Read O Debleskro Drom - I Bibla an o Romano Rakepen 2021 Josua 2 Bible Online

Josua 2 - O Debleskro Drom - I Bibla an o Romano Rakepen 2021 bible

Josua 2

¹Un har jon ap i platsa Shittim his, bitchras o Josua, koleskro dad o Nun hi, tchorchanes dui murshen win un penas ap lende: “Djan un dikenn, har sorelo o them hi, ninna o foro Jericho!” Koi djan le un wan an i kheer, kai i lubni djiwas. Koja kharas Rahab. Un jon djan dren, te atchenn le kote pral i rat.

²An kai rat was o baro rajeske pral o foro Jericho penlo: “Shun, an kaja rat wan mursha kol menshendar Israel an o foro, te dikenn le tchorchanes, har sorelo maro them hi.”

³Koi bitchras lo murshen pash i Rahab un mukas lake te penell: “De kol murshen win, kai pash tute an tiro kheer wan. Jon wan te dikenn le, har sorelo maro them hi.”

⁴Koi djuwel anas kol dui murshen pral pre ap o kheer un khatras len tel flachstikre ranja, hoi kote tchiddo his. Un joi penas ap kol bitchepangre o baro rajestar: “Awa, dui mursha wan pash mande. Me djinom gar, dran hawo them jon wenn. Un ap i rat, gomme glan ko tsiro, kai o foreskre bare wudja pandlo wenn, djan kol dui mursha pale win. Me djinau gar, kai le djan. Kanna nashenn lenge sik palla! Palle taprenn len gomme!”

⁷Un kol bitchepangre tradan len palla ap ko drom, hoi pash o pani Jordan un koi wergel djal. Un har jon win glan o foro his, was o baro wudar pal lende pandlo.

⁸Un i Rahab djas pash kol dujende pre, har kolla pen gomme gar tele tchiwan,

⁹un penas ap lende: “Me haiwom, te das o baro Dewel tumen kau them. I bari traash glan tumende peras ap mende. Un hakeno, kai kate djiwell, hi har bango darjatar glan tumende.

¹⁰Mer shunam, har kras o baro Dewel tumenge i drom an o baro pani, hoi kharella ‘Baro Lolo Pani’, har djan dran o them Egiptia win. Shunam ninna, hoi kran tumer kol dui bare rajentsa pral i Amorarja, o Sihon un o Og, hoi ap i wawar rig o panjestar Jordan his. Tumer maran len un kran halauter paash, hoi lenge his.

¹¹Un har kowa shunam, was bari traash ap mende, un an kekeste mendar atchas i soor, te djal lo pre ap tumende. O baro Dewel hi tumaro Dewel, un hi o Dewel pral an o bolepen un kate tele ap i phub.

¹²Kanna denn tumen kate sowel pash o baro Debleste, te wenn latches ap miro dadeskro kheer, jaake har me latches ap tumende homs. Un denn man tchomone, hoi sikrell man,

¹³te mukenn miro dades un miri dat te djiwell, un ninna mire phralen un mire phenjen un lauteren, hoi pash lende hi! Denn man i sikepen, te denn men gar an o merepen!”

¹⁴Kote penan kol mursha ap late: “Mer dah men sowel pash maro djipen: Te phukreh tu men gar, krah mer kek tchilatchepen ap tumende ap ko tsiro, kai dell men o baro Dewel kau them, un wah latches ap tumende.”

¹⁵Kote mukas li len ap jek shello dran i wali tele. Lakro kheer his kerdo an i pre-tchidde barra, hoi djan trul o foro.

¹⁶Un joi penas ap lende: “Djan an i berge, te nai hatsenn tumen kolla gar, kai tumen palla lenn. Un khatrenn tumen kote triin diwessa. Palle hi kolla, hoi tumen palla lan, pale khere. Un tumer djan tumaro drom.”

¹⁷Kote penan kol mursha ap late: “Mer krah jaake, har men kai sowel dam, hoi tu kamal te das mer tut.

¹⁸Te wah an o them, palle pande kau lolo shello an koi wali, kai tu men tele mukal! Un le tiro dades un tiri dat un tire phralen un tiri tseli dadeskri familja pash tute an tiro kheer khetne!

¹⁹Un hakeno, koon lendar pale win djal, koleskro rat well ap leskro shero! Un mari sowel his gar koleske. Hakeno, kai an tiro kheer hi un well maredo, koleskro rat well ap maro shero!

²⁰Un ninna te phukreh tu ap mende, palle hunte rikras gar mari sowel, hoi tu mendar kamal.”

²¹“Awa”, penas li, “jaake har tumer penan, jaake well ninna!” Un joi mukas len te djal. Un har jon penge djan, pandas li ko lolo shello an i wali.

²²Un jon djan penge, un wan an i berge un atchan kote triin diwessa, bis te his kolla, kai len palla lan, pale pale. Un kolla, kai len palla lan, rodan len ap i tsele dromma, un hatsan len gar.

²³Kol dui mursha rissran pale trujel, djan i berge tele un djan wergel o pani un wan pash o Josua, koleskro dad o Nun his, un penan leske halauter, hoi lenge djas.

²⁴Un jon penan ap o Josua: “O baro Dewel das o tselo them an maro wast. Ninna halauter kolla, kai koi djiwenn, hi har bango darjatar glan mende.”