Read O Debleskro Drom - I Bibla an o Romano Rakepen 2021 1. Timoteo 4 Bible Online

1. Timoteo 4 - O Debleskro Drom - I Bibla an o Romano Rakepen 2021 bible

1. Timoteo 4

¹O Debleskro Ducho penell menge, te perenn i menshe o Debleskro dromestar tele an ko tsiro, hoi wella. Jon shunenn ap o chochepen, un ap kowa, hoi wella o bengestar.

²Kolla, kai anenn len o tchatcho dromestar tele, hi chochene, kai penenn pendar, te haiwenn le o tchatchepen. Un jon djinenn buder gar, hoi mishto un tchatcho hi. Ninna haiwenn le gar, hawo tchilatcho koowa jon krenna.

³Jon penenna, te romedineress gar, un te chas gar hako chapen. Koon ap o Jesus Kristeste patsella, un o tchatchepen haiwella, nai chal lauter, te parkrell pes lo pash o Debleste, kai lauter kras.

⁴Lauter, hoi o Dewel kras, hi latcho. Un tchi hi pale-tchiddo, te parkrah men mer koleske pash o Debleste.

⁵O Debleskro lab krell, te nai chas hako chapen. Un mer parkrah men pash o Debleste koleske.

⁶Te peneh tu kau koowa i patslenge, hal tu o Jesuseskro latcho budepaskro. Jaake sikreh, kai djiweh pal o latcho lab o Jesus Kristestar, hoi tu shunal un patsal, un kai djah tu dureder ap o Debleskro drom!

⁷Ma shun ap dinele parmisse! Kolla wenna gar o Deblestar! Dik ap tute, te djiwess o djipen, hoi latcho hi glan o Debleskre jaka.

⁸Te dikeh ap kowa, te wenn tire mussja un herja soreles, hi kowa gar bud moldo. Te dikeh ap kowa, te well tiro patsepen soreles, hi kowa bud moldo, un tu leh o tchatcho djipen. Ko djipen dell tut o Dewel kanna ap kai phub un an ko tsiro, hoi wella.

⁹Kawa lab hi tchatcho, un tumer nai patsenn les.

¹⁰Maro patsepen rikrell pes ap o djido Debleste. Job kamell hako menshes dran o merepen win te lell. Un kolla, kai patsenn ap leste, wenn dran o merepen win lino. Doleske budrah mer, un lah ninna duka ap mende.

¹¹Kal laba pen i patslenge un pen lenge, te shunenn le ap kowa!

¹²Ninna te hal tu terno, ma muk tut ap i rig te tchiwell! Tu djiwess jaake, te dikenn i wawar patsle, har hunte djiwenn jon. Kowa dikenn le ap tire laba, tiro djipen, tiro kamlepen i wawarenge, tiro patsepen ap o Jesuseste, un tiro djudjo dji.

¹³Le o Debleskro lab an i wast, un sike i menshende, hoi koi dren tchinlo hi, un rake koi pral! Sike lende, har te djan jon ap o Debleskro drom! Kre kowa jaake rah, bis te wau pash tute!

¹⁴Ma biste koi budi, hoi o Debleskro Ducho tut das, har kol phureder phrala tuke i wasta pre tchiwan, un hoi jon pral tute glan-wi penan!

¹⁵Kre kowa lauter tiro tselo djijeha un tiri tseli sorjah, te dikell hakeno, kai tiro patsepen bareder wella!

¹⁶De garda ap tute, har tu djiweh un har tu sikreh o Debleskro drom! Kre ko koowa, hoi tuke penom! Jaake djah tu ap o drom pash o Debleste. Un kolla, kai shunenn ap kowa, hoi tu peneh, aneh tu ninna ap ko drom.