Read O Debleskro Drom - I Bibla an o Romano Rakepen 2021 Tchatchepangre 7 Bible Online

Tchatchepangre 7 - O Debleskro Drom - I Bibla an o Romano Rakepen 2021 bible

Tchatchepangre 7

¹Un sik taissarlakro djas o Gideon, kai kharell ninna Jerub-Baal, peskre tsele lurdentsa, hoi pash leste hi, pash o pani, hoi kharella Harod. Un kote tchiwan le pengre plachtene khera pre. Jaake his i lurde dran o them Midian serwes lendar pash koi tikni berga More an o telstuno them.

²Un o baro Dewel penas ap o Gideon: “Tut hi bud lurde, hoi pash tute hi. Jaake nai dau i Midianarja gar an tumare wasta. O Israel nai sharals pes un nai penals: ‘Mare wasta his, hoi men win lan!’

³Un kanna de gole glan i kanda i tsele lurdendar: ‘Kones daar hi, kowa djal i berga Gilead tele un djal khere!’” Kowa kras o Gideon. Un 22.000 (biish-te-dui-serja) mursha djan khere. Un 10.000 (deesh-serja) mursha atchan pash o Gideon.

⁴Un o baro Dewel penas ap o Gideon: “Kol lurde hi gomme[16] bud. An len pash o pani tele! Me kamau kote win rodell, koon tuha djal. Un kolen, hoi me tut sikrau, kolla djan tuha! Un hakenes, hoi tuke penau, te djal lo gar tuha, kowa djal gar tuha!”

⁵Kote anas o Gideon i lurden tele pash o pani. Un o baro Dewel penas ap o Gideon: “Hakeno, kai pijell o pani peskri tchipjah har i djuklo, koles tchip ap jek rig! Un kolen, kai ap pengre tchanga djan, te pijenn le, tchip ap i wawar rig!”

⁶Un kolla, kai pijan pengri tchipjah har i djuklo, his 300 (triin-sheel) mursha. Un kol wawar djan tele ap pengre tchanga un anan o pani pengre wastentsa pash o mui.

⁷Un o baro Dewel penas ap o Gideon: “Kol triin-shelentsa, kai o pani pengre tchipjentsa pijan, kamau me i Midianarja an tiro wast te dell, un o Israel dran lengre wasta win te lell. Kol wawar lurden muk khere te djal!”

⁸Un jon lan kolendar, kai khere djan, lengro chapen un pipen un lengre phurdepangre[17] pash pende. Un jaake bitchras o Gideon i tsele lurden pale pale pash pengre plachtene khera. Kokres kol triin-sheel rikras lo pash peste. Un kol tsele lurde dran o them Midian his tella glan leste an o telstuno them.

⁹Un an koi rat penas o baro Dewel ap o Gideon: “Ste pre, un dja tele kote, kai i Midianarja tchiddo hi! Me dom len an tiro wast.

¹⁰Un te dareh tu tele te djal, palle le tiro budepaskres, o Pura, peha, te djal lo tuha tele.

¹¹Un kote shuneh tu, hoi jon rakrenn. Un te shunal tu kowa, palle wenn tire wasta soreles, jaake te nai djah tu tire lurdentsa tele, te kurenn le pen lentsa.” Un o Gideon un leskro budepaskro, o Pura, djan tele kote, kai kol lurde hi, kai jak denn.

¹²Un i Midianarja un i Amalekarja un lauter, kai wan kotar, kai o kham pre djal, his kote tchiddo an o telstuno them un tchakran o them har i stepangre[18]. Jaake bud his le. Un lengre khamele his jaake bud, te djinas kek, har bud jon hi. Kolla his jaake bud har i santa pash o baro pani.

¹³Un har o Gideon koi tele was, penas jek mursh peskro maleske peskri suni. Un job penas: “Shun, man his i suni: I maro dran djob peras i berga tele pash i platsa, kai i Midianarja hi. Un o maro was pash o plachteno kheer, un das les trujel, jaake te peras lo khetne. Un o pralstuno kotar was tella, un o telstuno kotar was pral.”

¹⁴Un leskro maal penas: “Kawa hi tchi wawar har o charo o Gideonestar, koleskro dad o Israelitari Joash hi. Koles das o Dewel i tsele Midianarja pengre tsele lurdentsa an leskro wast.”

¹⁵Un har shunas o Gideon koi suni un kowa, hoi kamas kai suni te penell, kote tchiwas lo pes ap i tchanga glan o Debleste un sharas les. Un djas pale pash i platsa, kai i Israelengre lurde hi, un penas: “Hadenn tumen! O baro Dewel das i Midianarja un lauter, kai pash lende hi, an tumaro wast.”

¹⁶Un dran kol triin shelendar tchiwas job triin kope sheel murshen khetne. Un hakenes das lo i phurdepaskri un i khoro. Un an ko khoro his i kasht, hoi chatchell.

¹⁷Un job penas ap lende: “Dikenn ap mande un krenn jaake, har me krau! Kanna djau pash i lurdengri platsa. Denn jak, hoi kote krau! Un krenn mange lauter palla!

¹⁸Tchiwenn tumen trul i tseli platsa! Un te phurdau me an i phurdepaskri, me un kolla, kai pash mande hi, palle phurdenn tumer ninna an tumare phurdepangre, un denn gole: ‘Kuras men o baro Debleske un o Gideoneske!’”

¹⁹Un o Gideon un kol sheel mursha, kai leha djan, wan pash koi platsa mashkral an i rat. Un o Gideon un kol mursha trul leste phurdan an i phurdepangre, un dan kol khore paash, hoi an lengre wasta hi.

²⁰Kanna phurdan kol triin-sheel lurde an pengre phurdepangre, un dan pengre khore paash. Un jon rikran pengro serwo wasteha o kasht, hoi chatchell, un pengro tchatcho wasteha pengri phurdepaskri, te phurdenn le dren, un dan gole: “Kuras men o baro Debleske un o Gideoneske!”

²¹Un jon atchan kote tardo, kai le his, trul koi tseli platsa trujel. Un kol tsele Midiantikre lurde nashan har diwjes ap koi platsa trujel, dan bari gole un kaman te nashenn penge.

²²Un har kol triin sheel mursha an pengre phurdepangre phurdan, kras o baro Dewel, te kuras pes ap i platsa hakeno hakeneha. Un jon lauter nashan bis pash o foro Bet-Shitta ap o drom pash o foro Zereda, un ninna bis pash o foro Abel-Mehola pash o foro Tabbat.

²³Un i mursha an o them Israel wan khetne gole dino: dran o kheer Naftali, dran o kheer Asser, un dran o tselo kheer Manasse. Un jon lan i Midianarja palla.

²⁴Un o Gideon bitchras murshen an i berge Efrajim, un mukas kote te penell: “Awenn tele, un tchiwenn tumen i murshenge dran Midian an o drom! Denn jak ap i panjengre platse bis pash o foro Bet-Bara un ninna ap o pani Jordan, te nashenn le penge gar koi wergel!” Koi wan i tsele mursha dran Efrajim khetne kharedo. Un jon kran jaake har o Gideon penas.

²⁵Un jon tapran dui murshen, kai pralstune his pral i Midianarja. Lengre laba his Oreb[19] un Seeb[20]. Un jon dan o Oreb temerl pash i baro bar. Kowa was pal leste kharedo: bar Oreb. Un o Seebes dan le temerl pash i moljakro stakepaskro[21]. Koles dan le o lab Seeb. Un jon lan i Midianarja palla. Un i shere kol dujendar, o Oreb un o Seeb, anan le pash o Gideon wergel o pani Jordan.