Read O Debleskro Drom - I Bibla an o Romano Rakepen 2021 Tchatchepangre 18 Bible Online

Tchatchepangre 18 - O Debleskro Drom - I Bibla an o Romano Rakepen 2021 bible

Tchatchepangre 18

¹An ko tsiro das kek baro rai pral o them Israel. Un kol menshende dran o kheer Dan was gomme gar pengro them dino, mashkral pengre phralende, kol wawar Jakobeskre tchawende. Doleske rodan le penge i them, kai le nai djiwans.

²Un i mursha dran o kheer Dan rodan pantch murshen pengre menshendar win, tchatche murshen dran i forja Zora un Eshtaol, un bitchran len, te dikenn le pen an o tselo them trujel un rodenn, kai le nai atchens. Un jon penan ap lende: “Djan koi, rodenn an o tselo them, kai nai atchah.” Un jon wan an i berge Efrajim an o kheer, kai o Micha djiwell, un jon atchan kote pral i rat.

³Un har le kote his, peras lenge pre hawo rakepen ko terno mursh rakras, ko Levitari. Un jon djan pash leste un putchan lestar: “Koon anas tut kai? Hoi kreh tu kate? Un hoi hi tut kolestar?”

⁴Un job penas lenge, hoi o Micha leha win kras, te was lo leskro rashai un te plaissrell les o Micha koleske.

⁵Un jon mangan les: “Putch o Deblestar, te djinas: Hi kau drom, hoi mer kate djah, ninna o tchatcho drom?”

⁶Kote penas ko rashai ap lende: “Djan o latchepah an tumaro dji! O baro Dewel dikell latches ap o drom, kai djan.”

⁷Un kol pantch mursha djan dureder un wan an o foro Lajish. Un jon dikan i menshen, kai koi his. Kolla djiwan kek darjah, jaake har i Sidonarja ninna djiwan, kek darjah un kek kurepah. Un an o tselo them his kek, kai dals len trad un rikrals len tele. Un jon his dur krik o forestar Sidon. Un tchi un kek his penepaske pral lende.

⁸Un kol pantch bitchepangre djan pale pash pengre phralende an i forja Zora un Eshtaol. Un lengre phrala putchan len: “Hoi hatsan?”

⁹Un jon penan: “Awenn! Djas pre te kuras men i menshentsa an Lajish! Mer dikam ko them. Kowa hi i latcho them. Hoske han gomme beshdo kai un krenn tchi? Stenn pre, sik, te djas pre, un las ko them dren!

¹⁰Tumer hatsenn kote menshe, kai darenn gar, te well jek pral lende. Un o them hi buchlo pal hake rigja. Awa, o Dewel das les an tumaro wast, i them an koleste lauter hi, hoi ap i phub dell.”

¹¹Koi djan shob-sheel Danarja dran Zora un Eshtaol an o kurepen. Un hakenes lendar his leskro charo trul peste pandlo.

¹²Un jon djan pre un atchan i tikno tsiro pash Kirjat-Jearim an o them Juda. Un doleske kharell koi platsa ninna gomme kau diwes Machaneh-Dan. Kai platsa hi tchiddo pal o foro Kirjat-Jearim.

¹³Un kotar djan le dureder ap i berge Efrajim un wan pash o kheer, kai o Micha djiwas.

¹⁴Un kol pantch mursha, kai dikan pen tchorchanes trujel an o them pash Lajish, kolla penan ap pengre phralende: “Djinenn tumer, te hi an kawa kheer i rashajeskri damdira un i khereskro dewel, ninna i kashteni figura, kai rup pral tchoredo hi? Denn jak, hoi krenn kanna!”

¹⁵Koi djan le lauter pash o Michaeskro kheer, kai o terno Levitari his, un putchan ko terno murshes, har leske djal.

¹⁶An ko tsiro, har job pash kol 600 (shob-sheel) kurepangre kol menshendar Dan win glan o wudar tardo his, djan kol pantch, kai tchorchanes an o them trujel djan, pre an o kheer, un lan koi figura dran kasht un rup pentsa, ninna ko rashajeskri damdira un ko khereskro dewel.

¹⁸Har o rashai kowa dikas, putchas lo: “Hoske krenn tumer kowa?”

¹⁹Un jon penan ap leste: “Atch, rig tiro mui, un ab mentsa! Un ab maro rashai un pen menge, hoi o dewel mendar kamella! Hi tuke gar feteder te wess rashai i bari familjake an Israel, har te wess rashai an o kheer jek mursheske?”

²⁰Kote stas o rashajeskro dji i bachtjatar. Un job las o rashajeskri damdira, un o khereskro dewel un i figura dran kasht un rup, un djas kol murshentsa.

²¹Un jon rissran un djan dureder, un mukan pengre tchawen un pengre viechen glan pende te djal, lauter hoi kutch lenge his.

²²Un jon his i tselo kotar drom krik o kherestar, kai o Micha djiwell, har kol mursha, kai an i khera pash leste djiwan, khetne gole wan. Un jon lan i Danarja palla,

²³un dan pal lende gole. Un kolla rissran pen trujel, un penan ap o Micha: “Hoi hi tuha, te lal men kal tsele murshentsa palla?”

²⁴Un job penas: “Mire debla, hoi me krom, kolen lan tumer tumentsa, un ko rashajes koi pashel, un djan tumenge lentsa. Hoi atchell mange palle gomme? Un har nai putchenn tumer ‘Hoi hi tuha?’”

²⁵I Danarja penan ap leste: “Muk, atch! Mer kamah tchi buder te shunell. Tuke nai djal, te perenn chojede mursha pral tute un tiro kheer, un denn tumen mulo!”

²⁶Jaake djan i Danarja pengro drom. Un har o Micha dikas, te hi jon sorleder har job, rissras lo trujel, un djas pale khere.

²⁷Jaake lan le kau koowa pentsa, hoi o Micha peske kras, un koi pashel leskro rashajes. Un jon wan pash o foro Lajish un peran pral kol menshende, kai kote kek darjah un kek kurepah djiwan. Un jon dan len o chareha mulo. Un o foro chatchran le pre.

²⁸Un kek his koi, kai len nai dran lengre wasta win las. Ko foro Lajish his dur krik o forestar Sidon, un his tchiddo an o telstuno them pash Bet-Rehob. Un i menshe djiwan peske kokres. Un i Danarja kran ko foro pale newes un djiwan koi.

²⁹Un jon dan ko fores o lab Dan, jaake har lengro phuro dad kharas, koleskro dad o Israel his. Glan kowa kharas ko foro Lajish.

³⁰Un i Danarja tchiwan penge koi figura dran kasht un rup pre. Un lengro rashai his o Jonatan. Koleskro phuro dad his o Moseskro tchawo, o Gershon. O Jonatan un leskre tchawe his lengre rashaja bis ap ko diwes kai le pandlo krik lino wan.

³¹Jon tchiwan koi figura, hoi o Micha kras, pash pende pre jaake rah, har o Debleskro kheer an o foro Shilo his.