Read O Debleskro Drom - I Bibla an o Romano Rakepen 2021 Josua 9 Bible Online

Josua 9 - O Debleskro Drom - I Bibla an o Romano Rakepen 2021 bible

Josua 9

¹Un kowa, hoi i Israelitarja kran, shunan i tsele bare raja, hoi ap i wawar rig o panjestar Jordan djiwan, an o pralstuno them un ninna an o telstuno them un pash o Baro Pani bis pash i berge Libanon. Kal bare raja his i raja pral o them Het, pral o them Amor, pral o them Kanaan, pral o them Peris, pral them Hiw un pral o them Jebus.

²Un jon wan halauter khetne, te djan le khetne an o kurepen khatar[14] o Josua un o Israel.

³Har shunan i menshe, kai an o foro Gibeon djiwenn, hoi o Josua kolentsa kras, kai an i forja Jericho un Ai djiwan,

⁴koi mukan le penge an i shere trujel te djal, har nai chochenn le len, te atchenn le djido. Un jaake djan le koi un lan chapen pentsa an phure gone, hoi le ap pengre burike[15] tchiwan, ninna phure moljakre gone, hoi paash his un pale sido wan.

⁵Ap lengre pire riwan le phure kircha, hoi paash his un sido wan. Un ninna lengre koola ap lende his phuro. Un ko tselo maro, hoi le peha lan, his phuro un har bar.

⁶Un jaake djan le ap koi platsa an Gilgal, kai i Israelitarja un o Josua his, un penan ap leste un ap i Israelengre murshende: “Dran i them dur katar krik wah mer, te krenn tumer mentsa win, te krenn kek kurepen mentsa.”

⁷Koi penan i Israelengre mursha ap kol Hiwarja: “Nai hi, te djiwenn tumer kate mashkral mende! Har nai kras mer palle sawo koowa tumentsa win?”

⁸Un jon penan ap o Josua: “Tire budepangre ham mer!” Un o Josua putchas: “Koon han tumer? Dran hawo them wenn tumer?”

⁹Un jon penan: “Dran i them dur katar krik wan tire budepangre kate pash tute. Mer shunam, har baro tiro Dewel hi un hoi job, o baro Dewel, halauter kras an o them Egiptia,

¹⁰un ninna halauter, hoi job kol dui bare rajentsa pral i Amorarja kras, kai ap i wawar rig o panjestar Jordan djiwan, ko rajeha Sihon, ko baro rajeha pral o foro Heshbon, un ko rajeha Og, ko baro rajeha pral o them Bashan, koon an o foro Astarot djiwas.

¹¹Un har kowa shunam, penan mare phureder un halauter, hoi an maro them djiwenn, ap mende: ‘Lenn kowa, hoi tumen o djipaske hunte well, tumentsa ap o drom! Un djan kote pash lende un penenn ap lende: Tumare budepangre ham, un krenn mentsa win, te krenn kek kurepen mentsa!’

¹²Dikenn, kate hi maro maro, hoi o dromeske his. Ap ko diwes, har les mentsa lam dran mare khera, his lo gomme tato. Dikenn, hoi lestar was, — phuro hi lo un har bar.

¹³Un kal moljakre gone, kai his newe, har len khere pherdo kram, kanna wan le phure un djan paash. Kalla mare koola un kircha wan phure un djan paash ap ko dur drom, hoi hunte djam.”

¹⁴Kote lan i pralstune pral i Israelitarja o chapastar kol wawarendar, hoi len o dromeske pashel his, un chan les[16]. O baro Debles putchan le koleske gar.

¹⁵Un o Josua kras lentsa win, te well kek kurepen mashkral lende dujende. Un job das peskro wast koi pre, te mukell lo len te djiwell. Un i pralstune pral o Israel dan pen ninna sowel koi pre.

¹⁶Un i Israelitarja djan dureder un wan pash i forja Gibeon, Kefira, Beerot un Kirjat-Jearim. Kalla his i forja, kai kol mursha djiwenn, kolentsa jon glan triin diwessa win kran, te krenn le lentsa kek kurepen. Koi shunan i Israelitarja, te djiwenn kol menshe mashkral lende un hi gar dran i dur them.

¹⁸Un i Israelitarja djan gar ap lende pre. Kowa nai kran le gar dran koi sowel, hoi dan pen i pralstune pral o Israel glan o baro Debleste, kai o Israeleskro Dewel hi. Un i tsele Israelitarja his chojedo pral pengre pralstunende.

¹⁹Un kolla penan ap i tsele menshende: “Mer dam men sowel ap o baro Debleste, kai o Israeleskro Dewel hi, te kras lenge tchi. Doleske nai taprah len gar an,

²⁰un kamah maro sowel, hoi dam, te rikrell, un mukah len te djiwell, te well gar i choli o Deblestar pral mende. Kowa kamah lentsa te krell:

²¹Jon atchenn djide, un wenn mare budepangre, kai kasht hunte denn un pani hunte anenn o tselo khereske Israel.” Kol labentsa rakran i pralstune ap i menshende an Israel.

²²Un o Josua mukas i murshen dran Gibeon khetne gole te dell, un penas ap lende: “Hoske chochran, har penan, te han dran i dur them, un djiwenn mashkral mende?

²³Un kanna wenn praassedo! Hako tsireske wenn tumer mare budepangre, un hunte denn kasht un hunte anenn pani miro Debleskro khereske.”

²⁴Un jon penan ap o Josua: “Maro rai, mer shunam, te hi kowa tchatcho, te penas o baro Dewel ap o Mose, koles leskro tchatcho wast his, te dell lo tumen o tselo them, un te hunte wenn halauter mulo dino, hoi dren djiwenn. Doleske his men bari daar maro djipaske, un kram kawa jaake.

²⁵Un kanna dik, mer ham an tiro wast. Kre mentsa jaake har an tire jaka tchatcho hi!”

²⁶Un jaake kras o Josua lentsa, un mukas len gar an i Israelengre wasta te perell, un mukas len gar mulo te dell.

²⁷Un jaake kras o Josua, te wan le budepangre o khereske Israel, un hunte dan kasht un hunte anan pani i rashajenge, kai chatchran viechen o baro Debleske ap koi platsa, kai o baro Dewel win rodell. Kowa hi gomme kau diwes lengre budi.