Read O Debleskro Drom - I Bibla an o Romano Rakepen 2021 Tchatchepangre 4 Bible Online

Tchatchepangre 4 - O Debleskro Drom - I Bibla an o Romano Rakepen 2021 bible

Tchatchepangre 4

¹Un har o Ehud mulo his, kran i Israelitarja pale, hoi tchilatcho his glan i jaka o baro Deblestar.

²Un o baro Dewel das len an o wast o baro rajestar Jabin. Kowa his o baro rai pral o them Kanaan un djiwas an o foro Hazor. Un leskro pralstuno lurdo kharas Sisera. Un kowa djiwas an o foro Haroshet-Gojim.

³O baro rajes Jabin his 900 (enja-sheel) sasterne wurdja o kurepaske. Un job kras i Israelenge i pharo djipen biish bersha. Doleske dan le bari gole ap o baro Debleste.

⁴An ko tsiro his i tchatchepaskri djuwel an o them Israel. Koja his i Debleskri rakepaskretsa. Lakro lab his Debora. Lakro rom his o Lappidot.

⁵Un joi his beshdo tel ko palmtikro ruk, hoi kharella ‘palma i Deboratar’. Un koi palma his ap o drom mashkral o foro Rama un o foro Betel an o pralstuno them Efrajim. Un i Israelitarja wan pash late, te krell li o tchatchepen pral lende win.

⁶Was i diwes, kai mukas li i murshes dran o kheer Naftali pash peste te kharell. Leskro lab his Barak. Koleskro dad his o Abinoam dran o foro Kedesh. Un joi penas ap leste: “O baro Dewel, kai o Dewel pral o Israel hi, job penell tuke: ‘Le tuke deesh-serja mursha dran i khera Naftali un Sebulon un dja lentsa ap i berga Tabor!

⁷Un me bitchrau o Sisera, ko pralstuno lurdes pral o Jabineskre lurdende, pash tute win peskre wurdjentsa un peskre tsele lurdentsa pash ko tikno pani, hoi kharella Kishon. Un kote dau les an tiro wast.’”

⁸Kote penas o Barak ap late: “Te djah tu mantsa, palle djau. Tu te weh gar mantsa, palle djau me ninna gar.”

⁹“Mishto”, penas li. “Me djau tuha. Ko jek djin, palle sharenn le gar tut an kau kurepen. O baro Dewel dell o Sisera an o wast i djuwjatar.” Un i Debora stas pre, un djas leha an o foro Kedesh.

¹⁰Un o Barak das i murshen gole dran i khera Sebulon un Naftali, te wenn le an o foro Kedesh khetne. Un 10.000 (deesh-serja) mursha djan leske palla. Un ninna i Debora djas leha.

¹¹Ap i platsa, hoi kharell Zaanannim pash o foro Kedesh djiwas o Kenari Heber an i plachteno kheer tel i baro ruk. Glan i tsiro mukas job peskre menshen. Kolla his tchawe un tchawengre tchawe o Moseskri romjakro dadestar, o Hobab.

¹²Koi was ap o Sisera penlo, te djas o Barak, koleskro dad o Abinoam hi, ap i berga Tabor pre.

¹³Kote mukas o Sisera peskre tsele wurdja khetne gole te dell, 900 (enja-sheel) sasterne wurdja o kurepaske, un peskre tsele lurden, hoi pash leste hi, un djas lentsa dran o foro Haroshet-Gojim pash ko tikno pani, hoi kharella Kishon.

¹⁴Un i Debora penas ap o Barak: “Dja! Kawa hi ko diwes, kai o baro Dewel o Siseres an tiro wast das. O baro Dewel djas win glan tute.” Un o Barak djas koi berga Tabor tele, un deesh-serja mursha leske palla.

¹⁵Un har djan le pengre charentsa ap o Sisera un ap leskre tsele wurdja un lurdende pre, kote kras o baro Dewel, te trashenn kolla jaake, te stas o Sisera peskro wurdin tele, un nashas peske.

¹⁶Un o Barak peskre murshentsa las kol wurdja un kol lurden palla bis pash o foro Haroshet-Gojim un das len lauteren mulo o chareha. Kek lendar atchas pral.

¹⁷O Sisera nashas pash o plachteno kheer, kai djiwas i Jael. Kolakro rom his o Kenari Heber. Mashkral o baro rajeste pral o foro Hazor, o Jabin, un o Kenari Heber his kek kurepen. Jon his penge latches.

¹⁸Kote djas i Jael win pash o Sisera, un penas ap leste: “Ab pash mande dren, miro rai, un ma dare gar!” Jaake djas lo dren an lakro plachteno kheer. Un joi tchakras i plachta pral leste.

¹⁹Un job penas ap late: “De man i tcharo pani te pijell! Man hi trush!” Kote kras li i ledertikri tushni[6] pre, kai thud dren hi, un das les te pijell. Un tchakras pale i plachta pral leste.

²⁰Un job penas ap late: “Atch tardo pash o wudar glan o plachteno kheer! Un te well jek, un putchella: ‘Hi jek kai?’ Palle pen: Na-a!”

²¹O Sisera his khino un sowas sik dren. Un i Jael, o Hebereskri romni, las i sasterno depaskro un i tikno saster, koleha o plachteno kheer an i phub pandlo well, un djas tchorchanes pale pale pash leste dren un das leske ko tikno saster an leskro shero jaake dur, te djas lo ap i wawar rig pale win, un an i phub dren. Jaake meras o Sisera kote.

²²Un har o Barak o Siseres palla las, djas i Jael win pash leste, un penas: “Ab mantsa, un me kamau tuke ko murshes te sikrell, koles tu rodeh!” Un job djas pash late dren, un dikas o Siseres mules koi tchiddo. O saster his an leskro shero.

²³Jaake anas o Dewel ap ko diwes bari ladj ap o Jabineste, ko baro rajeste pral o them Kanaan glan i Israelitarja.

²⁴Un i Israelitarja wan sorleder un sorleder ap o Jabineste, ko baro rajeste pral o them Kanaan, bis te leskri sorjatar tchi buder koi his.