Read O Debleskro Drom - I Bibla an o Romano Rakepen 2021 Josua 6 Bible Online

Josua 6 - O Debleskro Drom - I Bibla an o Romano Rakepen 2021 bible

Josua 6

¹Un o foro Jericho rikras peskre bare wudja pandlo, te nai wenn i Israelitarja gar dren. Kek nai djas win, un kek nai djas dren.

²O baro Dewel penas ap o Josua: “Me dom o foro Jericho un leskro baro rajes un koleskre sorele lurden an tire wasta.

³Shob diwessa muk tire tsele lurden trul o foro te djal: hako diwes jek kopo.

⁴Un efta rashaja hunte hidjrenn efta phurdepangre[8] un djan glan o mochton, kai o Debleskre deesh laba dren hi. Ap o eftato diwes djan tumer efta kope trul o foro trujel. Un i rashaja phurdenn koi pashel an pengre phurdepangre.

⁵Te shunenn i lurde, har i rashaja lengsto an pengre phurdepangre phurdenn, hunte denn le halauter i bari kurepaskri gole. Palle perenn i pre-tchidde barra trul o foro an pende khetne. Un i tsele lurde nai djan haki rigjatar an o foro dren.”

⁶Un o Josua, koleskro dad o Nun his, das i rashajen pash peste gole, un penas ap lende: “Anenn o mochton, kai o Debleskre deesh laba dren hi! Un efta tumendar hidjrenn hakeno jek phurdepaskri un djan glan ko mochton.”

⁷Un ap i lurdende penas lo: “Djan trul o foro trujel! Un i feteder kurepangre djan glan o mochton!”

⁸Un har o Josua kowa i lurdenge penas, lan kol efta rashaja pengre efta phurdepangre un djan glan o mochton, kai o baro Debleskre deesh laba dren hi, un djan un phurdan an pengre phurdepangre. Un i rashaja, kai hidjran ko mochton, djan lenge palla.

⁹Un kol feteder kurepangre djan glan kol rashajende, kai pengre phurdepangre phurdenn. Un kol wawar djan halauter pal o mochton. Un an ko tselo tsiro phurdan i rashaja an pengre phurdepangre.

¹⁰O Josua penas i lurdenge: “Ma denn i kurepaskri gole! Un kek tumendar well shunlo. Kek lab well dran tumaro mui bis ap ko diwes, kai me ap tumende penau: ‘Kanna denn i kurepaskri gole!’ Palle denn i kurepaskri gole!”

¹¹Un jaake mukas lo o mochton, kai o baro Debleskre deesh laba dren his, jek kopo trul o foro trujel te djal. Un jon djan pale ap pengri platsa un atchan kote pral i rat.

¹²Un sik taissarlakro stas o Josua pre un i rashaja hidjran pale o mochton, kai o baro Debleskre deesh laba dren his.

¹³Un kol efta rashaja hidjran kol efta phurdepangre glan o mochton, un phurdan ap lende o tselo tsiro pash o djapen. Un kol feteder kurepangre djan lenge glan win. Un kol wawar lurde djan pal o mochton. Un an ko tselo tsiro phurdan i rashaja an pengre phurdepangre.

¹⁴Un ninna ap kau duito diwes djan le jek kopo trul o foro trujel, un wan pale pale ap i platsa, kai sowan le. Un jaake kran le kowa shob diwessa.

¹⁵Un sik ap o eftato diwes, har o kham gomme gar pre djas, stan le pre un djan jaake har ap kol wawar diwessa trul o foro. Kau diwes kokres djan le efta kope trul o foro.

¹⁶Un har le o eftato kopo trujel djan, un i rashaja an i phurdepangre phurdan, koi penas o Josua i murshenge: “Kanna denn i kurepaskri gole! O baro Dewel das tumen kau foro.

¹⁷Un o foro un halauter hoi dren hi, hi o baro Debleske. Kek mensho un kek viecho nai atchell djido. Kokres koi lubni Rahab atchell djido, joi un halauter, hoi pash late an o kheer hi. Joi khatras kol murshen pash peste, kolen mer bitchram.

¹⁸Tumer, denn jak, te lenn tumenge tchi kolestar, hoi hunte well mulo dino. Kowa te krenn tumer, palle anenn tumer bari bibacht un o merepen pral i tsele Israelitarja.

¹⁹O tselo rup un sonakai un o tselo sasterno koowa hi o baro Debleske un hunte well anlo an leskro kheer, kai leskro brawlepen hi.”

²⁰Koi phurdan i rashaja an i phurdepangre. Un har i mursha i phurdepangre shunan, dan le i kurepaskri gole. Koi peran i pre-tchidde barra trul o foro an pende khetne. Un i tsele lurde djan haki rigjatar pre an o foro. Jaake lan le o foro dren.

²¹Un jon dan lauteren i chareha mulo: i tsele murshen, djuwjen, terne un phure, grumja, bakre un burike[9].

²²Un ap kol dui murshende, kai pen an o them trujel dikan, penas o Josua: “Djan an o kheer, kai koi lubni djiwell, un anenn lat win, ninna halauter, kai pash late hi, jaake har tumer tumen glan late sowel dan.”

²³Kote djan kol dui mursha, kai pen an ko them trujel dikan, dren pash i Rahab un anan lat win, ninna lakro dades un lakri dai, lakre phralen un halauter, kai lake budrenn, un lakre tsele menshen, un dan len i platsa win glan koi platsa, kai i Israelengre plachtene khera tardo his.

²⁴O foro un halauter, hoi an leste his, chatchran le pre. Kokres o rup un o sonakai un ko sasterno koowa tchiwan le pash o brawlepen an o baro Debleskro kheer.

²⁵Un jaake mukas o Josua koi lubni Rahab te djiwell, ninna lakre menshen, un halauter, hoi lat his. Kowa kras job doleske, kai khatras li kol murshen, kolen job bitchras, te dikenn le pen tchorchanes an o foro Jericho trujel. Un joi djiwas mank i Israelitarja. Un kolla, kai pal late wan, djiwenn gomme kau diwes kote.

²⁶Ap ko tsiro das pes o Josua sowel: “Mu dell o baro Dewel bibacht ap ko mursheste, koon kau foro pale pre tchiwell. Te tchiwell lo i telstune barra pre, hunte merell leskro phureder tchawo. Te tchiwell lo i bare wudja dren, merell leskro terneder tchawo.”

²⁷Un o baro Dewel his o mursheha Josua. Un job was an-diklo an o tselo them.