Read O Debleskro Drom - I Bibla an o Romano Rakepen 2021 Filemon 1 Bible Online

Filemon 1 - O Debleskro Drom - I Bibla an o Romano Rakepen 2021 bible

Filemon 1

¹Me, o Paulo, kai stildo hom o Jesus Kristeske, un maro phraal, o Timoteo, mer tchinah kau liil ap tute, Filemon! Tu hal maro kamlo phraal un kreh mentsa khetne o Debleskri budi.

²Mer tchinah ninna ap mari phenjate, i Apfia, un ap o Archippo, kai budrella mentsa o Jesus Kristeske, ninna ap i tsele patslende, kai wenna khetne an tiro kheer.

³Latchepen un bacht tumenge! Kowa dell tumen o Dewel, kai maro dad an o bolepen hi, un o Jesus Kristo, maro rai.

⁴Hako tsiro, kai rakrau o Debleha, parkrau man tuke pash leste.

⁵Me shunom, kai tu kameh i tsele patslen o djijestar. Un tu patseh ap maro rajeste, o Jesuseste, jaake har mer ap leste patsah. Me mangau o Deblestar, te well tiro patsepen jaake soreles an tute, te haiwess tu bud un budeder har baro o latchepen hi, hoi das men o Jesus Kristo.

⁷Miro phraal! Tiro kamlepen, hoi hi tut i patslenge, kowa kras lengre djia soreles. Un kowa, hoi tu lenge kral, kras man ninna bachteles, un das man newi soor.

⁸Kanna penau tuke, hoske tchinau kau liil: Me kamau tutar, te kress tu tchomone mange. Ninna te hi man o Jesuseskro wast, un nai penoms tuke soreles, hoi tu hunte kress, kamau me kowa gar soreles tuke penell. Na-a. Me, o Paulo, i phuro mursh, un stildo o Jesus Kristeske, kamau tut o djijestar.

¹⁰Un doleske mangau tutar miro tchaweske, o Onesimo, te wess tu leske latches. Kate an o stilepen penom leske o Jesus Kristestar. Un job was patslo, un was miro tchawo an o patsepen.

¹¹Ap ko tsiro, har job pash tute budras, his lo tuke tchi moldo. Kanna hi lo mange har tuke bud moldo.

¹²Koles bitchrau tuke pale. Un miro dji djal leha.

¹³Me kamoms te atchals lo pash mande un wals mange koi, jaake har tu mange koi wals, te wals tu pash mande kate an o stilepen. Kate hom doleske, kai penom i menshenge o latcho lab o Jesus Kristestar.

¹⁴Me kamom gar tchomone te krap, hoi tu gar kameh. Doleske rikrom o Onesimes gar pash mande. Tu te kameh les mange pale te dell, kress tu kowa dran tiro latchepen.

¹⁵Nai wals, te his lo i tikno tsiro gar pash tute, te atchell lo kanna hako tsireske pash tute.

¹⁶Kanna hi lo tuke buder gar kokres i budepaskro. Na-a. Job hi budeder har kowa. Job hi i latcho phraal. Kowa hi lo mange, un har bud budeder hi lo kowa kanna tuke: Job hi tiro budepaskro un ninna tiro phraal an o patsepen.

¹⁷Me te hom tiro maal, palle le les pash tute pre, jaake har tu man pre lals.

¹⁸Job te kras tuke tchomone tchilatches un te hi les i sijaan pash tute, palle kre jaake, har wals man koi sijaan pash tute.

¹⁹Me, o Paulo, tchinau kowa kokres miro wasteha. Me kamau plaissrell, hoi job hunte plaissrals tuke. Me kamau gar te rakrap pral koi sijaan, hoi tut pash mande hi: Me anom tut ap o Debleskro drom.

²⁰Awa, miro phraal! Kre man bachteles, un kre kowa, hoi me tutar mangom! Kre kowa maro rajeske, o Jesus Kristeske, ap koleste mer dui patsah. Jaake kreh tu miro dji soreles an leste!

²¹Me djinau, te shuneh ap mande un kreh ninna budeder har me tutar mangom. Doleske tchinom tuke kau liil.

²²I wawar koowa mangau tutar: Kre mange i isema an tiro kheer, kai me nai sowap! O Dewel te shunell tumaro mangepen, palle wau an i tikno tsiro pash tumende. Kowa patsau.

²³O Epafras, kai mantsa an o stilepen o Jesus Kristeske hi, penell tuke: Atch maro Debleha!

²⁴Ninna o Marko, o Aristarcho, o Demas, un o Luka, kai mantsa o Jesus Kristeske budrenna, kolla lauter penenn tuke: Atch maro Debleha!

²⁵O latchepen maro rajestar, o Jesus Kristestar, well pral tumende!