Read O Debleskro Drom - I Bibla an o Romano Rakepen 2021 Hebrearja 11 Bible Online

Hebrearja 11 - O Debleskro Drom - I Bibla an o Romano Rakepen 2021 bible

Hebrearja 11

¹Te patsah ap o Debleste, patsah mer ninna, te dell men o Dewel kowa, hoi job penas. Kowa patsah soreles. Ninna te dikah kowa gomme gar, hi maro dji sorelo un djinell, te well kowa jaake, har job penas.

²Sawo patsepen his an mare phurende, un o Dewel dikas latches ap lende.

³Dran maro patsepen haiwah, te was o bolepen un i phub kerdo dran o Debleskro rakepen. Lauter, hoi kanna dikah, kowa kras o Dewel dran kowa, hoi nai dikah gar.

⁴An o phuro tsiro patsas o Abel[35] ap o Debleste, un maras leske i viecho. Har dikas o Dewel, hoi o Abel leske anas, dikas lo latches ap kowa. Jaake was o Abel an o tchatchepen tardo glan leste. Kowa, hoi leskro phraal, o Kain, o Debleske anas, kowa his gar jaake latcho glan o Debleskre jaka har kowa, hoi o Abel leske anas. Ninna te meras o Abel, sikrell men leskro djipen gomme kau diwes leskro patsepen.

⁵Ninna o Henoch patsas, hoi o Dewel penas. Un o Dewel las les djides pash peste. Job hunte meras gar. Kek nai hatsas les buder. Glan kowa was lestar penlo, te kras lo kowa, hoi his latcho glan o Debleskre jaka.

⁶Te hi jekes kek patsepen, nai krell lo gar, hoi hi latcho glan o Debleskre jaka. Koon kamell pash o Debleste te well, kowa hunte patsell, te hi o Dewel djido, un te hi lo latcho ap koleste, koon rodell les.

⁷Ninna o Noah patsas, hoi o Dewel penas, har job leha rakras, un leste sikras, hoi pral i tsele menshende wella. Ninna te dikas o Noah kowa gomme gar, shunas lo ap o Debleste, un kras i baro panjeskro kheer. Jaake hunte meras job peskre menshentsa gar. Har o Noah ko panjeskro kheer kras, was diklo, te patsas job, hoi o Dewel penas. Ninna was diklo, i wawar menshe patsan gar, hoi o Dewel penas. Doleske hunte meran le. Ap o Noah penas o Dewel: Tu patsal man. Tu hal kanna an o tchatchepen tardo glan mande.[36]

⁸Ninna o Abraham patsas, hoi o Dewel penas. Har job leske penas: Dja an ko them, hoi me dau tute un tire tchawende[37], koi shunas o Abraham ap leste, un djas dran peskro them win, un djinas gar, kai job djala.

⁹Ap ko tsiro djiwan wawar menshe an ko them, hoi kamas les o Dewel te dell. Un o Abraham djas kate un kote an ko them trujel, un djiwas an plachtene khera. Ninna leskro tchawo, o Isaak, un koleskro tchawo, o Jakob, djiwan jaake. Kolenge penas o Dewel ninna: Tumende dau ko them.

¹⁰O Abraham dikas ap ko tsiro, kai nai djiwell lo an ko foro, hoi o Dewel krella, un hoi hako tsiro atchella.

¹¹Ninna o Abrahameskri romni, i Sara, patsas, te nai kras o Dewel kowa, hoi job lenge penas. An lakro tselo djipen nai las li kek ternepen. Un kanna, kai his li phuri, penas o Dewel, te lell li i tchawes. Joi patsas les, un las i soor, te lell li i tchawes.

¹²Har o tchawo boldo was, his o Abraham ninna jaake phuro, te nai wals lo buder gar o dad i tchawestar. Un job was o dad bud bud menshendar. Leskre tchawe, tchawengre tchawe un lauter, kai pal leste wan, wan jaake bud har i bolepangre momlia, un har i tikne barra pash o baro pani, kai kek djinell, har bud kolla hi.

¹³Kol phure patsle meran lauter. Ninna te lan le kowa gar, hoi kamas o Dewel len te dell, patsan le, te lenn le les. Jon dikan kowa dur glan pende, un his bachtelo pral kowa. Jon penan pendar, te hi len kek them ap i phub, un te hi le kate gar khere.

¹⁴Kolla, kai jaake rakrenna, rodenn i wawar them, hoi lengro hi, un kai jon khere hi.

¹⁵Te rakrans le pral ko them, hoi jon mukan, palle nai djans le kote pale.

¹⁶Kowa kran le gar. Na-a. Lengro dji das gole pal i latcheder them. Kowa hi an o bolepen. Doleske ladjell o Dewel lenge gar, te penenn le: “Maro Dewel!” ap leste. Un job kras lenge i foro.

¹⁷Tumer djinenna: An o phuro tsiro kamas o Dewel te dikell, har baro o Abrahameskro patsepen hi. Un o Dewel penas ap leste, te marell job peskro tchawes har i bakro, hoi o Debleske maredo wella. Un o Abraham shunas ap o Debleste, un las peskro tchawes, kai leske kokres boldo was, te marell lo les glan o Debleste. Glan kau tsiro penas o Dewel ap o Abrahameste: Tiro tchawo, o Isaak, hi o dad kolendar, kai pal tute wenna.[38]

¹⁸

¹⁹Kolla laba wan o Abrahameske an o shero un job penas peske: O Dewel nai krell les i mulendar djido. Jaake baro his leskro patsepen ap o Debleste. Doleske das les o Dewel o tchawes pale, un job hunte maras les gar. Kowa his leske jaake, har te wals lo i mulendar djido.

²⁰Ninna o Isaak patsas, te well kowa tchatcho, hoi o Dewel penas. Un o Isaak tchiwas peskre wasta ap peskre tchawende, ap o Jakob un ap o Esau, un rakras i bacht pral lende win, hoi o Dewel len della an ko tsiro, hoi wella.

²¹Ninna o Jakob patsas, te well kowa tchatcho, hoi o Dewel leske penas. Har job ap o merepen tchiddo his, tchiwas lo peskre wasta ap o Josefeskre tchawende, un rakras o Debleskri bacht pral lende win, un tchiwas peskro shero glan tele ap peskro kasht, un sharas o Debles.

²²Ninna o Josef patsas, te well kowa tchatcho, hoi o Dewel penas. Har job ap o merepen tchiddo his, penas lo peskre phralenge, te well ko tsiro, kai djan i Israelitarja dran o them Egiptia win. Palle hunte lenn le leskre kokale lentsa.

²³Ninna o Moseskro dad un peskri dai patsan ap o Debleste. Doleske trashan le gar o baro rajestar pral o them Egiptia, har kowa penas, te wenn i tikne tchawe maredo, hoi i Israelengre djuwja lan. Har o Moseskro dad un peskri dai dikan, har shukar lengro tchawo hi, khatran le les triin tchon.

²⁴Ninna o Mose patsas ap o Debleste. Har job baro was pash o baro rajeste pral o them Egiptia, kamas lo buder gar, te kharenn le les: O baro rajeskri tchakro tchawo. Feteder kamas lo duka ap peste te lell, khetne i wawar Debleskre menshentsa, har te djiwell lo i tikno tsiro i shukar djipen an o rajeskro kheer, kai djiwan le jaake, har o Dewel gar kamas.

²⁵

²⁶O Mose kamas feteder, te lell lo ko praassepen[39] ap peste, hoi ninna o Jesus Kristo ap peste las, har te lell lo o tselo brawlepen an o them Egiptia. Leske his o brawlepen an o bolepen budeder moldo.

²⁷Dran peskro patsepen djas o Mose win dran o them Egiptia, un daras gar o baro rajestar pral o them Egiptia, te well job chojedo ap leste. Na-a. Job rikras jaake ap o Debleste, koles kek nai dikella, har te dikals les lo peskre jakentsa.

²⁸O Dewel penas leske, hawi bibacht pral o them Egiptia wella. Un job penas leske ninna, hoi i Israelitarja hunte krenn, te well koi bibacht gar pral lende. Koi patsas o Mose, te well kowa tchatcho, hoi o Dewel penas. Un o Mose penas ap i Israelitarja, te marenn le bakren, un te chan le len — kau chapen was kharedo Passa — un te makenn le i viechengro rat ap pengre wudja. Har palle o bolepaskro was, te marell lo i tsele phureder tchawen, koi atchan i Israeleskre tchawe djido. Jon his an i khera, kai o rat ap i wudja hi.

²⁹I tsiro koi pre djan le mashkral o baro pani, hoi kharella Lolo Pani, har te djans le ap o drom. Kowa nai kran le doleske, kai patsan le, hoi o Dewel lenge penas. I Egiptarja kaman ninna mashkral o baro pani te djal, un jon tassan.

³⁰I Israelitarja patsan ninna kowa, hoi o Dewel lenge penas, har his le glan o foro Jericho tardo. Un jon djan efta kope trul o foro. Palle peran i tsele barra khetne, hoi trul o foro pre-tchiddo his.

³¹Ninna i lubni Rahab patsas ap o Debleste, un las kol murshen an lakro kheer dren, kolen o Mose bitchras, te dikenn le, har sorelo o foro Jericho hi. Jaake was i Rahab gar maredo khetne kol wawar menshentsa an ko foro, kai prindjran o Debles gar.

³²Hoi te penap tumenge budeder? Jaake bud tsiro hi man gar, te rakrap kol murshendar Gideon, Barak, Simson, Jefta, David, Samuel un kolendar, kai his o Debleskre rakepangre.

³³Kol tsele mursha patsan, hoi o Dewel lenge penas. Mashkral lende his ninna kolla, hoi kuran pen kol bare rajentsa un kol rajengre lurdentsa. Un jon his sorleder har kol bare raja un lengre lurde. Wawar kran o tchatchepen un dikan pengre jakentsa, har kowa tchatcho was, hoi o Dewel lenge penas. Wawar wan glan bare un diwje margodje witsedo, un kolla dandran len gar.

³⁴Wawar wan an i jag witsedo, un i jag nai chatchan len gar. Wawaren kaman i menshe i chareha te marell, un jon nai nashan penge. Kolla, kai kek soor buder an lende his, kolen kras o Dewel soreles. An o kurepen lan le i soor, te tradan le i wawar lurden krik.

³⁵Mashkral kolende, kai patsan, hoi o Dewel lenge penas, his ninna djuwja, kolengre tchawe meran. Kolen das o Dewel lengre tchawen djides pale. Wawar patsle wan phares dino an o stilepen. Lenge was penlo, te mukans le pengro patsepen, nai wans le dran o stilepen win. Un jon mukan gar pengro patsepen, un mukan pen te marell. Pengro tselo djijeha dikan le ap ko tsiro, kai krell o Dewel len i mulendar djido. Kowa his lenge budeder moldo, har o djipen ap kai phub.

³⁶Wawar wan praassedo, un wan i tchupnijah[40] dino. Wawar wan i sasterne shellentsa pandlo, un an o stilepen witsedo.

³⁷Wawar wan i barrentsa mulo witsedo, an kotja tchinlo, un o chareha maredo. Wawar wan palla lino. Len his kek kheer un tchi te chal. Lengre koola his dran bakrengre balla un busjengre balla[41]. Un te wan le tapedo, wan le dino.

³⁸Jon nashan an o mulo them trujel, ninna an i berge un djinan gar, kai te djan le. Mashkral i bare barra khatran le pen, ninna tel i phub. Kolla lauter his latche menshe. I wawar menshe ap kai phub his gar moldo, te djiwan kol latche menshe mashkral lende.

³⁹Kolla lauter patsan ap o Debleste, un job dikas latches ap lende. Fothe latches job ap lende dikas, las gomme kek lendar kowa, hoi o Dewel kamell peskre tchawende te dell.

⁴⁰O Debles his an peskro dji i feteder drom menge. Job kamas gar, te wenn kol phure patsle glan maro tsiro pash leste. Job kamell, te was mer lauter khetne pash leste an o bolepen.