Read O Debleskro Drom - I Bibla an o Romano Rakepen 2021 Tchatchepangre 5 Bible Online

Tchatchepangre 5 - O Debleskro Drom - I Bibla an o Romano Rakepen 2021 bible

Tchatchepangre 5

¹Ap ko tsiro giwas i Debora kai gili khetne o Barakeha, koleskro dad o Abinoam his.

²Sharas o baro Debles! Tchatche mursha anan o Israel an o kurepen. Pendar win djan i kurepangre lentsa.

³Shunenn, tumer bare raja! Denn jak, tumer pralstune, me giwau un bashrau o baro Debleske, — o Debleske pral o Israel.

⁴Baro Dewel, har tu tele wal dran o them Seir, har tu wal dran o them Edom, kote trissas i phub, un brishin was dran o bolepen, bud pani ap i phub.

⁵I berge trissan glan o baro Debleste, kai sikras pes ap i berga Sinai glan peskre menshende Israel. Lengro Dewel hi lo, — job, o baro Dewel.

⁶An ko tsiro, har o Shamgar djiwas, koleskro dad o Anat hi, ninna an ko tsiro, har i Jael djiwas, his kek mensho ap i dromma, un kolla, kai ap kol bare dromma win djans, hunte djans tchorchanes, ap tikne khatemen dromma.

⁷Kek gole was shunlo an i gaba an o Israel. Palle stas i Debora pre, i dai an o Israel.

⁸Mire menshe rodan penge wawar debla! Kote was o kurepen glan lengre wudja. Un pash 40.000 (star-deesh-serja) mursha an Israel was kek charo hatslo, witar kek shilto.

⁹Miro dji hi i pralstunenge an Israel, un i lurdentsa, kai pendar win djan an o kurepen. Kolenge parkrenn tumen pash o baro Debleste!

¹⁰Tumer, kai ap i parne burike klissenna[7], un tumer, kai ap i stakepangre beshenna, un tumer, kai ap o drom djan: Giwenn!

¹¹Shunenn, har bashrenn le pash o pani, kote kai denn le pengre viechen te pijell. Kote sharenn le ko baro koowa, hoi o baro Dewel kras, awa, o baro koowa, hoi kras lo ap peskre menshende Israel, har djan le dran lengre forja.

¹²Dja glan! Dja glan, Debora! Dja glan, gib i gili! Dja glan, Barak, tu o Abinoameskro tchawo! Un le stildo kolen, hoi tu tapral!

¹³Kol tchatche mursha, hoi pral atchan, djan tele pash pengre pralstunende. O baro Debleskre menshe djan mantsa khetne an o kurepen, te kurenn le pen leske.

¹⁴Dran o Efrajim wan kolla, kai dran o them Amalek wan. Pal lende was o Benjamin peskre lurdentsa, dran o Machir wan i pralstune, un dran o Sebulon i bare lurde.

¹⁵Un i raja dran o Issachar djan khetne i Debora an o kurepen. Jaake har o Issachar kras ninna o Barak un nashas pal leste i berga tele. An o them Ruben his le beshdo pash o pani un rakran bud un rah.

¹⁶Hoske atchal tu pash tire bakre? Kamal tu i bashepen te shunell, hoi i bakrengre kran? Awa, pash o Ruben rakran le bud un rah.

¹⁷Un i mursha dran o Gilead atchan ap i wawar rig o panjestar Jordan. Un o Dan? Hoi krell job? Pash peskre shiffe atchell job. Pash o baro pani djiwell o Asser. Un kote atchas lo ninna beshdo.

¹⁸Dikenn ap kolende dran o Sebulon un dran o Naftali: Kolla hi mursha, kai daran gar, te denn le pengro djipen an o merepen, un djan kek darjah an o kurepen.

¹⁹Kote wan le, kol bare raja pral o them Kanaan! Jon wan un maran pen mentsa. Awa, an o foro Taanach pash o pani Megiddo maran le pen mentsa. Rup hidjras kek lendar khere.

²⁰Ninna i bolepangre momlia djan an o kurepen. Ap lengre dromma djan le ap o Sisera pre.

²¹Un ko phuro tikno pani, ko pani Kishon, tserdas leskre lurden krik. Dureder, dureder! Te was soreles an o kurepen!

²²Kote nashan i graja sikeder. Klak-klak, klak-klak, shunenn koi bari gole, hoi lengre pire kran!

²³Praassenn o foro Meros, penas o baro Debleskro bolepaskro. Praassenn kolen, hoi an ko foro djiwenn! Awa, praassenn len! Jon wan gar ap o baro Debleskri rig, un djan gar an o kurepen khetne kol tchatche murshentsa.

²⁴O Debleskri bacht well pral i Jael, kolakro rom o Heber hi, ko Kenari! O Dewel dell lat budeder bacht har i tsele wawar djuwjen, kai djiwenn an i plachtene khera!

²⁵O Sisera, pani mangas lo, un thud das li les, an i kutch tcharo das li les smentana te pijell.

²⁶Lakro wast tapras i saster, un lakro tchatcho wast i sasterno depaskro[8], kolentsa das li leskro shero paash. An leskro shero djas ko saster dren un was pale win.

²⁷Mashkral lakre herja phagas lo khetne, peras lo tele, un koi his lo tchiddo. Khetne phagas lo, tele peras lo, mulo hi lo.

²⁸Un leskri dai dikas dran i wali, dikas darenes mashkral kol kashta win. Kai atchell leskro wurdin? Hoske well lo gar? Hoske shunau i graja gar?

²⁹Un lakre gosweder djuwja penan lake kawa. Un joi penas les lenge palla:

³⁰Tchatchepah hatsan le bud, hoi jon peha lenn, shukar brawlepen hakeneske: Jek rakli, dui raklia hako mursheske, un kutch shukar ripja o Sisereske, ninna menjakre dikle, kai shukar koowa dren sido hi.

³¹Maro baro Dewel, jaake hunte merenn lauter, hoi tut gar kamenna. Kolla, kai kamenn tut o tselo djijestar, jon te wenna railo har o kham, har djal lo pre an peskri soor! Un pal kowa his an o them 40 (star-deesh) bersha kek kurepen.