Read O Debleskro Drom - I Bibla an o Romano Rakepen 2021 Tchatchepangre 16 Bible Online

Tchatchepangre 16 - O Debleskro Drom - I Bibla an o Romano Rakepen 2021 bible

Tchatchepangre 16

¹Un o Simson djas an o foro Gaza, un kote dikas lo i lubni. Pash kolate djas lo dren.

²Un i menshe an Gaza shunan, kai hi o Simson pash lende. Un jon tchiwan pen trul koi platsa tchorchanes pash o foreskro wudar, te nai taprenn le les. I tseli rat rikran le pen pale un penan penge: “Mer rikrah men pale, bis te o kham pre djala, un palle dah les mulo.”

³Un o Simson his koi tchiddo bis mashkral an i rat. Un palle stas lo pre. Un job tapras kol dui wudja, hoi khetne o foreskro wudar hi, un hadas len win, khetne i rigjentsa un i pandepangre. Un tchiwas len ap peskri phik, un hidjras len pre pral ap i berga, hoi glan o foro Hebron hi.

⁴Un pal kowa nashras lo peskro dji ap i djuwjate, kai djiwas an o telstuno them, hoi kharell Sorek. Lakro lab his Delila.

⁵Kote djan i raja pral i Filistarja pash late, un penan ap late: “Rake leha shukar un hatse win, kai leskri bari soor wella, un har nai wah sorleder har job, te pandas les un tchiwas les tel maro wast. Un hakeno mendar dell tuke koleske 1.100 (jek-sero-jek-sheel) rupene beme.”

⁶Kote penas i Delila ap o Simson: “Mangau tut: Pen mange, kai well tiri bari soor? Un pen mange, hoi hunte lell jek, te pandell lo tut un lell tut tel leskro wast?”

⁷Un o Simson penas ap late: “Te lenn le efta newe shelle, hoi gomme gar truk hi, un pandenn man kolentsa, palle nashrau miri soor, un hom jaake har hako wawar mursh.”

⁸Koi anan lake i raja pral i Filistarja efta newe shelle, hoi gomme gar truk hi. Un joi pandas les kolentsa.

⁹Pash late an o kheer his mursha khatedo. Kolla luran leske pre. Un joi penas ap o Simson: “Filistarja hi pral tute, Simson!” Kote phagas lo kol shelle paash jaake har dorja, te well jag ap lende. Un jaake hatsan le gar win, kai leskri soor wella.

¹⁰Un kote penas i Delila ap leste: “Tu chochral man, un penal mange gar o tchatchepen. Pen mange kanna, har nai pandenn le tut?”

¹¹Un job penas ap late: “Te pandenn le man newe shellentsa, kolentsa kek budras, palle nashrau miri soor, un wau har hako wawar mursh.”

¹²Kote las i Delila newe shelle, un pandas les kolentsa. Ninna kau kopo his mursha khatedo an o kheer un luran leske pre. Un joi penas ap leste: “Filistarja hi pral tute, Simson!” Kote phagas lo kol shelle tele peskre mussjendar, har wans le thaba.

¹³Kote penas i Delila ap o Simson: “Bis kanna chochral man, un penal mange gar o tchatchepen. Kanna pen mange tchatchepah, har nai pandenn le tut!” Kote penas lo ap late: “Te pandeh tu mire efta zopfe mashkral o thab ap tiro thabengro banko[35] un leh i kangli un tserdeh lauter soreles khetne, palle nashrau miri soor un wau jaake har i wawar mursh.”

¹⁴Un har sowas lo, pandas joi leskre balla khetne i thabentsa ap lakro thabengro banko, un las i kangli un tserdas lauter soreles khetne, un penas: “Filistarja hi pral tute, Simson!” Kote stas lo dran peskro sopen pre, un tserdas peskre balla khetne i thabentsa win dran o thabengro banko. Ninna ko kasht, hoi lauter pandlo rikras, tserdas lo win.

¹⁵Kote penas li ap leste: “Har nai peneh tu ap mande ‘me kamau tut’, te hi tiro dji gar mantsa? Triin kope chochral tu man, un penal mange gar, kai tiri bari soor well.”

¹⁶Un har joi gar tele mukas hako diwes ap leste te djal, un les lakre labentsa maras, kote was leskro dji jaake khino, te kamas lo te merell.

¹⁷Un job penas lake lauter, hoi an leskro dji hi, un penas ap late: “An ko tselo tsiro, kai me djiwau, wan mire balla gar tchinlo. Jaake rah har boldo wom, hom me o Debleske dino. Te tchinell jek mire balla tele, palle djal i soor mandar krik, un me wau jaake har hako wawar mursh ninna.”

¹⁸Un har i Delila dikas, te penas lo lake halauter, kote mukas li pal kol raja pral i Filistarja te bitchrell, un mukas lenge te penell: “Awenn gomme jek kopo kai! Job penas mange halauter.” Kote wan jon pash late, un anan kol lowe lake pentsa.

¹⁹Un joi mukas o Simsones an lakri gali dren te sowell, un das pal jekeste gole, kai leske i efta zopfe tele tchinas. Un jaake kras li les tiknes. Un leskri soor djas peske lestar.

²⁰Un joi penas ap leste: “Filistarja hi pral tute Simson!” Kote stas lo dran peskro sopen pre. Un penas peske: “Me wau krik har hako wawar kopo ninna. Me nai tserdau kol dorja mandar krik.” Job djinas gar, te djas peske o baro Dewel lestar.

²¹Un i Filistarja tapran les, un dan leske i jaka win tchurje. Un jon anan les tele an o foro Gaza un pandan les sasterne shellentsa. Un an o stilepen hunte kras lo o djob tiknes an i djobeskri[36].

²²Un i balla ap leskro shero wan pale lengsto.

²³Un i raja pral i Filistarja wan khetne, te krenn le pengro debleske Dagon i baro chapen, kai denn le leske bud viechen mulo, un kai chan un pijenn le bachteles khetne. Un jon penan: Maro dewel das men o Simsones an maro wast, koles, kai menge tchilatchepen kras.

²⁴Un har i Filistarja o Simsones dikan, sharan le pengro debles un giwan: Maro dewel das koles an maro wast, kai menge tchilatchepen kras, koles, kai maro them khetne das, un bud mendar maras.

²⁵Un har lengre djia bachteles his, penan le: “Anas mer o Simsones kai! Job krell menge dinelo koowa, te nai sanas pral leste!” Un jon lan o Simsones dran o stilepen. Un job hunte kras dinelo koowa, te nai san le pral leste. Un jon tchiwan les kote, kai serwes un tchatches lestar bare barra jek ap o wawareste pre-tchidde his, te hidjrenn le o kheer.

²⁶Un o Simson penas ap ko tchaweste, kai les ap o wast las: “Muk man kal barra an taprell, ap kalende o tselo kheer pre tardo was, jaake te nai rikrap man ap lende.”

²⁷Ko tselo kheer his pherde mursha un djuwja. Ninna i raja pral i Filistarja his koi. Un pral ap koi dacha his 3.000 (triin-serja) mursha un djuwja, kai dikan, har o Simson dinlepen kras.

²⁸Kote das o Simson ap o baro Debleste gole un penas: “Baro Dewel, miro rai! Dik gomme jek kopo ap mande, un de man soor, mo Dewel, gomme kau jek kopo, te nai dap kal Filistarjen pale, hoi jon mire jakentsa kran.”

²⁹Palle tapras o Simson ap kol pre-tchidde barra, mashkral lende job tardo hi, kolla, hoi o tselo kheer hidjrenn. Un tchiwas peskro tchatcho wast ap kol tchatche barra un peskro serwo wast ap kol serwe barra.

³⁰Un o Simson das gole: “Me merau i Filistarentsa!” las peskri tseli soor khetne un witsras kol barra trujel. Un kote peras ko tselo kheer pral kol i Filistarja un lengre rajende khetne. Jaake his kolen, kai job peha an o merepen las, budeder har kolen, kai job an peskro djipen maras.

³¹Un leskre phrala un i tsele mursha dran leskro dadeskro kheer wan koi tele, un hadan les pre un anan les pre un paskran les an o mulengro kheer peskro dadestar Manoach, hoi tchiddo hi mashkral i forja Zora un Eshtaol. O Simson his biish bersha o tchatchepaskro rai[37] pral o Israel.