Read O Debleskro Drom - I Bibla an o Romano Rakepen 2021 Tchatchepangre 17 Bible Online

Tchatchepangre 17 - O Debleskro Drom - I Bibla an o Romano Rakepen 2021 bible

Tchatchepangre 17

¹Un kote his i mursh ap i berge Efrajim, koleskro lab his Micha.

²Un kowa penas ap peskri date: “Me shunom, kai rakral bibacht pral koleste win, kai tchoras tuke kol 1.100 (jek-sero-jek-sheel) rupene lowe. Dik, ko rup hi pash mande. Me kokres lom les.” Koi penas leskri dai: “O baro Debleskri bacht pral tute, miro tchawo!”

³Un job das kol 1.100 (jek-sero-jek-sheel) rupene lowe peskri date pale pale. Un leskri dai penas: “Me dau ko rup o baro Debleste, te well kek bibacht ap tute, miro tchaweste. Kol lowentsa te well i kashteni figura kerdo, pral kolate rup tchoredo hi.”

⁴Job kamas gar un das ko rup peskri date pale pale. Koi las leskri dai 200 (dui-sheel) rupene lowe, un das len ko murshes, kai shukar koowa dran sonakai krella. Un kowa kras i kashteni figura, un tchoras rup pral kolate. Un koi figura was tchiddo an o Michaeskro kheer.

⁵Ko murshes Micha his i debleskro kheer peske un peskri familjake. Un job kras i rashajeskri damdira un khereskre debla, un rodas jek peskre tchawendar win, te well lo leskro rashai.

⁶Un an ko tsiro his kek baro rai pral o them Israel. Un hakeno kras jaake, har mishto his an peskre jaka.

⁷An ko tsiro djiwas i terno mursh i menshendar Juda an o foro Betlehem an o them Juda. Un kowa his i Levitari.

⁸Ko mursh djas win dran o foro Betlehem, te rodell lo i kheer, kai nai atchell lo. Har djas lo jaake ap peskro drom, was lo ap i berge Efrajim pash o kheer, kai o Micha djiwas.

⁹Un o Micha penas ap leste: “Kai weh tu?” Un job penas ap leste: “Me hom i Levitari dran o foro Betlehem an o them Juda. Un hom ap o drom, te djiwap kote kai nai atchau.”

¹⁰Koi penas o Micha ap leste: “Atch pash mande, un ab miro rashai un pen mange, hoi o Dewel mandar kamell. Un me dau tut koleske an o bersh deesh rupene lowe, ninna kowa, hoi an-ripaske tut hunte well, un chapen un pipen.”

¹¹Un ko Levitari penas: “Awa, jaake hi mishto,” un atchas pash o Micha. Un koleske his lo har jek leskre tchawendar.

¹²Un o Micha das les koi budi, te well lo leskro rashai. Un job atchas an o Michaeskro kheer.

¹³Un o Micha penas: “Kanna hi man i rashai an miro kheer. Doleske krell o baro Dewel, te djal mange mishto.”