Read O Debleskro Drom - I Bibla an o Romano Rakepen 2021 Debleskro tsiro 13 Bible Online

Debleskro tsiro 13 - O Debleskro Drom - I Bibla an o Romano Rakepen 2021 bible

Debleskro tsiro 13

¹Un me dikom dran o baro pani i vieches pre te well. Koles his deesh shinga[55] un efta shere. Un ap haki shing hidjras lo i shereskro sonakai[56]. Un ap leskre shere his sawe laba tchinlo, hoi praassenn o Debles.

²Un ko viecho, hoi me dikom, his har i bari diwji margodja[57]. Leskre herja his baro un sorelo. Un an leskro mui his bare danda. Un ko baro lolo sap das les peskri soor un peskro beshepaskro, te was ko viecho i baro rai, koles bud penepaske hi.

³Un jek leskre sherendar his, har te wals lo maredo. Un les hi i baro tchinepen. Un ko tchinepen was sasto. Un i tsele menshe ap i phub kran bare jaka un djan ko viecheske palla.

⁴I menshe djinan, kowa his o baro lolo sap, hoi das o viecheste peskri soor. Doleske sharan le o lolo sapes. Un jon sharan ninna o vieches, un penan: “Kek hi sorleder har o viecho! Kek nai kurell pes leha un well sorleder!”

⁵Un o viecho rakras un phurdas pes pre un praassas o Debles. Star-deesh-te-dui (42) tchonna nai kras o viecho kowa.[58]

⁶Un job praassas o Debles, un rakras djungeles pral leskro lab un leskro kheer. Ninna kolen, kai an o bolepen djiwenna, praassas lo.

⁷Un o Dewel mukas o vieches te kurell lo pes o Debleskre menshentsa, un mukas, te well lo sorleder har jon. Un kol vieches was i soor pral i menshende dran hake themma, haki natsjona, haki harmenatsjona un hako rakepen.

⁸Lauter, hoi ap i phub djiwenna, sharenn ko vieches, — lauter kolla, kolengre laba gar tchinlo hi an o djipaskro liil. Kolla, kai lengre laba dren tchinlo hi an kau liil, hi jaake rah dren tchinlo, har i phub koi hi. Kau liil hi o terno bakres, hoi maredo was.

⁹Tumer lauter, shunenn mishto, hoi tumenge penau!

¹⁰Koon stildo hunte well, kowa well stildo. Koon o chareha maredo hunte well, kowa well o chareha maredo. Doleske hunte wenn o Debleskre menshe soreles tardo an o patsepen, te denn le gar pre.

¹¹Un me dikom i wawar vieches dran i phub pre te well. Un les his dui shinga har i terno bakro. Un job rakras har o baro lolo sap.

¹²Les hi i tseli soor, hoi ninna ko vieches hi, hoi dran o baro pani was. Un ko duito viecho kras, te sharenn i tsele menshe ap i phub ko vieches, hoi dran o baro pani was, koles ko baro tchinepen his, un pale sasto was. Un ko viecho, hoi dran o baro pani was, kowa dikas lauter, hoi ko duito viecho kras,

¹³un das koles i soor, te krell job baro koowa, jaake baro, te mukas lo ninna i jag dran o bolepen glan i menshende tele te perell. Un kowa kras lo, te anell lo i menshen ap i phub ap o bengeskro drom. Job penas lenge, te krenn le penge i vieches, hoi wi-dikella har ko viecho, kai les his o tchinepen o charestar, un dran kowa meras, un pale djido was.

¹⁵Un ko duito viecho las i soor, te krell lo ko vieches djido, hoi i menshe penge kran, jaake te nai rakrell kowa ninna, un te nai krell job, te wenn lauter maredo, kai les gar an-mangenna.

¹⁶Un i tsele menshe hi an o wast ko viechestar: I bare har i tikne, i brawele har i tchorwele, i raja un i budepangre. Kolla lauter hunte krenn i sikepen ap pende. Hi sawe, kai hunte tchinenn les ap pengro tchatcho wast. Wawar hunte tchinenn les glan ap pengro shero.

¹⁷Ko sikepen nai well o viecheskro lab, ninna leskri numra. Koles, kai ko lab gar ap peste hi, witar gar leskri numra, kowa nashte ginell tchi, un nashte bikrell tchi.

¹⁸Kate hunte well men goswepen. Koon gosewo hi, kowa nai hatsell ko lab win. Ko lab hi i mensheskro lab. Leskri numra hi triin shoba (666).