Read O Debleskro Drom - I Bibla an o Romano Rakepen 2021 Hebrearja 1 Bible Online

Hebrearja 1 - O Debleskro Drom - I Bibla an o Romano Rakepen 2021 bible

Hebrearja 1

¹An o phuro tsiro rakras o Dewel bud kope jaake te jaake ap peskre rakepangre, un bitchras len pash mare phurende, te penenn le lenge leskre laba.

²Kanna, an kau tsiro, bitchras lo peskro tchawes pash mende, te rakras job ap mende. Koleste das o Dewel lauter an leskre wasta, te well job o rai pral lauter. Koleha kras lo o bolepen un i phub.

³O Debleskro tchawo hi railo un baro har o Dewel. Un kowa, hoi hi o Debles an o dji, hi ninna o tchawes an o dji. Dran leskro sorelo lab rikrell lo lauter khetne, hoi job kras. O Debleskro tchawo las mari doosh[1] un tchilatchepen mendar, un job beshas pes ap i tchatchi rig o baro Deblestar an o bolepen.

⁴Job was bud bareder un sorleder har i bolepangre[2]. Un o Dewel das les i lab, hoi hi bud bareder un raileder har lengre laba.

⁵An o Debleskro lab hi tchinlo, kai penell o Dewel ap peskro tchaweste: Tu hal miro tchawo. Kau diwes wom tiro dad.[3] Sawe laba penas lo ap kekeste peskre bolepangre. Witar gar penas lo ap kekeste lendar: Me wau tiro dad. Un tu weh miro tchawo.[4]

⁶O Debleskro tchawes hi peskro dadeskro wast. Lestar penas o Dewel, har job les ap i phub bitchras: I tsele Debleskre bolepangre hunte witsrenn pen glan leste tele, te sharenn le les.[5]

⁷Pral peskre bolepangre penas lo: Jon hi mire budepangre, sik har i ducho, hoi phurdell pral i phub, un sorelo har i jag.[6]

⁸Ap peskro tchaweste penas lo: Tu, o Dewel, atcheh o baro rai kanna un hako tsiro. Tu hal tchatcho un latcho ap tire menshende.

⁹O tchatchepen kamal tu, un o tchilatchepen dikeh glan i jaka nai gar. Doleske rodas tut tiro Dewel win, te wess tu bareder un bachtleder har kolla, kai pash tute hi.[7]

¹⁰Pale penas lo ap leste: Tu hal o baro rai, un kral i phub glan i rah tsiro. Un tire wasta kran o bolepen.

¹¹O bolepen un i phub atchenn gar. Tu atcheh hako tsiro. O bolepen un i phub wenn phuro, un djan paash har i ripen.

¹²Tu tchiweh len khetne, har jek i phuri plaashka khetne tchiwella, un i newi plaashka ap peste tchiwella. Tu atcheh jaake, har tu hal, un mereh gar.[8]

¹³Ap kekeste peskre bolepangre penas lo kowa, hoi job ap peskro tchaweste penas: Besh tut ap miri tchatchi rig! Un me krau, te wess tu o rai pral kolende, kai chan pen ap tute.[9]

¹⁴I tsele bolepangre hi leskre budepangre. Kolen bitchras o Dewel ap i rig kolendar, kai djan ap o Debleskro drom, te lenn le o Debleskro djipen, hoi gar pre-herella.