Read O Debleskro Drom - I Bibla an o Romano Rakepen 2021 Tchatchepangre 12 Bible Online

Tchatchepangre 12 - O Debleskro Drom - I Bibla an o Romano Rakepen 2021 bible

Tchatchepangre 12

¹Un i mursha dran Efrajim wan khetne gole dino. Un djan wergel o pani Jordan, un dureder pre pash o foro Zafon. Un penan ap o Jefta: “Hoske djal tu an o kurepen, te kuress tut i Ammonentsa? Un men mukal gar gole te dell, te djas tuha? Doleske chatchrah tiro kheer khetne tuha pre!”

²Kote penas o Jefta ap lende: “Men his i pharo kurepen i Ammonentsa, man un mire menshen, un me mukom tumen gole te dell. Un tumer wan gar ap miri rig.

³Un har dikom, te wenn tumer gar, kote hunte dom kokres ap mande jak un djom koi, te kurap man lentsa. Un o baro Dewel das len an miro wast. Un hoske djan tumer kau diwes pash mande pre, te marenn tumen mantsa?”

⁴Un o Jefta mukas i murshen dran Gilead khetne te well. Un jon maran pen i murshentsa dran Efrajim. Un i mursha dran Gilead dan i murshen dran Efrajim. [Glan i tsiro penan i mursha dran Efrajim: Tumer dran Gilead han tchi har naashepangre, kai nashan penge dran o them Efrajim an o them Manasse. Tumaro them Gilead hi tchiddo mashkral Efrajim un Manasse.]

⁵Un i mursha dran Gilead lan kol platse dren, kai nai djan le wergel o Jordan an o them Efrajim. Un hako kopo te was i Efrajimari, hoi ap o naashepen his, un penas “Muk man wergel te djal!” palle putchan i mursha dran Gilead lestar: “Hal tu i Efrajimari?” Un te penas lo “na-a”,

⁶palle penan le ap leste: “Pen Shibbolet!” Un te nai rakras lo les gar tchatches win un penas “Sibbolet”, palle lan le les, un dan les kote pash o Jordan mulo. Un jaake wan an ko tsiro 42.000 (star-deesh-te-dui serja) mursha dran Efrajim mulo dino.

⁷Un o Jefta dran Gilead his shob bersha o tchatchepaskro rai pral o Israel. Un job meras un was paskedo an jek kol forjendar an o them Gilead.

⁸Un pal leste was o Ibzan dran Betlehem o tchatchepaskro rai pral o Israel.

⁹Un koles his trijanda mursh tchawe un trijanda tcha. Peskre tchen das lo romende, kai gar leskre menshendar his. Un leskre mursh tchawenge las lo trijanda romjen, kai ninna gar leskre menshendar his. Un efta bersha his job o tchatchepaskro rai pral Israel.

¹⁰Un o Ibzan meras un was paskedo an o foro Betlehem.

¹¹Un pal leste was o Elon dran o kheer Sebulon o tchatchepaskro rai pral o Israel un kras deesh bersha o tchatchepen pral i Israelitarja win.

¹²Un har lo meras, was lo paskedo an o foro Ajalon an o them Sebulon.

¹³Un pal leste was o Abdon o tchatchepaskro rai pral o Israel. Leskro dad his o Hillel dran o foro Piraton.

¹⁴Un koles his star-desha mursh tchawe un trijanda tchawengre tchawe. Un kolla klissan ap 70 (efta-desha) burike[30]. Un job kras o tchatchepen pral o Israel ochta bersha win.

¹⁵Un har meras lo, was lo paskedo an o foro Piraton an o them Efrajim an ko pralstuno them, kai glan kowa i Amalekarja djiwan.