Read O Debleskro Drom - I Bibla an o Romano Rakepen 2021 Hebrearja 10 Bible Online

Hebrearja 10 - O Debleskro Drom - I Bibla an o Romano Rakepen 2021 bible

Hebrearja 10

¹Kowa, hoi an o Moseskre lila tchinlo hi, sikrell men gar o tselo bolepaskro brawlepen, hoi kamell o Dewel i menshende te dell. Na-a, i tikno kotar kolestar. Kolla, kai anenn marede viechen glan o Debleste, wenn gar doleske tchatcho un erligo glan leskre jaka. Te wans le tchatcho un erligo, hunte anans le gar hako bersh pale viechen glan leste.

²Te krals kol viechengro rat len jek kopo hako tsireske tchatcho un erligo, palle hunte anans le buder gar pale te pale marede viechen glan o Debleste. Lengre djia wans djudjo, un jon nai bistrans ko tchilatchepen, hoi jon kran.

³Tchatchepah, kol tsele marede viechen, hoi jon o Debleske hako bersh anan, kowa anas lenge pale te pale lengri doosh an o shero.

⁴Della kek drom, kai lell nai o grumjengro rat un o bakrengro rat i doosh i menshendar krik.

⁵Doleske penas o Jesus Kristo, har job ap i phub was, ap o Debleste: Mo Dewel, marede viechen un wawar koowa kamal gar. Na-a. Man mukal i mensho te well.

⁶Tu dikeh gar latches ap i viechende, hoi chatchran le tuke, te well lengri doosh lendar krik lino.

⁷Koi penom: Dik, mo Dewel, kate hom, te krap, hoi tu mandar kameh, jaake har was mandar glan i rah tsiro an o Debleskro lab tchinlo.[31]

⁸Ninna te hi tchinlo an o Moseskre lila, te marenn le viechen o Debleske, penas o Jesus Kristo: Tu, mo Dewel, kamal gar, te anenn le tuke marede viechen un wawar koowa, witar kek viechen, hoi jon tuke chatchrenna, te less tu lengri doosh lendar. Tu dikeh gar latches ap kowa.

⁹Palle penas job: Dik, me wau, te krap, hoi tu kameh. Kanna dikah: Har o Jesus Kristo was, te dell lo pes o Debleske, koi was ko phuro drom buder tchi moldo.

¹⁰Har o Jesus Kristo ap o trushel menge meras, kras lo kowa, hoi o Dewel kamas. Un mari doosh las lo jek kopo hako tsireske mendar, un job kras men jaake djudjo un erligo glan o Debleste.

¹¹Hako rashai krell hako diwes peskri budi, un marell bud kope viechen o Debleske. Kal vieche nai lenn gar i doosh i menshendar.

¹²O Jesus Kristo das pes jek kopo an o merepen, te lell lo i doosh i menshendar krik, un beshas pes hako tsireske ap o Debleskri tchatchi rig. Kote dikell lo ap ko diwes, kai wenn kolla tel leskre pire tchiddo, kai kaman les gar.

¹⁴Jek kopo meras o Jesus Kristo kolenge, kai wenna pash o Debleste, un kras len hako tsiro tchatcho un erligo glan leste.

¹⁵Ninna o Debleskro Ducho penell menge kowa. An o Debleskro lab hi tchinlo:

¹⁶Ap ko tsiro, hoi wella, penell o Dewel, sikrau me i menshende i newo drom, har nai wenn le pash mande: Me tchiwau miro tchatchepen an lengre shere un tchinau mire laba an lengre djia.

¹⁷Un me bistrau lengri doosh. Un lengro tchilatchepen well buder gar an miro shero.[32]

¹⁸Kote, kai o Dewel i doosh krik las, kote hunte merell kek viecho buder gar, te lell lo i doosh krik.

¹⁹Mire phrala, shunenn! Har o Jesus Kristo menge meras, un peskro rat ratas, kras lo menge i wudar pre, te nai wah glan o Debleste. Men hunte well buder kek traash.

²⁰Har o Jesus Kristo peskro djipen an o merepen das, his kowa jaake, har te krals lo menge ko wudar dran kutch pesso than pre, hoi hi glan o Debleskri kutch isema. Jaake kras lo menge i newo drom, hoi anell men an o djipen o Debleha.

²¹Men hi i baro rashai. Kowa hi i tsele patslenge koi.

²²Leskro rat thowas mari doosh mendar, un kras mare djia djudjo. Un mer wam an o djudjo pani tele thodo. Doleske djas kanna o latcho un tchatcho djijeha glan o Debleste an i sorelo patsepen!

²³Mer nai patsah o Debles, te krell lo kowa, hoi job penas. Job rikrell peskro lab. Doleske rikras soreles maro patsepen ap leste!

²⁴Das jak jek ap o wawareste, te kamell jek o wawares o djijestar, un te krell hakeno latcho koowa!

²⁵Das jak, te atchas gar krik, te wenn i patsle khetne. Hi sawe mashkral i patslende, kai wenn buder gar khetne. Kowa hi gar mishto. Tumer dikenna, te hi o diwes gar dur, kai well o rai Jesus pale. Doleske djan kote, kai wenn i patsle khetne, te krell jek o wawares soreles an o dji.

²⁶Te kamell jek ap i tchilatcho drom te djal, un krell kowa ninna, ninna te prindjrell lo o tchatchepen, koleske hi buder kek koi, kai nai merals, te lell lo leskri doosh krik.

²⁷Na-a, job hunte trashell ko diwes, kai well o Debleskri choli pral i phub un i soreli jag pral kolende, kai kaman lestar tchi te djinell.

²⁸An o phuro tsiro his jaake: Ko mensho hunte meras, kai djiwas gar jaake, har an o Moseskre lila tchinlo hi. Te dikan dui, triin menshe ko tchilatcho koowa, hoi ko mensho kras, hunte meras job. Un kekes hunte khaitas job.

²⁹Te his kowa jaake koleha, kai kras gar, hoi o Mose penas, kitse sorleder well o Debleskri choli pral koleste, kai o Debleskro tchawes pestar stakrella, un krella, har te wals o Jesus Kristeskro rat tchi moldo. Un kau rat lals peskri doosh krik, un krals les erligo glan o Debleste. O Debleskro Ducho his leske latches, un job dukras les.

³⁰Mer djinah, kai o Dewel penas: Me dau len ko tchilatchepen pale, hoi jon kran. Miri choli well ap lende.[33] Un pale hi tchinlo: O Dewel rakrell o tchatchepen pral peskre menshende win.

³¹Hawi bari phagi well pral kolende, ap lende o djido Dewel chojedo hi!

³²Ma bistrenn ko tsiro, kai o Debleskro kamlepen har i momeli an tumare djia was! Ap ko tsiro kran i menshe tumenge o djipen phares. Un tumer lan bud duka ap tumende, un witsran tumaro patsepen gar ap i rig.

³³Bud tumendar wan glan lauterende praassedo un dino. I wawar tumendar wan ap i rig kolendar, kai praassedo un dino wan.

³⁴Tumer rowan kolentsa, kai an o stilepen hi. Kolla, kai gar patslo his, lan tumendar kowa krik, hoi tumaro his. Un i bachtelo djijeha mukan tumer len kowa te krell. Tumer djinan, kai hi tumen i feteder brawlepen an o bolepen, hoi kek nai lell tumendar.

³⁵Doleske penau tumenge: Ma witsrenn tumaro patsepen tumendar! Tumer djinenn, hawi bacht lell kowa, kai ap o Debleste rikrella.

³⁶Tumer hunte wenn gar khino an tumare djia, te krenn kowa lauter, hoi o Dewel kamella! Palle dell lo tumen peskro brawlepen jaake, har job penas.

³⁷An o Debleskro lab hi tchinlo: Ko tsiro wella sik, kai well kowa, kai hunte wella. Job mukell pes gar ap o drom pale te rikrell. O Dewel penas: Koon ap mande patsella, kowa hi tchatcho glan mire jaka. Un job lell o djipen. Koon miro drom mukella, ap koleste dikau gar latches.[34]

³⁹Tchatchepah, mer ham gar kolendar, kai mukenn leskro drom un djan nashedo. Na-a. Mer ham kolendar, kai atchah an o patsepen, un lah o djipen, hoi gar pre-herella.