Read O Debleskro Drom - I Bibla an o Romano Rakepen 2021 2. Tessalonikarja 1 Bible Online

2. Tessalonikarja 1 - O Debleskro Drom - I Bibla an o Romano Rakepen 2021 bible

2. Tessalonikarja 1

¹Mer, o Paulo, o Silwano un o Timoteo, tchinah kau liil ap tumende, kol patslende, kai wenna khetne an o foro Tessalonika. Tumer patsenn ap o Debleste, maro dadeste, un ap maro rajeste, o Jesus Kristeste.

²Latchepen un bacht tumenge! Kowa dell tumen o Dewel, maro dad, un maro rai, o Jesus Kristo.

³Mire phrala, mer hunte parkras men tumenge pash o Debleste hako tsiro, jaake bud latchepen shunam tumendar. Tumaro patsepen well baro un bareder. Un pash tumende lauterende well o kamlepen bareder, kai jek o wawareske hi.

⁴Mer sharah men tumentsa pash i patslende, kai wenn khetne an o Debleskro lab an i wawar forja, un penah lenge, hoi tumer lauter ap tumende lenna, un te mukenn gar tumaro patsepen, ninna te lenn le tumen palla un krenn tumaro djipen phares.

⁵Ap kowa lauter dikenn tumer, kai djal o Dewel pal o tchatchepen ap ko diwes, kai rakrell lo o tchatchepen win pral i menshende. Tumer, kai lan leske bud pharo koowa ap tumende, lell lo pash peste. Tumer han leske moldo, te djiwenn leha khetne an o bolepen.

⁶Job djal ninna pal o tchatchepen, te dell lo kolen i phagi, kai tumen palla lan.

⁷Tumer, kai wenn kanna palla lino, tumen dell lo i bari bacht. Kowa dell lo tumen mentsa khetne ap ko diwes, kai well maro rai Jesus pale dran o bolepen, un lauter dikenn les. Leskre sorele bolepangre[1] wenn leha,

⁸un i jag hi trul lende. Palle well o Debleskri choli pral kolende, kai kaman lestar tchi te djinell, kolla kai shunan gar ap o latcho lab maro rajestar, o Jesusestar, un kaman gar ap leskro drom te djal.

⁹Kolla lenn i phagi: Jon djan hako tsireske nashedo, un nai wenn buder gar pash o Debleste, un dikenna gar leskro baro railepen

¹⁰ap ko diwes, kai well maro rai Jesus pale, te well lo sharedo peskre menshendar. Un i tsele patsle dikenn les, un hi bachtelo pral leste, ninna tumer, kai patsan ap o Debleskro latcho lab, hoi mer tumenge penam.

¹¹O Dewel rodas tumen win, te djiwenn pash leste. Doleske mangah lestar hako tsiro, te djiwenn tumer kanna jaake ap kai phub, har job kowa peskre tchawendar kamella. Ninna mangah lestar, te dell lo tumen i soor, te nai krenn o latcho koowa, hoi kamenn te krenn dran tumaro patsepen.

¹²Palle well maro rai Jesus sharedo dran tumende. Un leha khetne wenn tumer ninna sharedo. Jaake latcho hi maro Dewel un maro rai, o Jesus Kristo, tumenge.