Read O Debleskro Drom - I Bibla an o Romano Rakepen 2021 Tchatchepangre 15 Bible Online

Tchatchepangre 15 - O Debleskro Drom - I Bibla an o Romano Rakepen 2021 bible

Tchatchepangre 15

¹Pal i tsiro, an kol diwessa, kai anan le o djob dren, djas o Simson pash o kheer, kai leskri romni hi, un anas lake i terni busni peha. Un job penas: “Me kamau pash miri romjate an lakri isema.” Un lakro dad mukas les gar,

²un penas ap leste: “Me patsom, te kameh lat buder gar pale. Un me dom lat tiro feteder maleste. Kanna dik, lakri terni pheen hi shukeder har joi. Le kolat!”

³Kote penas o Simson ap leste: “Kau kopo hom gar me, koles doosh hi, te krau i Filistarenge tchilatchepen.”

⁴Un o Simson djas koi, un tapras triin-sheel diwje djukle. Un las i kasht, un pandas hako kopo dui diwje djukle i porjentsa ap ko kasht khetne.

⁵Un chatchras palle ko kasht an. Un mukas kol djukle kote te nashell, kai o djob i Filistarendar tardo hi. Jaake chatchras o djob tele, ninna o djob, hoi khetne lino his. Un i jag djas an i drakengre ruka, un an i djeteskre ruka.

⁶Un i Filistarja putchan: “Koon his kowa?” Un lenge was penlo: “O Simson, kowa kai i tchat o murshestar dran Timna las, un kowa peskri tchat lestar pale krik las, un lat leskro males das.” Kote djan i Filistarja pre, un chatchran lat un lakro dades.

⁷Un o Simson penas ap lende: “Te krenn tumer sawo koowa, palle dau me gar palla, bis te dom tumen lauter pale.”

⁸Un job das len soreles khetne, un djas tele un djiwas an koi barrengri grotta pash Etam.

⁹Un i Filistarja djan pre an o them Juda un tchiwan pengre plachtene khera trul o foro Lehi.

¹⁰Kote putchan i mursha dran Juda: “Hoske djan tumer ap mende pre?” Un jon penan: “Mer kamah o Simsones te pandell, un leha te krell, har job mentsa kras.”

¹¹Kote djan triin serja mursha dran Juda tele pash koi grotta pash Etam, un penan ap o Simson: “Djineh tu gar, te hi i Filistarja pral mende rai? Hoske kral tu kowa mentsa?” Un job penas ap lende: “Jaake har jon les mange kran, jaake krom me les lenge.”

¹²Jon penan ap leste: “Mer ham kai, te pandas tut, un te das tut an i wasta i Filistarendar.” Un o Simson penas ap lende: “Denn tumen sowel, te perenn gar tumer pral mande un denn man temerl.”

¹³Un jon penan ap leste: “Na-a, mer kamah tut te pandell un tut an lengre wasta te dell, un tchi wawares. Mer kamah tut gar mulo te dell.” Un jaake pandan le les dui newe shellentsa. Un anan les le win dran ko barrengri grotta.

¹⁴Un har lo an o foro Lehi was, dan i Filistarja bari gole i bachtjatar. Un o baro Debleskro ducho was pral leste. Un kol shelle trul leskre mussja wan har laintikre thaba, ap kolende jag was, un peran tele.

¹⁵Un job hatsas i mujeskro kokalo i muli eslatar, las les an o wast un das leha 1.000 (jek sero) murshen mulo.

¹⁶Un o Simson penas: “I mujeskro kokalo i eslatar lom, un i sero murshen mulo dom. I mujeskro kokalo i eslatar lom, un i mulen jek ap o wawareste witsrom.”

¹⁷Un har job kowa win rakras, witsras lo ko kokalo dran peskro wast. Un doleske dan le koi platsa ko lab Ramat-Lehi[32].

¹⁸Un les his bari trush, un das ap o baro Debleste gole, un penas: “Tu dal man jaake bari soor, te wom o sorleder pral i Filistarende. Un kanna hunte merap i trushatar, un perau an i wasta kolendar, kai gar tchinlo hi ap pengro mass.”

¹⁹Kote phagas o Dewel o baro bar pash o foro Lehi, un dran kotar was pani[33]. Un job pijas, un leskri soor was pale, un job was pale pherdo djipen. Doleske dan le ko pani, hoi kote dran i phub was, o lab: ‘Pani kolestar, kai gole das’. Ninna gomme kau diwes hi kau pani kote pash o foro Lehi.

²⁰Un an ko tsiro, kai i Filistarja i raja his pral o them, his o Simson biish bersha o tchatchepaskro rai[34] pral o Israel.