Read O Debleskro Drom - I Bibla an o Romano Rakepen 2021 Josua 4 Bible Online

Josua 4 - O Debleskro Drom - I Bibla an o Romano Rakepen 2021 bible

Josua 4

¹Un har i tsele menshe ap i wawar rig o panjestar Jordan his, koi penas o baro Dewel ap o Josua:

²“Lenn tumenge deesh-te-dui murshen — jekes dran haki bari familja, hoi well kol deesh-te-dui Israeleskre tchawendar,

³un penenn lenge: Hadenn tumenge deesh-te-dui barra pre mashkral dran o Jordan, kote kai i rashajengre herja tardo his. Un lenn len tumentsa un tchiwenn len ap koi platsa, kai atchenn kai rat!”

⁴Kote das o Josua kol deesh-te-dui murshen gole, kolen job dran i Israelitarja win rodas, jek dran haki bari familja, hoi well kol deesh-te-dui Israeleskre tchawendar.

⁵Un job penas ap lende: “Djan mashkral an o pani glan o mochton, kai i laba tumaro baro Deblestar dren hi! Un hakeno tumendar hadell jek bar ap leskro phik, jek bar haki bari familjake, hoi wella kol deesh-te-dui Israeleskre tchawendar.

⁶Un kol barra te wenn i sikepen tumenge. Te well ko tsiro, kai putchenn tumare tchawe: ‘Hoske hi kal barra kai?’

⁷Palle penenn tumer lenge: ‘O pani dran o Jordan atchas tardo glan o mochton, kai o baro Debleskre deesh laba dren his, har was o mochton mank o pani ap i wawar rig hidjedo. Un kal barra hi kate, te bistrenn i Israelitarja kowa kek tsireske.’”

⁸Un kote kran i Israelitarja jaake har o Josua kowa lenge penas, un djan koi un hadan mashkral an o Jordan deesh-te-dui barra pre, jaake har o baro Dewel kowa ap o Josua penas, — jek bar haki bari familjake, hoi well i deesh-te-dui Israeleskre tchawendar. Un jon anan kol barra ap koi platsa, kai pengre plachtene khera tardo hi. Kote tchiwan le i barra tele.

⁹Deesh-te-dui wawar barra tchiwas o Josua mashkral an o pani Jordan, kote kai i herja kol rashajendar tardo his, kai hidjran o mochton, kai o Debleskre deesh laba dren hi. Un kote hi kol barra ninna gomme kau diwes.

¹⁰Un kol rashaja, kai ko mochton hidjrenn, atchan mashkral an o pani Jordan tardo, bis te halauter kerdo his, hoi o baro Dewel ap o Josua penas, te penell lo kowa i tsele menshenge, jaake har o Mose kowa ap o Josua penas. Un i tsele menshe djan sik wergel.

¹¹Un har i tsele Israelitarja ap i wawar rig his, koi djan ninna kol rashaja ap i wawar rig, kai hidjrenn ko mochton, kai i laba o baro Deblestar dren hi. Un jon djan glan i menshende.

¹²Un i mursha, kai dran o kheer Ruben un dran o kheer Gad his, un kol paash kolendar dran o kheer Manasse, kolla lan pengre chare[3] pentsa, un djan glan i wawar Israelitarja, jaake har o Mose kowa glan i tsiro ap lende penas.

¹³Jaake 40.000 (star-deesh-serja) lurde djan an o kurepen an o telstuno them pash o foro Jericho. Un o baro Dewel his lentsa.

¹⁴Un ap ko diwes kras o baro Dewel o Josua bares glan i jaka kol tsele menshendar Israel. Un an leskro tselo djipen dikan le pre ap leste, jaake har le kowa ninna o Moseha kran.

¹⁵Un o baro Dewel penas ap o Josua:

¹⁶“Pen ap i rashaja, kai o mochton hidjrenn, kai o Debleskre deesh laba dren hi, te wenn le dran o pani Jordan win.”

¹⁷Kanna penas o Josua ap i rashajende: “Awenn win dran o Jordan!”

¹⁸Un har i rashaja kowa kran, un lengre herja ap o them tchiwan, was o pani an o Jordan pale un nashas pale jaake pral i tsele rigja har glan ko tsiro.

¹⁹Kowa his o deshto diwes an o glanstuno tchon, har i Israelitarja ap i wawar rig o panjestar Jordan wan. Un jon tchiwan pengre plachtene khera pre ap i platsa, hoi kharella Gilgal. Kai platsa hi pash o foro Jericho ap koi rig, kai o kham pre djala.

²⁰Un kol deesh-te-dui barra, hoi jon dran o Jordan lan, tchiwas o Josua kote ap i platsa Gilgal

²¹un penas ap i Israelitarja: “Te well i tsiro, kai putchenn tumare tchawe pengre dadendar: ‘Hoske hi kal barra kate?’

²²Palle penenn tumer lenge: ‘Har i Israelitarja mashkral o pani Jordan djan, wan lengre herja gar sapenes.

²³Tumaro baro Dewel mukas o Jordan glan tumende truk te well, bis te djan halauter wergel. Jaake har o baro Dewel kowa ninna o Baro Lolo Panjeha kras.

²⁴Un kowa kras lo doleske, te dikenn i tsele natsjone ap kai phub, har sorelo o baro Dewel hi. Un tumer hunte rikrenn tumenge hako tsiro tumaro baro Debles glan i jaka.’”