Read O Debleskro Drom - I Bibla an o Romano Rakepen 2021 Tchatchepangre 19 Bible Online

Tchatchepangre 19 - O Debleskro Drom - I Bibla an o Romano Rakepen 2021 bible

Tchatchepangre 19

¹An ko tsiro kai kek baro rai an o Israel das, djiwas dur palla an i berge Efrajim i Levitari. Kowa his romedino un las peske i duiti djuwel koi pashel. Koja was dran Betlehem an Juda.

²His i diwes, kai mukas li peskro romes, un nashas lestar pash peskro dadeste an o foro Betlehem an o them Juda, un his kote star tchonna.

³Un kote kras pes lakro rom ap o drom, un djas lake palla, te rakrell lo lake an o dji, un lell lat pale pale pash peste. Un les his peskro budepaskres un dui esle pash peste. Un joi anas les an o peskro dadeskro kheer. Un har lakro dad les dikas, djas lo bachteles pash leste,

⁴un kamas gar te djal lo sik pale, un rikras les triin diwessa pash peste. Un jon chan un pijan, un atchan kote pral i rat.

⁵Un ap o starto diwes, stan le sik taissarlakro pre, te krenn le pen ap o drom. Kote penas o dad koi terni djuwjatar ap lakro romeste: “Cha gomme i kotar maro, te wess sorelo o dromeske, un palle mukau tumen te djal.”

⁶Un kol dui beshan pen un chan un pijan khetne. Un o dad koi terni djuwjatar penas ap ko mursheste: “Kre mange ko latchepen, un atch kai pral i rat, un muk tiro dji bachteles te well.”

⁷Ko mursh kamas gar un stas pre, te djal lo peske. Kote rakras leskri djuwjakro dad jaake ap leste dren, te atchas lo pale pral i rat.

⁸Un ap o pantchto diwes stas lo sik taissarlakro pre, te djal lo peske. Kote penas o dad koi terni djuwjatar: “Cha tchomone, un atchenn gomme bis ap i rat.” Un jaake atchan kol dui khetne.

⁹Un palle stas ko mursh pre, te djal lo peske peskri djuwjah un peskro budepaskro. Un o dad koi terni djuwjatar penas ap leste: “Dik, o kham djal tele un i rati wella. Atch pral i rati, un muk tiro dji bachteles te well. Un taissar stenn sik pre un djan khere!”

¹⁰Ko mursh kamas gar buder pral i rat te atchell, un hadas pes un djas peske. Un job was bis pash o foro Jebus. Kowa hi Jerusalem. Un les his kol dui esle pash peste, ap kolende lengro koowa his, un peskri djuwel un peskro budepaskro.

¹¹Un har i rati was, penas ko budepaskro ap peskro rai: “Djas an kau foro, kai i Jebusarja djiwenn, te atchas koi pral i rat.”

¹²Leskro rai penas ap leste: “Mer djah gar an i foro, kai menshe djiwenn, kai hi gar i Israelendar. Mer djah i kotar dureder bis an o foro Gibea oder Rama. Kote atchah pral i rat.”

¹⁴Un jaake djan le dureder. Un o kham djas tele, har wan le pash o foro Gibea. Kau foro hi an ko them, kai i Benjaminarja djiwenn.

¹⁵Un jon mukan o drom pal pende, un djan an o foro dren. Un kek las len dren an peskro kheer, te nai atchans le pash leste pral i rat. Un jaake atchan le ap i platsa mashkral o foro.

¹⁶Koi was i phuro mursh khere fun peskri budi ap peskri hachetikri phub. Un ko mursh his ninna dran i berge Efrajim un his i wi-themari an o foro Gibea. I wawar menshe an kau foro his Benjaminarja.

¹⁷Un har job pre dikas, dikas lo ko mursh ap i platsa. Un ko phuro mursh putchas: “Kai weh tu? Un kai djah tu?”

¹⁸Un job penas ap leste: “Mer ham ap o drom dran o foro Betlehem an Juda, un kamah dur an i berge Efrajim te djal, kai khere hom. Un me djom tele an o foro Betlehem an o them Juda. Un djau kanna pale an miro kheer. Un kate an kau foro dell kek, kai man an peskro kheer pre lals, na-a, kek.

¹⁹Un men hi phuss un chapen mare eslenge, un ninna maro un mool mange un miri djuwjake un ko budepaskres, kai pash mande hi. Tu dikeh, men hi lauter chapaske, hoi men hunte wals.”

²⁰Kote penas ko phuro mursh: “O Debleskro latchepen tuha! Ab mantsa! Tumer nai atchenn pash mande. Ap kai platsa kate, ma atch pral i rat!”

²¹Un jaake las lo les peha an peskro kheer, un das leskre eslenge chapen. Un jon thowan pengre herja, un chan un pijan.

²²Un har jon les penge mishto djal mukan, wan mursha dran o foro un tchiwan pen trul o kheer tardo, tchi-molde mursha. Un kolla dan ap o wudar, un penan ap ko phuro mursh, koleske ko kheer his: “An menge ko murshes win, kai pash tute an o kheer was, te kras dinelo koowa leha!”

²³Ko phuro mursh, ko rai pral o kheer, djas pash lende win, un penas ap lende: “Mire phrala, mangau tumen, ma krenn sawo tchilatcho koowa! Ma taprenn kau murshes an, kai an miro kheer was! Ma anenn sawi ladj ap leste!

²⁴Shunenn, man hi i tchai, kai djinell gomme kek murshestar. Kolat anau pash tumende win, ninna ko romeskri djuwel. Kolen nai dukrenn, un kolentsa krenn, hoi kamenn. Ap ko mursheste ma anenn sawi ladj!”

²⁵Kol mursha kaman gar ap leste te shunell. Koi tapras ko Levitari peskri djuwjat un anas lat win pash lende glan o kheer. Un jon peran pral late un sowan sorjah lah i tseli rat. Un taissarlakro mukan le lat te djal.

²⁶Un joi was un peras tele glan o wudar, kai lakro rai his. Un joi his koi tchiddo, bis o kham pre djas.

²⁷Un har lakro rai pre stas un glan o wudar djas, te djal lo dureder, hatsas lo kote peskri djuwjat tchiddo i wastentsa ap o wudar.

²⁸Kote penas lo ap late: “Ste pre un muk men te djal!” Latar was tchi pale. Koi las lo lat, un tchiwas lat ap peskri esla. Un ko mursh kras pes ap o drom un djas khere.

²⁹Un har job an peskro kheer was, las lo i tchuri, un tchinas peskri muli djuwjat an deesh-te-dui kotja. Un bitchras kol kotja an o tselo them Israel.

³⁰Un hakeno, kai kowa dikas, penas: “Sawo koowa har kawa was gomme gar kerdo jaake rah har o Israel dran Egiptia djas bis kanna. Kanna mukenn kowa an tumare sherja trujel te djal, rakrenn khetne, un penenn, hoi kanna kerdo hunte well!”