Read O Debleskro Drom - I Bibla an o Romano Rakepen 2021 Hebrearja 8 Bible Online

Hebrearja 8 - O Debleskro Drom - I Bibla an o Romano Rakepen 2021 bible

Hebrearja 8

¹Kowa hunte djinenn tumer: Men hi i baro rashai, kowa hi o Jesus Kristo. An o bolepen hi lo beshdo ap i tchatchi rig o Deblestar.

²Kote budrell lo o Debleske an o tchatcho Debleskro kheer, hoi kras o Dewel, un kek mensho.

³Hako baro rashai ap i phub hunte anell o Debleske marede viechen, un wawar latcho koowa. Ninna maro rashai, o Jesus, hunte anell tchomone o Debleske.

⁴Kate ap kai phub wals lo kek rashai. Ap i phub hi kol rashaja, kai anenn o Debleske latcho koowa jaake, har an o Moseskre lila tchinlo hi.

⁵Ko kheer, kai jon budrenna, un kowa, hoi jon krenna, sikrell men i tikno kotar dran koi tseli budi, hoi krell maro baro rashai, o Jesus Kristo, an o bolepen. Kowa dikah kanna gomme gar lauter. Har kras o Mose o Debleske i kheer dran viechengre balla an o mulo them, penas o Dewel leske, har te krell lo les un penas: Kowa lauter, hoi tu kreh, kre jaake, har me sikrom les tute ap i berga![23]

⁶Maro baro rashai hi o Jesus. Koleste das o Dewel i feteder budi har kol rashajende ap i phub. Job hi ninna maro rakepaskro, kai kras menge i newo drom, kai nai wah pash o Debleste. Kau newo drom hi feteder har o phuro drom, hoi o Mose sikras. Ap kau newo drom djiwah nai tchatchepah o Debleha khetne, jaake har job kowa menge penas.

⁷Te nai wams ap o phuro drom pash o Debleste, hunte rodals o Dewel kek newo drom.

⁸Job dikas, kai kol menshe, kolengre phure o Israel un o Juda his, gar jaake djiwan, har job lenge penas. Koi penas lo: Ko tsiro wella, kai sikrau len i newo drom, te wenn le mantsa khetne.

⁹Kau newo drom hi gar jaake, har ko phuro drom, hoi sikrom lende ap ko diwes, kai taprom lengre phuren ap i wasta, te anap len dran o them Egiptia win. Har atchan le gar ap miro drom, mukom len.

¹⁰Ap ko tsiro, hoi wella, penell o Dewel, rakrau pale lentsa, un anau len ap o newo drom. Me tchiwau miro tchatchepen an lengre shere, un tchinau mire laba an lengre djia. Un me hom lengro Dewel, un jon hi mire menshe.

¹¹Kek hunte penell ap peskro phraleste, witar gar ap koleste, kai djiwell pash leste: Tu hunte hatsess o Debles! Hakeno djinella, koon me hom. I tikne un i bare prindjrenn man.

¹²Un me bistrau lengri doosh, hoi jon ap pende anan. Ko tchilatchepen, hoi jon kran, well buder gar an miro shero.[24]

¹³Te penell o Dewel kate: Me krau i newo drom, jaake hi kowa, hoi job o Moseha win kras, i phuro drom. Un kowa, hoi hi phuro un buder tchi moldo, well krik lino.