Read O Debleskro Drom - I Bibla an o Romano Rakepen 2021 Tchatchepangre 10 Bible Online

Tchatchepangre 10 - O Debleskro Drom - I Bibla an o Romano Rakepen 2021 bible

Tchatchepangre 10

¹Un pal o Abimelech stas i mursh pre, te lell lo o Israel win dran i tchilatche wasta. Kowa his o Tola. Leskro dad his o Puwa, un koleskro dad his o Dodo i menshendar Issachar. O Tola djiwas an o foro Shamir an i berge Efrajim.

²Un job his 23 (biish-te-triin) bersha o tchatchepaskro rai pral o Israel. Un palle meras lo, un was paskedo an o foro Shamir.

³Un pal leste stas o Jair pre. Kowa hi i menshendar Gilead. Un job his 22 (biish-te-dui) bersha o tchatchepaskro rai pral o Israel.

⁴Un koles his trijanda mursh tchawe, kai ap trijanda burike[29] klissan. Un len his trijanda forja. Kolla his an o them Gilead un kharenn gomme kau diwes: Jaireskre forja.

⁵Un o Jair meras, un was an o foro Kamon paskedo.

⁶Un i Israelitarja kran pale kowa, hoi tchilatches his glan o baro Debleskre jaka. Un jon mangan i wawar deblen an: ko debles, kai kharell Baal, un i debletsa, kai kharell Astarte, un kol deblen, kai mangenn kol menshe an, kai djiwenn an Syria, an Sidon, an Moab, an Ammon un an Filistia. Un i Israelitarja mukan o baro Debles un mangan les buder gar an.

⁷Kote chatchas i bari choli pre an o baro Debleste ap i Israelitarja. Un job das len an i wasta i menshendar dran i themma Filistia un Ammon.

⁸Un 18 (deesh-te-ochta) bersha lan jon kol Israelitarjen palla, kai djiwenn ap i wawar rig o panjestar Jordan an o them Gilead, kai i Amorarja djiwan, un kran lenge o djipen phares.

⁹Un i Ammonarja djan pral o Jordan, te marenn le pen i menshentsa dran Juda, Benjamin un Efrajim. Un jaake was i bari daar pral o Israel.

¹⁰Un kote dan i Israelitarja ap o baro Debleste gole un penan: “Mer kram tchilatchepen ap tute, te mukam tut, maro Debles, un mangam o debles Baal an.”

¹¹Un o baro Dewel penas ap lende: “Hi gar jaake, te rikran tumen i Egiptarja tele un i Amorarja, i Ammonarja, i Filistarja,

¹²i Sidonarja, i Amalekarja un i Maonarja? Un har tumer ap mande gole dan, lom me tumen dran lengre wasta win.

¹³Un tumer, hoi kran tumer? Tumer mukan man un mangan wawar deblen an. Doleske kamau tumen buder gar win te lell dran i wasta kolendar, kai tumen tele rikrenn.

¹⁴Djan koi un denn ap kol deblende gole, hoi tumer tumenge win rodan, te wenn kolla tumenge ap i rig an ko tsiro, kai tumaro djipen pharo hi.”

¹⁵I Israelitarja penan ap o baro Debleste: “Mer lam bari doosh ap mende! Kre tu mentsa, har tu kameh. Kokres kau jek kopo le men gomme win dran kolengre wasta!

¹⁶Un jon witsran kol wawar deblen pendar krik un mangan o baro Debles an. Koi khaitas les, te well o Israeleske jaake pharo kerdo.”

¹⁷Un i Ammonarja wan khetne gole dino, un tchiwan pengre plachtene khera pre pash o foro Gilead. Un i Israelitarja wan khetne pash Mizpa.

¹⁸Un i pralstune pral kol Israelitarja, kai djiwenn an Gilead, penan jek ap o wawareste: “Koon hi ko mursh, kai glan win djal, te marell lo pes i lurdentsa dran o them Ammon? Kowa te well o pralstuno pral lauterende, kai djiwenn an Gilead.”