Read O Debleskro Drom - I Bibla an o Romano Rakepen 2021 1. Timoteo 2 Bible Online

1. Timoteo 2 - O Debleskro Drom - I Bibla an o Romano Rakepen 2021 bible

1. Timoteo 2

¹Me penau tumenge kanna, hoi hunte krenn un gar mukenn: Mangenn o Debles i tsele menshenge! Penenn leske lauter, hoi ap tumaro dji hi! Parkrenn tumen pash o Debleste lautereske, hoi job das!

²Mangenn lestar, te dell lo i rajen un i pralstunen o goswepen, te krenn le pengri budi mishto, jaake te djiwas nai an o latchepen, te djas mer o Debleskro drom, te nai rakrenn i menshe gar djungeles pral mende!

³Kowa kamell maro Dewel, kai das men o newo djipen.

⁴Job kamella, te wenn i tsele menshe ap leskro drom, un te haiwenn le leskro tchatchepen.

⁵Hi jek Dewel i tsele menshenge. Un hi jek rakepaskro[2], kai anell o Debles un i menshen khetne. Kowa hi ko mensho Jesus Kristo.

⁶Job das peskro djipen i tsele menshenge. Jaake sikras o Dewel an o tchatcho tsiro, kai kamell lo, te well hako mensho win lino dran o tchilatchepen un o merepen.

⁷Doleske bitchras man o Dewel pash kolende, kai kek bibolde hi, te penap lenge o latcho lab o Jesus Kristestar, un te sikrap lende o tchatcho patsepen. Man hi o Jesuseskro wast. Kowa hi o tchatchepen. Me chochau gar.

⁸Jaake kamau me, te mangenn i mursha o Debles an, kote, kai i patsle khetne wenna. Kal mursha hunte djiwenn pengro djipen jaake, har o Dewel kamella. Te hadenn le pengre wasta pre, te mangenn le o Debles an, palle hunte denn le jak, te well kek choli un kek tchingepen an lengre djia.

⁹Ninna kamau, te riwell i djuwel kek wi-ladjede ripja. Te riwell li pes gar jaake, te dikell hakeno ap late. Lakro shukapen te well gar diklo an kowa, har joi peskre balla hidjrella, witar gar an o sonakai un wawar kutch koowa, witar gar an kutch ripja.

¹⁰Lakro shukapen sikrell pes an ko latcho koowa, hoi joi krella. Jaake hi kowa pash kol djuwjende, kai ap o Debleste patsenna.

¹¹Te well o Debleskro lab i patslenge penlo, hunte shunenn i djuwja ap kowa, hoi penlo wella. Jon hunte rakrenn gar peha.

¹²Me kamau gar, te penell i djuwel o Debleskro lab glan i murshende, witar gar, te well lat penepaske pral o mursheste. I djuwja rikrenn pen pale.

¹³Hoske penau kowa? Doleske: O Adam was glan i Eva kerdo.

¹⁴O sap chochras gar o Adames. O sap chochras i Evat. Un i Eva shunas gar ap kowa, hoi o Dewel penas.

¹⁵I djuwel well sharedo, te lell li tchawen, un te patsell li ap o Jesuseste, un te hi lat o Debleskro kamlepen an lakro dji, un te djiwell li i djudjo djipen glan o Debleste un glan i menshende.