Read O Debleskro Drom - I Bibla an o Romano Rakepen 2021 Jakobo 2 Bible Online

Jakobo 2 - O Debleskro Drom - I Bibla an o Romano Rakepen 2021 bible

Jakobo 2

¹Mire phrala, tumer patsenn ap maro rajeste, o Jesus Kristeste. Job hi o rai pral i tsele rajende. Doleske, ma dikenn ap i menshende, koon jon hi, un har brawelo jon hi!

²Hoi krans tumer, te wals jek pash tumende an i kangri, un les wals i sonakaskri gustri ap peskro wast un raile ripja ap peste, un koi wals ninna i tchorwelo an tchorwele ripja dren?

³Un tumer penans ap koleste, kai railo rido hi: “Besh tut kai ap ko shukar beshepaskro,” un ap ko tchorweleste penans: “Atch koi tardo! Tu nai besheh tut ninna ap kai phub!”

⁴Kowa wals jaake, har te penans: “Ko railo hi feteder har ko tchorwelo.” Te dikenn tumer jaake ap tumare phralende, hi kowa tchilatcho.

⁵Shunenn, mire kamle phrala! O Dewel rodas kolen win, kai hi tchorwelo ap kai phub, te wenn le brawelo an o patsepen. Ko tsiro wella, kai djiwenn le leha khetne an o bolepen un lenn leskro brawlepen. Kowa lenna kolla, kai kamenn les o djijestar. Jaake penas les o Dewel.

⁶Har hi kowa pash tumende? I tchorwele hi tumenge tchi moldo. I brawele hi tumenge budeder moldo. Un jon hi kolla, kai rikrenn tumen tele, un anenn tchilatcho koowa ap tumende un anenn tumen glan i tchatchepangre.

⁷Un pral koleste, koon tumaro rai hi, rakrenn le djungeles.

⁸O Jesus Kristo hi maro baro rai un penell menge: Tu hunte wess jaake latches ap o wawareste har hal latcho ap tute kokres! Jaake hi tchinlo an o Debleskro lab.[2] Te djiwenn jaake, palle krenn tumer, hoi mishto hi.

⁹Tumer te dikenn ap jekeste, koon job hi un har brawelo job hi, palle lenn tumer doosh ap tumende. Un o Debleskro lab penell tumenge, kai mukan tumer o Debleskro drom.

¹⁰Te rikreh tut ap i tsele laba, hoi an o Moseskre lila tchinlo hi, un te kreh tu jek tchilatcho koowa, palle hi kowa, har te rikrals tu tut ap tchi, un tu leh doosh ap tute.

¹¹O Dewel penella: Romeha, ma choche tiri romjat i wawar djuwjah! Romnija, ma choche tiro romes i wawar mursheha![3] Un job penell ninna: Ma mare kekes! Tu te chocheh gar tiri romjat, un tu mareh jekes, palle mukal tu o Debleskro drom.

¹²Rakrenn un djiwenn pal o Debleskro tchatchepen! Kau tchatchepen lell i menshen dran kowa win, hoi len pandas.

¹³Ma bistrenn! Well jek diwes, kai rakrell o Dewel o tchatchepen win pral tumende. Te hi jekes kek dji i wawareske, koleske hi o Debles witar kek dji. Kones hi i dji i wawarenge, koles hunte well kek daar ap ko diwes, kai rakrell o Dewel o tchatchepen pral i menshende win.

¹⁴Mire phrala, te penell jek, kai job ap o Jesus Kristeste patsella, un krell tchi leske, koleskro patsepen hi tchi moldo ap ko diwes, kai job glan o Debleste tardo hi.

¹⁵Hoi molell kowa, te well pash tumende i phraal, i pheen, kai hi len gar doha ripaske, chapaske un pipaske,

¹⁶un tumer denn len gar, hoi len hunte well djipaske? Palle hi lenge tchi moldo, te penell jek ap lende: “O Dewel hi tumentsa. Job dell tumen chapaske un ripaske.”

¹⁷Tchatchepah, te krenn tumer kek latcho koowa, hi tumaro patsepen mulo.

¹⁸Kanna nai well jek, kai penella: “Jekes hi patsepen un i wawar krell latcho koowa.” Koleske penau me: Sike mande o patsepen kolestar, kai krell kek latcho koowa. Miro patsepen sikrau tute dran kowa, hoi me krau.

¹⁹Tu patseh, kai dell jek Dewel kokres. Mishto, kre kowa! Ninna kol benga[4] patsenn kowa un trashenna.

²⁰Hoske haiweh tu kowa gar? Dikeh tu gar, kai o patsepen ap o Debleste tchi molella, te kreh tu gar, hoi job kamella?

²¹Ninna pash maro phuro dadeste, o Abrahameste, his kowa jaake: Job was latcho un tchatcho glan o Debleste, har job kras, hoi o Dewel lestar kamas: Job tchiwas peskro tchawes ap i pre-tchidde barra[5], te marell lo les o Debleske.

²²Tu dikeh, har job kras, hoi o Dewel lestar kamas, koi sikras lo, kai leskro patsepen ap o Debleste baro his.

²³Kote was tchatcho, hoi an o Debleskro lab tchinlo hi: O Abraham patsas o Debles. Doleske tchiwas les o Dewel an o tchatchepen glan peste.[6] Ninna i menshe penan lestar, kai hi job o Debleskro maal.

²⁴Tumer dikenn kanna, o patsepen kokres hi gar doha. O mensho hunte krell ninna, hoi o Dewel kamella, te well lo tchatcho un erligo glan leste.

²⁵Ninna koi lubni Rahab was tchatcho un erligo glan o Debleste, har joi ko latcho koowa kras. Joi phukras gar ap kol dui bitchepangre dran Israel, kai wan an lakro foro, te dikenn le, har sorelo o foro hi. Joi khatras len, un anas len ap i wawar drom dran ko foro win.

²⁶Jaake har o mensho mulo hi, te hi les kek ducho, jaake hi maro patsepen mulo, te krah kek latcho koowa.