Read O Debleskro Drom - I Bibla an o Romano Rakepen 2021 Josua 7 Bible Online

Josua 7 - O Debleskro Drom - I Bibla an o Romano Rakepen 2021 bible

Josua 7

¹I Israelitarja rikran pen gar ap o Debleskro lab, hoi job penas, te well halauter an o foro Jericho leskro. Jek lendar, o Achan, las tchomone peske. O Achaneskro dad his o Karmi, koleskro dad his o Sabdi, un koleskro dad his o Serach. Un kolla his mursha dran o kheer Juda. Har o Achan kowa kras, las o baro Dewel i bari choli pral i Israelitarja.

²Un o Josua bitchras murshen dran o foro Jericho, te djan le pash ko foro Ai. Kau foro hi tchiddo pash Bet-Awen un gar dur o forestar Betel, ap leskri rig, kai o kham pre djal. Un job penas ap lende: “Djan pre un dikenn tumen an o them tchorchanes trujel!” Un kol mursha kran kowa,

³un wan pale pash o Josua un penan ap leste: “Kowa hi gar i baro foro. Kote hunte djan gar i tsele lurde pre. Jaake dui, triin serja hi doha, te djan le pre un marenn o foro Ai khetne.”

⁴Jaake djan jaake triin serja Israelitarja, te kurenn le pen i murshentsa an o foro Ai. Un jon hunte nashan i murshendar dran Ai.

⁵Un kolla lan len palla pash o foreskro baro wudar, un tradan len kote, kai i berga pral tele djal. Kote dan le 36 (trijanda-te-shob) murshen lendar mulo. Koi wan i djia i tsele menshendar har pani darjatar.

⁶Har o Josua kowa dikas, dukas leskro dji jaake, te kras lo peskre koola, hoi ap leste his, paash, un mukas pes i mujeha ap i phub te perell, — glan o mochton, kai o baro Debleskre deesh laba dren his, un atchas jaake tchiddo bis ap i rat. Ninna i phureder an Israel kran kowa jaake. Un jon witsran tchik ap pengre shere.

⁷Un o Josua penas: “Ach, Rai, mo baro Dewel! Hoske anal tu kal menshen pral o pani Jordan, te deh tu men kate an o wast kol menshendar Amor, te denn kolla men mulo? Ach, te atchams kote ap i wawar rig o panjestar Jordan!

⁸Hoi te penap me, mo rai, kanna kai o Israel peske nashas kolendar, kai kamenn les te marell?

⁹I Kanaanitarja un halauter, kai an kau them djiwenn, kolenge penenn le kowa. Un hakeno shunell kowa! Un palle wenn le un denn men mulo. Hoi kameh tu palle te krell, te atchell tiro lab baro?”

¹⁰Kote rakras o baro Dewel ap o Josua: “Ste pre! Hoske hal tu jaake tiro mujeha ap i phub tchiddo?

¹¹O Israel anas bari doosh ap peste! Jon rikran pen gar ap mire laba, hoi lenge penom, te hunte rikrenn le. Un jon lan kolestar, hoi mange his un tchoran les un tchiwan les tchorchanes pash pengro koowa pashel.

¹²Doleske nai wenn i Israelitarja buder gar sorele pral kolende, kai kurenn pen lentsa. Un jon hunte nashenn lendar. Kanna hi jon kolla, kai hunte darenn lengro djipaske. Me hom buder gar tumentsa jaake rah, har anenn tumer gar ko koowa dran tumende krik, hoi mandar tchoran.

¹³Ste pre, un kre, te wenn i menshe pale erligo glan mande! Pen lenge: Krenn tumen djudjo, te nai wenn glan o Debleste taissarlake! Me, o baro Dewel, hom o Israeleskro Dewel un penau tumenge: Mank tumende, tumer Israelitarja, hi tchomone, hoi miro hi. Doleske nai wenn tumer buder gar sorelo pral kolende, kai kurenn pen tumentsa, jaake rah, har anan tumer ko koowa gar dran tumende krik.

¹⁴Taissarlakro wenn tumer jaake glan mande, te djan hako kopo kol menshen khetne, kai wenn pal jek kol deesh-te-dui Israeleskre tchawendar: Un hawe menshen o baro Dewel wi-rodell, kolla wenn glan: jek bari familja pal i wawar. Koi bari familja, hoi o baro Dewel win rodell, kaja well glan: jek kheer pal o wawar. Un hawo kheer o baro Dewel win rodell, kowa well glan: jek mursh pal o wawar.

¹⁵Un ko mursh, pash koleste kowa hatslo well, hoi o baro Debleske hi, kowa well chatchedo: job un halauter, hoi les hi. Job kras gar, hoi o baro Dewel i Israelentsa win kras, un anas jaake i bari ladj ap o Israel.”

¹⁶Un o Josua kras pes sik taissarlake pre, un mukas i tsele Israelitarja jaake glan te well, te wan hako kopo kol menshen khetne glan, kai wan pal jekeste kol deesh-te-dui Israeleskre tchawendar. Un kolla, kai wan pal o Juda, wan wi-rodedo.

¹⁷Un palle mukas lo kol bare familjen glan te well, hoi wan pal o Juda. Un i bari familja Serach was wi-rodedo. Un palle mukas job i tsele murshen dran i bari familja Serach glan te well. Un o kheer Sabdi was wi-rodedo.

¹⁸Un har mukas lo i murshen an koleskro tselo kheer glan te well, was o Achan wi-rodedo, — koleskro dad o Karmi hi, koleskro dad o Sabdi hi, un koleskro dad o Serach hi. Kolengro phuro dad his o Juda.

¹⁹Koi penas o Josua ap o Achan: “Miro tchawo, pen o tchatchepen glan o baro Debleste, kai o Israeleskro Dewel hi! Un pen mange, hoi tu kral! Un rike tchi pale!”

²⁰Koi penas o Achan ap o Josua: “Awa, hi tchatcho, me anom bari doosh ap mande glan o baro Debleste, kai o Israeleskro Dewel hi. Un kawa hi, hoi krom:

²¹Mank ko tselo koowa, hoi lam lendar, dikom i shukar plaashka dran o them Shinar,[10] un 200 (dui-sheel) rupeni kotja un i baro lengsto sonakaskro kotar, hoi jek paash kilo phares hi. Un me nai rikrom man gar pale un lom kowa. Un halauter hi an miro plachteno kheer, an i phub khatemen. Un o rup hi tel o wawar.”

²²Kote bitchras o Josua murshen pash koleskro plachteno kheer. Kolla hatsan halauter, har job penas, an i phub khatemen. Un o rup his o tel o wawar koowa.

²³Jon lan kowa dran leskro plachteno kheer win, un anan les pash o Josua un pash i tsele Israelitarja. Un tchiwan les glan o baro Debleste.

²⁴Un o Josua un i tsele Israelitarja lan o Achanes, koleskro dad o Serach his, un ko rup, koi plaashka un ko baro lengsto sonakaskro kotar, ninna leskre tchawen un leskre tchen, leskre grumjen un burike, bakre un leskro plachteno kheer, un halauter, hoi leske his, un anan len an i tala, hoi kharella Achor.

²⁵Un o Josua penas: “Jaake har tu men an i bibacht anal, jaake anell tut o baro Dewel kanna an i bibacht!” Un i tsele Israelitarja hadan barra pre un witsran len ap lende, te meran le. Un palle chatchran le len pre.

²⁶Un jon tchiwan bud barra ap lende pre. Kolla hi gomme kau diwes koi. Doleske kharell kai platsa gomme kau diwes ‘Tala Achor’[11]. Kanna his o baro Dewel buder gar chojedo.