Read O Debleskro Drom - I Bibla an o Romano Rakepen 2021 Josua 22 Bible Online

Josua 22 - O Debleskro Drom - I Bibla an o Romano Rakepen 2021 bible

Josua 22

¹O Josua das i murshen dran i familje Ruben un Gad un dran i paash familja Manasse khetne gole,

²un penas ap lende: “Tumer kran halauter, hoi penas tumenge o Mose, koles o baro Debleskro tchatcho wast his. Un kran halauter, hoi me tumenge penom.

³Tumer mukan tumare phralen gar kokres an kau bud tsiro. Bis ap kau diwes atchan kai. Un rikran tumen ap kowa, hoi tumaro baro Dewel tumenge penas.

⁴Kanna kras tumaro baro Dewel, te nai lan tumare phralen lengro them ninna dren, un jon nai djiwenn kote an o latchepen, jaake har lo kowa lenge penas. Doleske rissrenn kanna trujel, un djan pash tumare plachtene khera an ko them, hoi tumenge dino was, te well lo tumenge — ko them, hoi das tumen o Mose, koles o baro Debleskro tchatcho wast his, ap i wawar rig o panjestar Jordan.

⁵Un denn jak, te rikrenn o Debleskre laba un djan ap leskro drom, hoi sikras tumen o Mose, koles o baro Debleskro tchatcho wast his, har penas lo: Kamenn tumaro baro Debles o tselo djijestar. Djan ap leskre tsele dromma! Djiwenn pal leskre laba un mukenn les gar! Awenn leske koi o tselo djijestar un tumari tseli sorjah!”

⁶Un o Josua rakras o Debleskri bacht pral lende win, un penas: “Atchenn o Debleha.” Un jon djan khere.

⁷O Mose das o paash kol menshendar dran o kheer Manasse o them Bashan, te well lo lengro. Ko wawar paash das o Josua lengro them mank lengre phralende ap koi rig o panjestar Jordan, kai o kham tele djal. Un har mukas o Josua kolen te djal, kai ap i wawar rig o panjestar Jordan khere hi, un o Debleskri bacht pral lende win rakras,

⁸penas lo ap lende: “Tumer wenn khere baro brawlepah: Tumen hi bud vieche, rup un sonakai, lolo saster un wawar saster un ripja, hoi lan kolendar, kai kuran pen tumentsa. Denn tumare phralen, kai khere atchan, o paash kolestar!”

⁹Kote djan i mursha dran i familja Ruben un dran i familja Gad un dran i paash familja Manasse penge pengre phralendar, kol wawar Israelitarjen. An o foro Shilo, hoi an o them Kanaan tchiddo hi, kran le pen ap o drom, te djan le khere an o them Gilead. Kote his ko kotar them, hoi lenge dino was, te well lo lengro, jaake har o baro Dewel ap o Moseste penas.

¹⁰Un har wan le pash i khetne tchidde barra[38] pash o pani Jordan, gomme an o them Kanaan, tchiwan le barra pre un kran i baro altaro.

¹¹Un i tikno tsiro pre shunan i wawar Israelitarja: Kol mursha dran i familja Ruben un dran i familja Gad un dran i paash familja Manasse kran i altaro pash o pani Jordan an o them Kanaan, ap koi rig o themestar Israel.

¹²Un har le kowa shunan, wan le halauter khetne an o foro Shilo, te djan le win, te kurenn le pen lentsa.

¹³Un jon bitchran i bitchepaskres pash lende an o them Gilead. Kowa his o Pinhas, koleskro dad o rashai Eleasar his.

¹⁴Un khetne leha djan deesh pralstune, dran hako baro kheer jek. Hakeno lendar his i pralstuno pral peskri familja.

¹⁵Un har wan le an o them Gilead, penan le ap lende:

¹⁶O baro Debleskre tsele menshe mukenn tumenge te penell: “Hawo tchilatcho koowa kran tumer ap o Israeleskro Debleste! Hoske mukan o baro Debles, un kran tumenge i altaro? Koleha perenn o baro Deblestar tele!

¹⁷Hi men gomme gar doha doosh ap mende, hoi lam ap mende, har hams pash i berga Peor[39]. Koi doosh hi bis kau diwes ap mende tchiddo, un doleske was i bari phagi pral mende, o baro Debleskre menshende.

¹⁸Un tumer rissrenn tumen kau diwes o baro Deblestar tele. Dikenn tumer gar, hoi wella? Kau diwes hadenn tumen pral o baro Debleste. Un taissar well leskri choli pral i tsele menshende Israel.

¹⁹Te hi tumaro them tumenge pale-tchiddo, palle awenn wergel, un lenn tumaro kotar them pash mende an o them o baro Deblestar, kai leskro kheer tardo hi! Kote hi maro baro Debleskri chatchepaskri tardo. Ma krenn i wawar altaro! Koleha hadans tumen pral o baro Debleste un ninna pral mende.

²⁰His gar jaake, har o Achan, koleskro dad o Serach his, peske kolestar las, hoi o baro Debleske kokres his, te was o baro Debleskri choli pral i tsele Israelitarjen, ninna te kras jek mursh kokres ko tchilatchepen. Un job hunte meras koleske, hoi lo kras.”

²¹Un i mursha dran i familja Ruben un dran i familja Gad un dran i paash familja Manasse penan ap i pralstunende pral i bare familje:

²²“O baro Dewel hi bareder har i tsele wawar debla! O baro Dewel hi bareder har i tsele wawar debla. Job djinell un tumer hunte djinenn kowa ninna: Mer mukam les gar un hadam men gar pral leste. Te hi kawa gar o tchatchepen, nai denn men mulo.

²³Kau altaro kram mer gar, te rissras men o baro Deblestar tele. Mer kamam ap leste kek viechen un kek djob leske te chatchrell, witar kek mass sawe viechendar, hoi chah khetne glan leste. Te kram kau altaro koleske, palle dell o baro Dewel men i phagi koleske.

²⁴O tchatchepen hi: Men his daar an o dji, har menge penam: An ko tsiro hoi wella, nai penens tumare tchawe ap mare tchawende: ‘Hoi hi tumen o baro Debleha, o Debleha pral Israel?

²⁵O baro Dewel tchiwas o pani Jordan mashkral tumende un mende, hoi sikrell, tumer dran i khera Ruben un Gad han gar khetne mentsa an jek them, un o baro Dewel hi gar tumaro Dewel.’ Un jaake krans tumare tchawe, te mangenn mare tchawe buder gar o baro Debles an.

²⁶Doleske penam, mer krah i altaro, gar te chatchras viechen pre, un chas kote khetne glan o Debleste,

²⁷na-a, kau altaro te well i sikepen, hoi sikrell mende un tumende un mare tchawende, kai pal mende wenna, te nai wah mer glan o baro Debleskro kheer, te anas leske djob un viechen, sawe, hoi wenn leske chatchedo un sawe, hoi chah glan leste. Mer kamah gar, te penenn tumare tchawe an ko tsiro, hoi wella, ap mare tchawende: ‘Tumer han gar o baro Debleskre menshe.’

²⁸Un mer penam menge: Te rakrens le jaake ap mende un ap mare tchawende, palle nai penah mer: ‘Dikenn kau altaro o baro Deblestar! Mare phure kran les, te sikrenn le, te ham mer ninna o baro Debleskre menshe. Jon kran les gar, te wenn ap leste vieche chatchedo, witar gar te chas mer kate khetne glan o Debleste.’

²⁹Tchatchepah, mer kamam men gar pre te hadell pral o baro Debleste un lestar tele perell, un i duito chatchepaskri te krell, kai wenn vieche un djob leske chatchedo, un kai mer khetne chah glan leste. Na-a, kowa te well kokres ap koi chatchepaskri kerdo, kai hi tardo glan o plachteno kheer o baro Deblestar, kai maro Dewel hi.”

³⁰O rashai Pinhas un kol deesh pralstune, kai pash leste his, kolla, kai i pralstune pral i deesh bare khera hi, shunan, hoi i mursha dran i khera Ruben un Gad un Manasse ap lende penan. Un kowa his latches an lengre jaka.

³¹Un o Pinhas, koleskro dad o rashai Eleasar his, penas ap lende: “Kanna djinah, te hi o baro Dewel mashkral mende. Tumer peran gar lestar tele. Un job hunte dell peskre menshen Israel kek phagi.”

³²Un palle djan o Pinhas un i pralstune penge kol murshendar dran i khera Ruben un Gad, kai an o them Gilead atchan. Un jon djan pale an o them Kanaan pash i wawar Israelitarja, un penan lenge, hoi djas.

³³Un kowa his latches an i jaka fun i wawar Israelitarja. Un jon sharan o Debles, un penan buder gar, te djan le win an o kurepen, te denn le ko them khetne, kai i menshe dran i khera Ruben un Gad djiwenn.

³⁴Un i menshe dran i khera Ruben un Gad dan pengro altaro o lab ‘i sikepen menge halauterenge, te hi o baro Dewel o tchatcho Dewel’.