Read O Debleskro Drom - I Bibla an o Romano Rakepen 2021 Josua 23 Bible Online

Josua 23 - O Debleskro Drom - I Bibla an o Romano Rakepen 2021 bible

Josua 23

¹Bud bersha djan trujel, kai kras o baro Dewel, te nai djiwan i Israelitarja an o latchepen kol thementsa trul lende. Kek kolendar kuras pes lentsa. Un o Josua was phuro. Les his i lengsto djipen.

²Kote das lo i tsele pralstunen pral Israel pash peste khetne gole: i phureder, un i pralstune pral i bare familje, i tchatchepangre mursha un wawar pralstune, un penas ap lende: Me wom phuro, un man his i lengsto djipen.

³Un tumer dikan halauter, hoi tumaro baro Dewel kol tsele thementsa kras tumenge. Job hi kowa, kai pes tumenge lentsa kuras.

⁴Dikenn, me dom tumen ko tselo them mank o pani Jordan un ko Baro Pani, hoi kote tchiddo hi, kai o kham tele djal. Jaake har i barra peran, dom tumare deesh-te-dui bare familjen lengro kotar them, ninna ko them, kolengre menshe gomme gar win tradedo hi.

⁵Kolen tradell o baro Dewel, kai tumaro Dewel hi, glan tumende win. Un tumer lenn lengro them tumenge, jaake har tumaro baro Dewel tumenge penas, te well kowa.

⁶Doleske rikrenn soreles ap halauter, hoi tchinlo hi an o Moseskre lila! Rikrenn leskre tsele laba! Tchiwenn kek lendar ap i rig!

⁷Ma tchiwenn tumen khetne kol wawar menshentsa[40], kai gomme an kau them djiwenn. Lengre deblen denn gar an-gole! Ma denn tumen sowel pash lende! Ma anenn lenge viechen un wawar koowa! Ma witsrenn tumen tele glan lende!

⁸O baro Dewel hi tumaro Dewel. Ap leste rikrenn tumen, jaake har ap leste rikran bis ap kau diwes.

⁹O baro Dewel tradas bare un sorele natsjone glan tumende win. Kek nai stakras glan tumende pre, un nai was sorleder har tumer, bis ap kau diwes.

¹⁰Jek mursh tumendar tradell jek-sero murshen. Tumaro baro Dewel, job hi kowa, kai kurell pes tumenge lentsa, jaake har lo penas.

¹¹Doleske denn jak koi pre, — djal tumaro djipaske — te kamenn tumaro baro Debles o tselo djijestar!

¹²Te rissrenn tumer tumen lestar tele, un tchiwenn tumen kol wawar menshentsa khetne, kai gomme an kau them djiwenn, un romedinerenn len,

¹³palle djinenn, palle tradell o baro Dewel gar buder kal wawar menshen glan tumende win dran o them. Un jon wenn tumenge har dorja un netse, an kolende tumer tapedo wenn, un har tchupnia ap tumare dume, un dukrenn tumen har i kasht an o jak. Kowa djal jaake dur, bis te kek tumendar buder an kau latcho them hi, hoi tumaro baro Dewel tumen das.

¹⁴An i tikno tsiro merau, har hakeno ap kai phub hunte merell. Tumer djinenn, te peras kek lab ap i phub kol tsele latche labendar, hoi o baro Dewel pral tumende penas. Lenn kowa ap o dji: Lauter, hoi job penas, was jaake har job penas. Kek lab peras tele.

¹⁵Un jaake har ko tselo latcho lab tchatcho was, hoi tumaro baro Dewel ap tumende penas, jaake hi kowa ninna kol tchilatche labentsa. Te rikrenn tumen gar ap kowa, hoi tumaro baro Dewel tumentsa win kras, un djan pash wawar debla, un mangenn len an, palle well o baro Debleskri choli pral tumende. Un sik atchell buder kek tumendar djido an kau latcho them, hoi tumaro baro Dewel tumen das.