Read O Debleskro Drom - I Bibla an o Romano Rakepen 2021 Hebrearja 3 Bible Online

Hebrearja 3 - O Debleskro Drom - I Bibla an o Romano Rakepen 2021 bible

Hebrearja 3

¹Mire patsle phrala, o Dewel das tumen gole, te djiwenn pash leste an o bolepen. Doleske dikenn ap o Jesuseste, kones o Dewel bitchras, te anell lo i menshen ap leskro drom. Les hi peskro dadeskro wast. Un job hi maro baro rashai[13]. Ap leste patsah mer. Job mangell o Debles menge.

²Koi budi das les o Dewel. Un job kras lat mishto jaake, har ninna o Mose peskri budi o Debleskre menshenge mishto kras.

³O Jesus hi bareder har o Mose. Kowa hi jaake, har te wals i kheer kerdo: Kowa, kai kras ko kheer, well budeder sharedo har ko kheer, hoi kerdo was.

⁴Hako kheer well jekestar kerdo. Un kowa, kai lauter kras, hi o Dewel.

⁵O Mose budras mishto o Debleskre menshenge. Kowa, hoi job kras un penas, sikras lende, hoi o Dewel kamas te krell an ko tsiro, hoi wella. Ninna te budras o Mose mishto, his lo i Debleskro budepaskro.

⁶O Jesus Kristo hi o Debleskro tchawo. Un an leskre wasta hi o Debleskre menshe, ap kolende job mishto garda della. Kolla ham mer, te tchiwah maro tselo patsepen ap leste, un dah gar pre bis te lah o railo djipen pash leste.

⁷Doleske shunenn, hoi o Debleskro Ducho tumenge penella: Tumer te shunenna kau diwes o Debleskro rakepen, palle shunenn ap leste!

⁸Krenn tumaro dji gar har barra jaake, har tumare phure kran an o mulo them, har tchingran le ap o Moseste, un kaman miro drom buder gar te djal!

⁹Ninna te dikan le star-deesh bersha, hoi me, o Dewel, lenge krom, patsan le man gar, un mire laba his lenge tchi moldo.

¹⁰Doleske wom me chojedo ap lende, un penom: Hako tsiro djan le pal pengro shero. Miro drom kaman le gar te djal.

¹¹Jaake chojedo homs ap lende, te dom man sowel, un penom: Jon wenn gar dren an miro them, kai jon pash mande khere nai wans.[14]

¹²Mire phrala, denn jak ap tumare djia, te mukell kek tumendar peskro patsepen, un kamell o djido Deblestar buder tchi te djinell.

¹³Rakrenn hako diwes khetne pral o patsepen, te atchenn pash o Debleste! Ko tsiro, kai rakrell o Dewel ap tumende hi kanna. Te shunenn tumer gar ap o Debleste, nai well i tsiro, kai shunenn tumer buder gar, te dell lo tumen gole.

¹⁴Te rikrah soreles ap maro patsepen ap o Jesus Kristeste jaake rah, har djiwah, palle ham tchatchepah leskre.

¹⁵Doleske hi tchinlo an o Debleskro lab: Kau diwes, te shunenn tumer o Debleskro rakepen, shunenn ap leste, un krenn tumare djia gar har barra, har tumare phure kran, har tchingran le ap o Moseste, un kaman miro drom buder gar te djal![15]

¹⁶Penenn mange: Koon his kolla, kai shunan o Debleskro rakepen, un kaman buder gar ap leskro drom te djal? Kolla his lauter, kai djan o Moseha win dran o them Egiptia.

¹⁷Pale putchau tumendar: Pral koneste was o Debleskri choli star-deesh bersha? Leskri choli was ap kolende, kai kaman buder gar ap leskro drom te djal. Kolla meran an o mulo them, un atchan kote tchiddo.

¹⁸Kanna penenn mange: Pral koneste rakras o Dewel, har job pes sowel das, te wenn le gar an leskro them, kai jon hako tsiro khere wans? Job rakras kolendar, kai shunan gar ap leste.

¹⁹Jaake dikah mer: Kolla, kai patsan gar, hoi o Dewel penas, hi kolla, kai wan gar an o Debleskro them dren.