Read O Debleskro Drom - I Bibla an o Romano Rakepen 2021 Tchatchepangre 14 Bible Online

Tchatchepangre 14 - O Debleskro Drom - I Bibla an o Romano Rakepen 2021 bible

Tchatchepangre 14

¹Un o Simson djas tele an o foro Timna. Un kote dikas lo i rakli i Filistarendar.

²Har was lo khere, penas lo ap peskro dadeste un peskri date: “Me dikom an Timna i rakjat i Filistarendar. Kolat lenn mange, te well li miri romni!”

³Kote penas leskro dad un leskri dai ap leste: “Hi mank tire tsele menshende kek tchai tuke? Hatseh kek romni mank i tsele Israelitarja, te hunte djas tu pash i Filistarja, un less tuke i romni kolendar, kai gar tchinlo hi ap pengro mass?” O Simson penas ap peskro dad: “Koja le mange! Joi hi i shukar an mire jaka.”

⁴Leskro dad un leskri dai haiwan gar, te was kowa o baro Deblestar, kai i drom rodas, te nai perell lo ap i Filistarja. Kolla his i raja pral o Israel an ko tsiro.

⁵Un o Simson djas peskro dadeha un peskri dai tele an o foro Timna. Un har wan le pash i drakengre ruka glan o foro Timna, stas i terno lewo bari goljah ap leste.

⁶Un o baro Debleskro ducho was pral o Simsoneste. Un peskre wastentsa phagas lo o lewes an kotja, har te wals kowa i busni. Peskro dadeske un peskri dake penas lo tchi kolestar.

⁷Un job djas tele an o foro, un rakras koi rakjah. Un an leskre jaka his joi shukar.

⁸Un pal i tsiro djas job pale an Timna, te romedinerell lo lat. Un job djas tele o dromestar, te dikell lo, hoi ko mulo lewestar was. Kote his an ko mulo lewo biene un gwin[31].

⁹Un job las o gwin an peskro wast, un chas les ap o drom pash o djapen. Un har job pash peskro dadeste un peskri date was, das lo len ninna kolestar, te chan le. Kai las lo ko gwin dran o mulo lewo, penas lo lenge gar.

¹⁰Un leskro dad djas tele an o foro, pash koi terni rakjate. Un o Simson kras kote i baro chapen, har i terne mursha kran kowa jaake an ko tsiro.

¹¹Un har i mursha les dikan, rodan le trijanda terne murshen win, te djan jon leha.

¹²Un o Simson penas ap lende: “Me kamau tumen tchomone phares te putchell un dikell, koon kowa djinella. Un te hatsenn kowa an kal efta diwessa win, kai chah un pijah khetne, palle dau me tumen trijanda laintikre gada, un trijanda shukar ripja.

¹³Te hatsenn kowa gar win, palle hunte denn tumer man kol trijanda laintikre gada un trijanda shukar ripja.” Un jon penan: “Awa, jaake well! Muk kanna te shunell, hoi jaake phares hi!”

¹⁴Un job penas: “Dran koleste, kai i chapaskro his, was tchomone win chapaske. Un dran o sorelo was gudlepen win.” Un jon djinan gar, hoi kowa hi. Triin diwessa rodan le, un djinan les gar.

¹⁵Un ap o eftato diwes penan le ap o Simsoneskri romni: “Rake shukar tiro romeha, te penell lo menge, hoi kal phare laba kamenn te penell! Te kreh kowa gar, chatchrah mer tut un tiro dadeskro kheer. Penan tumer, te was mer pash tumaro chapen, te krenn men tchorwelo?”

¹⁶Kote rowas i Simsoneskri romni ap leste un penas ap leste: “Tu kameh man gar, un nai dikeh man gar glan i jaka. Mire menshendar putchal tchomone phares, un mange penal tu gar, hoi kowa kamell te penell.” Un job penas: “Dik, miro dadeske un miri dake penom kowa gar. Hoske penap les tuke?”

¹⁷Un joi rowas glan leste kol efta diwessa, kai chan un pijan le khetne. Un ap ko eftato diwes rikras lo kowa buder gar win, un penas lake, hoi leskre laba kamenn te penell. Un joi penas les i terne murshenge lakre menshendar.

¹⁸Un ap o eftato diwes, glan o tsiro kai o kham tele djas, penan i mursha dran o foro ap leste: “Hoi hi gudleder har gwin? Un hoi hi sorleder har o lewo?” Un job penas ap lende: “Te lans gar miri terni grumni, te budrenn ap tumari phub, palle djinans tumer gar, hoi mire laba kamenn te penell.”

¹⁹Un o baro Debleskro ducho was pral leste. Un job djas tele an o foro Ashkelon un das trijanda murshen lendar mulo, un riwas len win, un das kol koola kolen, kai leske penan, hoi peskre laba kaman te penell. Un bari choljah djas lo pale an peskro dadeskro kheer.

²⁰Un leskri romni was leskro feteder maleste dino.