Read O Debleskro Drom - I Bibla an o Romano Rakepen 2021 1. Petro 5 Bible Online

1. Petro 5 - O Debleskro Drom - I Bibla an o Romano Rakepen 2021 bible

1. Petro 5

¹Kanna rakrau ap kolende, kai hi i phureder mank tumende. Me hom ninna i phureder, un dikom mire jakentsa, har o Jesus Kristo ap o trushel meras. Un ap ko diwes, kai well peskro tselo railepen diklo, hom me ninna pash leste. Tumenge penau soreles:

²Denn garda ap i patslende, kai o Dewel peske khetne anas! Tumer han har i bakrengre. Un o Debleskre tchawe hi har bakre, hoi o Dewel an tumare wasta das. Denn len kowa, hoi len hunte wella, te atchell lengro patsepen djido! Krenn kowa o tselo djijestar! Jaake kamell les o Dewel. Krenn kowa gar, har te wals i phari budi, hoi hunte krenn! Krenn koi budi dran o kamlepen un gar, te wenn tumer plaissedo!

³Ma awenn raja pral i patslende! Sikrenn lende, har tumer djiwenna, te djiwenn jon ninna jaake!

⁴Un ap ko diwes, kai well o pralstuno bakrengro, lenn tumer leskro railepen, hoi atchella hako tsireske.

⁵Kol terne menshenge penau me: Krenn kowa, hoi kol phureder phrala tumenge penenna! Hakeneske penau: Kek te krell, har te well lo bareder har ko wawar! O Dewel hi gar ap i rig kolendar, kai krenn pen bares. Na-a, job hi latches kolenge, kai krenn pen gar bares.

⁶Doleske krenn tumen tikno tel o Debleskro sorelo wast! O Debleskro tsiro wella, kai job tumen bares krella.

⁷Lauter, hoi hi tumen phares ap o dji, witsrenn ap leste! Job krell lauter mishto.

⁸Denn garda, un awenn gar khino! O beng kamell tumen te marell. Un job djal trujel har i diwji bari margodja, hoi hi lat bok, un rodella, kones joi nai chal pre.

⁹Ma krenn, hoi o beng tumendar kamella! Atchenn soreles an o patsepen! Tumer hunte djinenna, kai lenn le tumare phralen un phenja ap i tseli phub ninna jaake palla har tumen.

¹⁰I tikno tsiro well pharo koowa ap tumende. An kau tsiro lenn tumer i soor, te atchenn ap o Debleskro drom. O Dewel, kolestar well o tselo latchepen, job das tumen gole, te djiwenn hako tsiro khetne o Jesus Kristeha un lenn leskro railepen. Job dell tumen ninna i soor, te atchenn soreles an o patsepen un an o djipen.

¹¹I tseli soor hi leske kanna un hako tsiro! Amen!

¹²Maro latcho phraal, o Silwano, was mange ap i rig, te tchinell lo kau tikno liil. An kau liil kamoms te penap tumenge an o dji, te djinenn tchatchepah: O Dewel hi tumenge latcho. Atchenn pash leste!

¹³I patsle, kai wenn khetne an o foro Babilon, penenn tumenge latche laba. Jon wan o Deblestar win rodedo har tumer. Ninna miro tchawo Marko penell tumenge latche laba.

¹⁴Te wenn tumer khetne, denn tumen i tchum, te dikell hakeno, kai tumer phrala un phenja han! O Debleskri bacht tumenge lauterenge, kai djan ap o Jesus Kristeskro drom!