Read O Debleskro Drom - I Bibla an o Romano Rakepen 2021 Tchatchepangre 13 Bible Online

Tchatchepangre 13 - O Debleskro Drom - I Bibla an o Romano Rakepen 2021 bible

Tchatchepangre 13

¹Un i Israelitarja kran pale, hoi tchilatches hi glan o baro Debleskre jaka. Un o baro Dewel das len an i wasta i Filistarendar. Un kolla his i raja pral lende star-desha bersha.

²An ko tsiro djiwas i mursh an o foro Zora. Kowa his dran o kheer Dan. Koleskro lab his Manoach. Un leskri romni nai las kek tchawen.

³Un o bolepaskro o baro Deblestar mukas pes latar te dikell un penas ap late: “Tu djineh, te nai leh kek tchawen. Kanna djiness, tu weh wawartchandes un leh i mursh tchawes.

⁴De jak, un ma pi mool, witar kek wawar sorelo pipen! Un ma cha tchomone, hoi pale-tchiddo hi!

⁵Ko tchawes, kai leh, well i mursh, kai o Debleske hi peskro tselo djipen fun ko diwes, kai well lo ap i phub. Leskre balla wenn gar tchinlo. Un job lell o Israel win dran i wasta i Filistarendar.”

⁶Un koi djuwel djas pash peskro romeste un penas ap leste: “I Debleskro mursh was pash mande. Un job dikas win har i bolepaskro o Deblestar, jaake te lom daar. Un doleske putchom me lestar witar gar, kai job wella. Un job penas mange gar, har job kharella.

⁷Job penas ap mande: ‘Tu weh wawartchandes un tu leh i mursh tchawes. Un kanna pi kek mool un kek wawar sorelo pipen! Un cha tchi, hoi pale-tchiddo hi. Tiro tchawo well i mursh, kai o Debleske hi fun tiknes pre bis te merell lo.’”

⁸Kote mangas o Manoach o baro Debles un penas: “Miro rai, mangau tut, bitche gomme jek kopo ko Debleskro murshes pash mende, koles tu menge bitchral, te sikrell lo men, har mer ko tchaweha, kai boldo well, trujel hunte djas.”

⁹Un o Dewel shunas, hoi o Manoach lestar mangas. Un o bolepaskro o Deblestar was pale pash koi djuwel, har li win beshdo his ap i hachetikri phub. Un lakro rom, o Manoach, his gar pash late.

¹⁰Kote nashas li sik pash peskro romeste, un penas ap leste: “Dik, ko mursh hi pale kai, kowa, kai ko wawar diwes pash mande was.”

¹¹Kote kras pes o Manoach pre, un djas pal peskri romjate, was pash ko mursheste un penas ap leste: “Hal tu ko mursh, kai miri romjah rakras?” Un kowa penas: “Me hom kowa!”

¹²Un o Manoach penas: “Te well kowa jaake, har tu les penal, hoi hunte kras pale leha? Hoi nai krell lo, un hoi nai krell lo gar?”

¹³Kote penas o bolepaskro o baro Deblestar ap o Manoach: “Kolestar lauterestar, hoi tiri romjake penom, hunte rikrell li pes pale:

¹⁴Lauterestar, hoi ap o drakengro ruk bares was, chal li tchi. Un mool un sorelo pipen pijell joi gar. Un pale-tchiddo chapen chal li gar. Kawa lauter, hoi lake penom, hunte rikrell li.”

¹⁵Un o Manoach penas ap o bolepaskro o baro Deblestar: “Mangau tut, atch i tikno tsiro, bis te kram tuke i terni busni chapaske.”

¹⁶O bolepaskro o baro Deblestar penas ap o Manoach: “Ninna te rikrals man kai, me chaus tiro chapen gar. Tu te kameh, nai chatchreh koi busni o baro Debleske.” O Manoach haiwas gomme gar, te hi lo o bolepaskro o baro Deblestar.

¹⁷Un o Manoach penas ap leste: “Har khareh tu? Te well kowa jaake har tu les penal, palle kamah men pash tute te parkrell.”

¹⁸O bolepaskro o baro Deblestar penas ap leste: “Hoske putcheh tu pal miro lab? Kowa hi i lab, hoi well gar kharedo.”

¹⁹Kote las o Manoach i tikni busni, un koi pashel maro, maras lat, un chatchras i busni un o maro ap i baro bar o baro Debleske, kai sorelo koowa krella. Un o Manoach un leskri romni his koi pashel tardo un dikan kowa.

²⁰Un har i jag ap o bar pre djas an o bolepen, koi djas o baro Debleskro bolepaskro ninna pre an koi jag. Un o Manoach un leskri romni dikan kowa, un witsran pen ap i phub ap pengro mui.

²¹Kanna haiwas o Manoach: Kowa his o bolepaskro o baro Deblestar. Un pal kowa dikan le les buder gar.

²²Un o Manoach penas ap peskri romni: “Kanna hunte meras! Mer dikam o Debles!”

²³“Na-a”, penas leskri romni, “te kamals o baro Dewel men te marell, palle lals lo gar ko vieches un ko maro dran maro wast, hoi leske dam un leske chatchram. Un job sikrals men gar kawa lauter, hoi dikam, un penals menge gar kanna sawo koowa.”

²⁴Un koi romni las i mursh tchawes, un das les o lab Simson. Un ko tchawo was baro, un o baro Dewel tchiwas peskri bacht ap leste.

²⁵Un o ducho o baro Deblestar was ap leste o ersto kopo, har his lo ap i platsa Machaneh-Dan mashkral i forja Zora un Eshtaol.