Read O Debleskro Drom - I Bibla an o Romano Rakepen 2021 Jakobo 1 Bible Online

Jakobo 1 - O Debleskro Drom - I Bibla an o Romano Rakepen 2021 bible

Jakobo 1

¹Kau liil tchinau me, o Jakobo, kowa, kai budrell o Jesus Kristeske un o Debleske. Me penau latche laba kolenge, kai patsenn ap o Jesus Kristeste un djiwenn mashkral kolende, kai gar patslo hi.

²Mire phrala, te well pharo koowa ap tumende, palle dikenn koi pre, har te well kowa i bacht tumenge.

³Te well sawo koowa ap tumende, un tumer mukenn gar tele te patsenn ap o Jesus Kristeste, palle wenn tumer sorleder an o patsepen un denn gar sik pre.

⁴Rikrenn win, un djan dureder an o patsepen! Ma atchenn tardo! Jaake wenn tumer sawe menshe, har kamell o Dewel dran tumende te krell. Un tumer krenna lauter, hoi mishto un latcho hi. Un kek doosh hi ap tumende.

⁵Te djinell jek tumendar gar, hoi o Dewel lestar kamella, palle nai mangell lo o Debles, te sikrell job leste kowa. O Dewel hi latcho, un job dell o djijestar, ninna te weh tu bud kope pash leste.

⁶Tu te mangeh, hunte patsess, kai leh kowa ninna. Te patseh tu kowa gar, hal tu har i pani, kai phurdell i sorelo ducho pral un tradell les kate te kote.

⁷Tu te hal jaake, djiness, kai leh tu tchi o Deblestar.

⁸Palle hi tut dui djia, un djineh gar, hoi kameh, witar gar, hoi hunte kress.

⁹I tchorwelo patslo, kai pash i menshende tchi molella, kowa nai sharell pes, kai job pash o Debleste bud molella.

¹⁰I brawelo hunte sharell pes gar pral peskro brawlepen. Job hunte djinell, te atchell lo gar. Har i bluma an o senlepen merell lo.

¹¹O kham djal pre un chatchrell o senlepen. Un koi bluma perell tele, un nashrell peskro shukapen. Jaake har koi bluma, jaake merella ninna ko brawelo ap peskro drom.

¹²Bachtelo hi kowa, koon mukell gar peskro patsepen, ninna te well i pharo koowa ap leste. Job hi moldo, te lell lo ko djipen, hoi gar pre-herella. Kawa djipen dell o Dewel kolen, kai les kamenna.

¹³Te well jek an sawo koowa, hoi kamell les o tchatcho dromestar tele te anell, hunte penell lo gar: “Ko koowa well o Deblestar.” Kek nashte anell o Debles o tchatcho dromestar tele. Un ninna o Dewel anell kekes o tchatcho dromestar tele.

¹⁴Te mukah mer o tchatcho drom, hi men kokres doosh. Ko tchilatcho koowa, hoi an maro shero trujel djal, kowa well mendar.

¹⁵Te shunah ap maro shero, krah mer ko tchilatcho koowa. Un te was ko tchilatcho koowa baro, anell kowa menge o merepen.

¹⁶Mire kamle phrala! Ma chochenn tumen kokres!

¹⁷Lauter, hoi hi mishto un latcho, wella o Deblestar an o bolepen. Job kras o kham un o tchon un i bolepangre momlia. Kolla krenn, te well diwes un rat, un jon wenn jek tsiro diklo un i wawar tsiro gar diklo. O Dewel hi gar jaake. Job atchell, har job hi.

¹⁸Job kamas, te wam mer leskre tchawe. Kolla wam, har menge leskro tchatcho lab penlo was. Jaake wam mer o feteder mank lauter, hoi o Dewel kras.

¹⁹Mire kamle phrala, djinenn: Hako mensho hunte lell peske tsiro, te shunell lo. Job te kamell te rakrell, palle hunte putchell lo pestar, te hi kowa mishto, hoi job kamell te penell. Un job hunte well witar gar sik chojedo.

²⁰Kek krell an i choli kowa, hoi o Dewel kamella.

²¹Doleske mukenn hako djunglepen un tchilatchepen! Un patsenn ko lab, hoi o Dewel an tumende tchiwas! Krenn kowa i latcho djijeha! An o Debleskro lab hi koi soor, te lell lo tumen dran o tchilatchepen un o merepen win.

²²Hi gar doha, te shunenn leskro lab. Tumer hunte krenn, hoi ko lab penella. Tumer te krenn kowa gar, palle chochenn tumen kokres.

²³Kowa, kai shunell o Debleskro lab, un krell gar, hoi ko lab penella, kowa hi har i mensho, kai dikell pes an i dikepaskri[1].

²⁴Job dikell jek kopo dren, un djal peske, un bistras sik, har job wi-dikella.

²⁵Koon dikell pale un pale an o Debleskro latcho lab, hoi i menshen win lella dran lengro phuro djipen, ko mensho bistrell gar, hoi job dikas un shunas. Un kowa krella, hoi ko lab penella. Koles dell o Dewel peskri bacht an lauter, hoi job krella.

²⁶Te penell i mensho: “Me djiwau pal o Debleskro lab,” un job rikrell peskro mui nai gar, kowa chochell pes kokres. Un kowa, hoi job o Debleske krella, hi tchi moldo.

²⁷Kanna penau tumenge, hoi o Dewel, maro dad, kamella, un hoi hi latcho glan leskre jaka: Krenn latchepen i tchorwele djuwjenge, kolen kek rom buder hi! Krenn ninna latchepen kol tchorwele tchawenge, kolen kek dad un dai buder hi! Ma mukenn tumen dren an ko tchilatcho koowa, hoi i menshe ap kai phub krenna.