Read O Debleskro Drom - I Bibla an o Romano Rakepen 2021 1. Johanni 1 Bible Online

1. Johanni 1 - O Debleskro Drom - I Bibla an o Romano Rakepen 2021 bible

1. Johanni 1

¹Mer tchinah tumenge pral koleste, kai his hako tsiro koi. Mer shunam les, un dikam les. Awa, mer dikam les mare jakentsa, un tapram les mare wastentsa. Job hi ko lab, hoi o djipen della.

²Awa, ko djipen was pash mende, un sikras pes mende. Mer dikam les. Doleske rakrah mer kolestar, kai dikam un shunam. Un mer penah tumenge, koon ko djipen della, hoi gar pre-herella.[1] Kowa his pash peskro dadeste an o bolepen, un was pash mende.

³Kowa, hoi mer dikam un shunam, penah mer tumenge, te nai was mer tumentsa khetne an o tchatchepen. Un tchatchepah, mer ham khetne o Debleha, kai hi maro dad an o bolepen, un leskro tchaweha, o Jesus Kristeha.

⁴Kowa lauter tchinah tumenge, te wenn mare djia un tumare djia pherdo bacht.

⁵Kowa, hoi tumenge penah, shunam o Jesus Kristestar. Lestar shunam, kai hi lauter latchepen an o Debleste. Un kek tchilatchepen hi an leste. O Dewel hi har o diwes un kek tamlepen[2] hi an leste.

⁶Mer te penah, te ham khetne o Debleha, un djiwah an o tchilatchepen, palle ham chochene, un djiwah gar pal o tchatchepen.

⁷Mer te djiwah khetne o Debleha an o tchatchepen, jaake har o Dewel an o tchatchepen tardo hi, palle nai ham mer ninna lauter khetne an o tchatchepen. Un o rat leskro tchawestar thowell mari tseli doosh mendar tele.

⁸Mer te penah: “Men hi kek doosh an maro djipen”, jaake chochah men kokres, un mer ham gar an o tchatchepen tardo.

⁹Mer te mangah men tele glan o Debleste, un penah leske, hawi doosh[3] mer ap mende lam, palle krell lo, hoi job penas un lell i doosh mendar krik. Job hi latcho un tchatcho un thowell o tselo tchilatchepen mendar tele.

¹⁰Mer te penah, kai lam kek doosh ap mende, palle krah, har te wals o Dewel i chocheno[4]. Un mer djiwah gar pal leskro lab.