Read O Debleskro Drom - I Bibla an o Romano Rakepen 2021 Tchatchepangre 6 Bible Online

Tchatchepangre 6 - O Debleskro Drom - I Bibla an o Romano Rakepen 2021 bible

Tchatchepangre 6

¹Un i Israelitarja kran, hoi tchilatches hi glan o baro Debleskre jaka. Doleske das o baro Dewel len efta bersha an o wast kol menshendar, kai kharenna Midianarja.

²Un kolengro wast was jaake soreles pral o Israel, te khatran pen i Israelitarja an i berge un djiwan an i grotte mank i bare barra un an sorele khera, hoi kran pen le an i berge.

³Un hako kopo, kai witsran i Israelitarja o djob an i phub, palle wan i Midianarja un i Amalekarja un wawar menshe kotar, kai o kham pre djala, un peran an o them dren.

⁴Jon anan pengre viechen un plachtene khera peha un his jaake bud har i stepangre[9]. Kek djinas, har bud jon un lengre khamele hi, jaake bud his le. Un jon beshan pen ap o Israeleskro them un chan lauter pre, hoi kote bares was. An o tselo them bis pash o foro Gaza atchas kek chapen pral, witar kek bakre, grumja un burike. Jaake kran le o them paash.

⁶Un jaake anan i Midianarja o Israel an o tchorwlepen. Un i Israelitarja dan gole ap o baro Debleste, un mangan les, te well lo ap lengri rig.

⁷Un har i Israelitarja lestar mangan, te lell lo len win dran o Midianeskro wast,

⁸kote bitchras o baro Dewel i Debleskro rakepaskro pash lende. Un kowa penas lenge: “Kawa penell o baro Dewel, o Dewel pral o Israel: ‘Me anom tumen dran o them Egiptia win, kai tumer pandle budepangre hans,

⁹un lom tumen win dran i wasta i menshendar an o them Egiptia un lauterendar, hoi tumenge o djipen phares kran, un tradom len glan tumende win, un dom tumen lengro them.

¹⁰Un me penom tumenge: Me, o baro Dewel, hom tumaro Dewel. Ma mangenn kol deblen an, hoi i Amorarja an-mangenn, an kolengro them tumer djiwenn. Un tumer shunan gar ap mande.’”

¹¹Un ko baro Debleskro bolepaskro was, un beshas pes tel ko baro ruk, hoi pash i platsa his, hoi kharella Ofra. Koi platsa his o Joashes dran i familja Abijeser. Un leskro tchawo Gideon his an ko kashteskro, hoi kerdo his, te krenn le mool dran i drake. Un kote das lo khatemen o djob win, te nai taprenn i Midianarja gar ko djob ninna.

¹²Kote sikras pes ko baro Debleskro bolepaskro leske, un penas ap leste: “O baro Dewel hi tuha, tu tchatcho mursh un kurepaskro!”

¹³Un o Gideon putchas lestar: “Mangau tut, miro rai! Te hi o baro Dewel mentsa, hoske was kai tseli bibacht ap mende? Un kai hi ko tselo baro koowa, hoi o baro Dewel kras, kolestar menge mare phure rakran un penan: ‘O baro Dewel anas men dran o them Egiptia.’ Kanna mukas men o baro Dewel un das men an o wast kolendar dran o them Midian.”

¹⁴Kote rissras pes o baro Dewel pash leste, un penas: “Dja koi an tiri soor! Un le o Israel dran o Midianeskro wast win! Me bitchrau tut.”

¹⁵Job penas ap leste: “Mangau tut miro rai: Har lap me nai o Israel dran o Midianeskro wast win? Miri familja hi i tikneder an o tselo kheer Manasse. Un me hom o tikneder an miro dadeskro kheer.”

¹⁶Kote penas o baro Dewel ap leste: “Me djau tuha, un tu mareh i Midianarja, har te wans le jek mursh.”

¹⁷Kote penas lo: “Te hal tu mange latcho, palle de man tchomone, hoi man sikrell, te hal tu tchatchepah o baro Dewel, kai mantsa rakrell.

¹⁸Ma dja tuke gar katar, bis te me pale pash tute wau, un tuke chapen anom un glan tute tchiwom.” Un job penas: “Me kamau kai atchell bis te tu weh.”

¹⁹Kote djas o Gideon koi, un las i terni busni[10], un maras lat, un kras o chapaske. Palle las lo i baro gono jarro[11] un kras lestar mare, an kolende kek shutlo jarro his. Un o mass tchiwas lo an i kashteno tcharo. Un i summi, an kolate o mass keras, tchiwas lo an i piri. Un jaake anas lo les win pash leste tel ko baro ruk, un tchiwas les leske glan.

²⁰Un ko Debleskro bolepaskro penas ap leste: “Le ko mass un kol mare un tchip len ap ko baro bar kote. Un tchore koi summi pral kowa!” Un job kras jaake.

²¹Palle hadas ko bolepaskro peskro kasht, hoi an leskro wast his, un tapras ko mass un kol mare an. Kote was jag dran ko baro bar win, un chatchras ko mass un ko maro pre. Un ap jek kopo his o baro Debleskro bolepaskro buder gar koi.

²²Har o Gideon dikas, te his kowa o baro Debleskro bolepaskro, penas lo: “Rai, baro Dewel, kanna hunte merap. Tchatchepah dikom o baro Debleskro bolepaskres an i jaka.”

²³Kote penas o baro Dewel ap leste: “Mank mende hi lauter mishto. Ma dare, tu hunte meress gar.”

²⁴Un o Gideon tchiwas kote barra pre, te krell lo i chatchepaskri[12], kai wenn vieche chatchedo o baro Debleske, un das lat o lab Jahwe-Shalom[13]. Gomme kau diwes hi koi chatchepaskri kote tardo an o foro Ofra, kai kol menshe djiwenn, kai kharenna Abijesarja.

²⁵Un an koi rat rakras o baro Dewel ap o Gideon: “Le i terno gurum[14] tiro dadeskre viechendar, un le ninna i gurum, hoi efta bersha phuro hi! Un de koi chatchepaskri[15] tele, hoi ap tiro dadeskro them tardo hi, kai chatchrenn le viechen lengro debleske Baal. Un de koi kashteni debletsa Ashera tele, hoi koi pashel tardo hi!

²⁶Un kre i chatchepaskri o baro Debleske, kai tiro Dewel hi, kate pral ap kai berga, kai tumaro sorelo kheer tardo hi! Un le ko duito gurum un mare les mange un chatche les mange kote! Kre koi jag ko kashteha, hoi i debletsa Ashera his, hoi tu trujel dal!”

²⁷Kote las o Gideon deesh murshen peskre budepangrendar, un kras kowa jaake, har o baro Dewel leske penas. Un har daras lo i menshendar an peskro dadeskro kheer un an o foro, kras lo kowa an i rat un gar ap o diwes.

²⁸Un har i mursha an o foro taissarlakro pre stan, his koi chatchepaskri lengro deblestar Baal paash dino, un i Ashera hoi koi pashel tardo his, his trujel dino. Un ko duito gurum his chatchedo ap koi newi chatchepaskri.

²⁹Un jek penas ap o wawareste: “Koon kras kawa?” Un jon rodan un putchan. Un lenge was penlo: “O Gideon, koleskro dad o Joash hi, kras kawa.”

³⁰Kote penan i mursha dran o foro ap o Joash: “De tiro tchawes win! Job hunte merell! Job das koi chatchepaskri o deblestar Baal paash, un das i Ashera, hoi pashel tardo his, trujel!”

³¹O Joash penas ap lauterende, kai kote tardo his: “Kamenn tumen o debleske Baal te kurell? Kamenn tumer ap leskri rig te well? Koon pes leske kurell, kowa merell gomme an kai rat. Te hi lo i dewel, palle krell lo peske peskro tchatchepen win. Koja his leskri chatchepaskri, hoi was paash dino.”

³²Ap ko diwes dan le o Gideones o lab Jerub-Baal. Kowa kharella: “Te kurell pes o Baal leha!” O Gideon das leskri chatchepaskri paash.

³³Un i tsele Midianarja un i tsele Amalekarja un kolla, kai wan kotar, kai o kham pre djala, wan khetne un djan wergel o pani Jordan un tchiwan pengre plachtene khera pre an o telstuno them Jesreel.

³⁴Kote was o baro Debleskro ducho pral o Gideon. Un job phurdas an i phurdepaskri, te dell lo i Abijesarja khetne gole, te wenn le leske palla an o kurepen.

³⁵Un job bitchras murshen an o tselo them Manasse, un mukas lenge te penell, te wenn le leske palla. Ninna bitchras lo murshen an o them Asser un Sebulon un Naftali. Un kolla lauter wan pash leste.

³⁶Un o Gideon penas ap o Debleste: “Tu te rodal man win, te lap o Israel win dran i tchilatche wasta, jaake har tu mange penal, palle sike les mande!

³⁷Dik, me tchiwau kal bakrengre balla, hoi tele tchinlo wan, ap ko djobeskri platsa. Te wenn taissarlakro kal balla kokres sapeno, un gar koi phub, hoi trujel hi, palle dikau, te kameh mantsa o Israel win te lell, jaake har tu ap mande penal.”

³⁸Un jaake was kowa. Sik o wawar diwes stas o Gideon pre un las o bakrengro bal mank peskre wasta. Un ko pani, hoi win was, his jek tcharo pherdo.

³⁹Un o Gideon penas ap o Debleste: “Ma muk tiri choli ap mande chatchrell, te mangau tut gomme jek kopo: Kamau les i duito kopo i bakrengre ballentsa te krell. Kau kopo muk kek pani ap o bakrengro bal te well, kokres i tseli phub trujel te well sapenes.”

⁴⁰Un o Dewel kras an koi rat jaake, te was kek pani ap o bakrengro bal, un i tseli phub trujel his sapeno.