Read O Debleskro Drom - I Bibla an o Romano Rakepen 2021 2. Petro 1 Bible Online

2. Petro 1 - O Debleskro Drom - I Bibla an o Romano Rakepen 2021 bible

2. Petro 1

¹Me, o Simon Petro,[1] tchinau kau liil. Me budrau o Jesus Kristeske un hom leskro bitchepaskro. Me tchinau ap lauterende, kai lan ninna ko patsepen har mer. Ko kutch patsepen, kai tchiwas men an o tchatchepen glan o Debleste, das men maro Dewel un o Jesus Kristo, kai las men dran o tchilatchepen win.

²Me mangau o Deblestar, te dell lo tumen peskro latchepen un peskri bacht an o dji, te prindjrenn les un o Jesuses, maro rajes, feteder!

³Job hi baro un railo, un his menge latcho, un das men pash peste gole. Har lam les an maro dji pre, das men o Dewel an peskri soor halauter, hoi men hunte well, te djiwas maro djipen jaake, har job kamella.

⁴Glan i rah tsiro penas o Dewel i menshenge, te bitchrell lo lenge jekes, kai lell len dran o merepen win, un dell len o Debleskro djipen. Ko baro un kutch koowa kras lo kanna menge. Mer lam o Debleskro djipen un hunte kras buder gar ko djungelo koowa, hoi i menshe ap kai phub jaake kamenna, un hoi anell lenge o merepen.

⁵Doleske tchiwenn tumaro tselo dji koi pre, te well pash tumaro patsepen ninna i djudjo djipen. Koon i djudjo djipen djiwella, haiwell, hoi o Dewel lestar kamella.

⁶Koon haiwas, hoi o Dewel lestar kamella, kowa rikrell pes lauterestar pale, hoi leske gar mishto hi. Koon rikrell pes lauterestar pale, hoi leske gar mishto hi, kowa rikrell soreles ap kowa, hoi latcho hi. Koon kowa krella, kamell o Debles.

⁷Koon o Debles kamella, koles hi ninna i dji peskre phralenge un phenjenge. Kones i dji hi peskre phralenge un phenjenge, kowa kamell ninna i tsele menshen ap kai phub.

⁸Te krenn tumer kowa lauter, un djan dureder ap kau drom, palle prindjrenn tumer maro rajes, o Jesus Kristes, budeder un feteder.

⁹I patslo, kai krell kowa gar, kowa hi korelo[2], un djiwell an o tamlepen[3]. Job bistras, kai was leskri tseli doosh[4] lestar krik lino, hoi job kras.

¹⁰Mire phrala, o Dewel das tumen gole, un rodas tumen win, te wenn tumer leskre tchawe. Doleske djiwenn jaake tumari tseli sorjah, te atchenn pash leste! Te djiwenn tumer jaake, perenn tumer gar o Debleskro dromestar tele.

¹¹Un o Dewel lell tumen latches pash peste an o bolepen pre, kai hi maro rai, o Jesus Kristo, o rai hako tsiro, — job, kai las men dran i tseli bibacht win.

¹²Ninna te djinenn kowa lauter, un han sorelo tardo an o tchatcho patsepen, penau tumenge kowa pale te pale.

¹³Me patsau, hi mishto tumenge, te penap tumenge kowa jaake rah, har me djiwau, te bistrenn tumer kowa gar, un te wenn gar khino, te krenn kowa lauter.

¹⁴Me djinau, kai merau an i tikno tsiro. Maro rai, o Jesus Kristo, penas kowa mange.

¹⁵Doleske tchinau me lauter pre, te bistrenn gar, hoi me tumenge penom.

¹⁶Mer penam tumenge, te well maro rai, o Jesus Kristo, i bari sorjah pale. Kowa hi kek gosewi parmissa. Na-a. Mer dikam leskro baro railepen mare jakentsa.

¹⁷O Dewel, leskro dad, das les peskro baro railepen un sharas les, har job dran o bolepen ap leste penas: “Kawa hi miro tchawo, koles me o djijestar kamau. Job krell man bachtelo.” [5]

¹⁸Ko rakepen shunam mer dran o bolepen, har hams leha khetne ap koi Debleskri berga.

¹⁹Doleske djinah mer tchatchepah, kai kowa tchatcho hi, hoi o Debleskre rakepangre penan. Tumer krenna mishto, te denn garda koi pre. Ko lab hi har i momeli, hoi chatchella an i rat, bis te well o diwes. Palle djal i raili momeli an tumare djia pre.

²⁰Un kowa hunte djinenn tumer: Kek Debleskro rakepaskro rakras nai pestar Debleskre laba.

²¹An kek tsiro was o Debleskro lab i menshendar. Kol Debleskre rakepangre rakran, hoi o Dewel lenge penas. Kowa tchiwas lenge o Debleskro Ducho an o dji.