Read O Debleskro Drom - I Bibla an o Romano Rakepen 2021 Tchatchepangre 2 Bible Online

Tchatchepangre 2 - O Debleskro Drom - I Bibla an o Romano Rakepen 2021 bible

Tchatchepangre 2

¹Un o baro Debleskro bolepaskro was dran o foro Gilgal pre ap koi platsa, hoi kharella Bochim, un penas: “Me lom tumen dran o them Egiptia win, un anom tumen an kau them, jaake har man sowel dom glan tumare phure dadende, te dau les tumende. Un me penom, te rikrap hako tsireske miro lab, hoi tumende dom.

²Un tumendar kamom, te wenn kek mala kol menshenge, kai an kau them djiwenn, un te phagenn tumer lengre pre-tchidde barra tele, kai chatchrenn le viechen lengro debleste. Un hoi kran tumer? Tumer shunan gar ap kowa, hoi penom!

³Koi penom me: Me tradau len gar glan tumende win. Un jon wenn tumenge har shelle, kai taprell jek viechen dren. Un ap ko diwes, kai mangenn tumer lengre deblen an, taprenn tumer dren.”

⁴Un har o baro Debleskro bolepaskro kowa lauter ap i Israelitarja penas, koi rowan le soreles.

⁵Un jon penan ap koi platsa ‘Bochim’[3]. Un jon anan kote o baro Debleske viechen, te chatchrenn le len leske.

⁶Un o Josua penas ap i menshenge, te nai djan le penge. Un i Israelitarja djan penge, hakeno an ko kotar them, hoi les dino was, te lell lo ko them dren.

⁷Un jon mangan o baro Debles an, jaake rah har o Josua djiwas, un jaake rah, har pal leste kol phureder djiwan, kai ko tselo baro koowa dikan, hoi o baro Dewel i Israelenge kras.

⁸Un har lo 110 (sheel-te-deesh) bersha phuro his, meras o Josua, koleskro dad o Nun his. O Josua his o baro Debleskro budepaskro.

⁹Un jon paskran les an ko kotar them, hoi les dino was: an o foro Timnat-Heres an o pralstuno them Efrajim pash i berga Gaash, ap i serwi rig[4].

¹⁰Palle meran ninna kol tsele wawar menshe, kai an kau tsiro djiwan, har o Josua djiwas. Un pal lende wan menshe, kai o baro Debles gar prindjran, witar gar kowa, hoi job i Israelenge kras.

¹¹Un koi kran i Israelitarja kowa, hoi tchilatches hi glan o baro Debleskre jaka. Un jon mangan ko debles an, hoi kharas Baal,

¹²un mukan o baro Debles, kai o Dewel lengre phure dadendar hi, un len win anas dran o them Egiptia. Un jon nashan wawar deblenge palla, — kol deblenge, kolen i menshe an-mangan, kai trul lende djiwan. Un jon peran glan lende tele, un jaake kran le, te well o baro Dewel chojedo.

¹³Un jon mukan o baro Debles un mangan o debles Baal an un ninna i debletsa Astarte.

¹⁴Kote tapras o baro Debles i bari choli pral i Israelitarja. Un job das len an o wast kolendar, kai len wi-tchorenn. Un ninna mukas lo len an i wasta kol menshendar te perell, kai trul lende djiwenn un lenge o djipen phares kran. Jaake his i Israelitarja buder gar soreles doha, te denn le kolen pale, kai ap lende djan.

¹⁵Un kai le ninna djan, te kurenn le pen, his o baro Dewel gar lentsa un das len kek bacht. Jaake was kowa, hoi o baro Dewel lenge penas un leskro wast pre das. Un jon wan an phare tsirja.

¹⁶Un pale te pale mukas o baro Dewel tchatchepangre murshen pre te stell. Kolla lan len win dran o wast kolendar, hoi lendar tchoran.

¹⁷Un ninna ap pengre tchatchepangre murshende shunan le gar. Na-a, jon witsran pen glan wawar deblende tele un mangan len an. Sik djan le tele ko dromestar, hoi lengre phure djan, kai shunan ap i laba o baro Deblestar. Kowa kran jon gar.

¹⁸Un te mukas o baro Dewel lenge tchatchepangre murshen pre te stell, palle his job ko tchatchepaskro mursheha, un las len win dran i tchilatche wasta. Les khaitas lengro ropen pral kolende, kai lenge o djipen phares kran. Jaake rah har ko tchatchepaskro rai djiwas, shunan le ap o baro Debleste.

¹⁹Pal leskro merepen peran le pale o tchatcho dromestar tele, un kran les gomme djungleder har pengre phure kowa kran, un nashan wawar deblenge palla, un witsran pen glan lende tele, un mangan len an. Un mukan pen kekestar ko tchilatcho dromestar tele te anell. Pal pengre shere djan le pengro drom.

²⁰Kote chatchras i choli o baro Deblestar pral o Israel pre. Un job penas: “Kal tchilatche menshe rikran pen gar ap mire laba, hoi me lengre phurende dom, un shunan gar ap mande.

²¹Doleske tradau me ninna kanna buder gar kol wawar menshen dran kau them win, kai pral atchan, har o Josua meras.

²²Jaake nai hatsau win: Atchenn i Israelitarja ap miro drom, ninna te djiwenn le mank wawar menshende? Djan le mange jaake palla, har lengre phure kowa kran? Oder krenn le kowa gar?”

²³Un doleske mukas o baro Dewel i wawar menshen an o them te atchell, kolen job gar an o wast o Josuestar das, un tradas len gar sik win.