djiwenn, bis pash o foro Atarot,

³un dureder ap koi rig, kai o kham tele djal, an ko them, kai i Jafletarja djiwenn, bis pash o telstuno foro Bet-Horon, un dureder bis pash o foro Geser, un fun kotar pash o Baro Pani.

⁴Kawa hi o them, hoi lan i tchawe o Josefestar, o Manasse un o Efrajim.

⁵Un kawa hi o them, hoi las o kheer Efrajim: Ap koi rig, kai o kham pre djal, djas o drom, hoi sikras, har dur o them djal, fun o forestar Atarot-Addar bis pash o pralstuno foro Bet-Horon,

⁶un dureder bis pash o Baro Pani. O foro Michmetat his kote tchiddo, kai norden hi. Kotar djas o drom dureder kote, kai o kham pre djal, bis pash o foro Taanat-Shilo un dureder pash o foro Janoach.

⁷Fun o foro Janoach djas o drom tele pash i forja Atarot un Naara un dureder bis pash o foro Jericho, un fun kotar pash o pani Jordan.

⁸Fun o foro Tappuach djas o drom kote, kai o kham tele djal, pash ko tikno pani, hoi kharell Kana, un dureder pash o Baro Pani. Kowa hi o them, hoi lan i familje dran o kheer Efrajim.

⁹Koi pashel lan le bud forja un i gaba koi trujel, hoi an o them Manasse tchiddo his.

¹⁰Un jon tradan i Kanaanitarja gar win, hoi an o foro Geser djiwan. Un i Kanaanitarja djiwenn mashkral i Efrajimarja bis ap kau diwes. Un jon hunte budran lenge.