Read O Debleskro Drom - I Bibla an o Romano Rakepen 2021 Debleskro tsiro 17 Bible Online

Debleskro tsiro 17 - O Debleskro Drom - I Bibla an o Romano Rakepen 2021 bible

Debleskro tsiro 17

¹Un jek kol efta bolepangrendar, kai hi len kol efta tchare an i wasta, kowa was pash mande, un penas: “Ab kai! Me kamau tut i phagi te sikrell, hoi ko foro lella, hoi pash bud panja tchiddo hi. Ko foro hi har i djuwel, kai kras wi-ladjedo koowa.

²I bare raja ap kai phub tchiwan pen lah khetne. Ko wi-ladjedo koowa, hoi koi djuwel kras, hi har i mool, hoi pijan kolla, kai ap i phub djiwenna, un latar mato wan.”

³Un o Debleskro Ducho was pral mande. Un o bolepaskro anas man an o mulo them. Un me dikom i djuwel ap i lolo viecho beshdo, hoi les efta shere un deesh shinga[67] his. Un ap koleste his sawe laba tchinlo, hoi praassenn o Debles.

⁴Un koi djuwel his rido an i kutch lolo ripen. Un ap late hi sonakai un kutch barra un mirklia[68]. Un lat his i sonakaskro khoro an lakro wast, pherdo djungelo koowa un sawo koowa, hoi hi pale-tchiddo glan o Debleste. Kau koowa was dran lakro wi-ladjedo djipen.

⁵Un ap lakro shero his i lab tchinlo, hoi i menshe gar haiwan: “Koi bari Babilon, kolatar wella hako djunglepen un wi-ladjedo koowa ap i phub.”

⁶Un me dikom, kai koi djuwel mato his o ratestar, hoi nashas, har o Debleskre menshe maredo wan, kolla, kai patsan ap o Jesuseste un dan pengro patsepen gar pre. Un me nashte patsom gar, hoi dikom.

⁷Un ko bolepaskro penas ap mande: “Hoske patseh tu gar, hoi dikeh? Me kamau tuke te penell, koon koi djuwel hi, un koon ko viecho hi, hoi lat hidjrella, un koles kol efta shere un kol deesh shinga hi.

⁸Ko viecho his djido, un djiwell kanna buder gar, un well dran o telstunepen pale pre. Un palle djal lo hako tsireske nashedo. I tsele menshe krenn bare jaka, te dikenn le, te well ko viecho pale, hoi djido his, un kanna buder gar djiwella. Jon hi kolla, kolengre laba gar dren tchinlo wan an o djipaskro liil, har i phub gomme gar koi his.

⁹Kanna hunte well men goswepen, te haiwas kowa: I efta shere ko viechestar hi efta berge, ap kolende koi djuwel beshdo hi. Kal shere hi ninna efta bare raja:

¹⁰Pantch kolendar meran, ko jek hi koi, un ko wawar was gomme gar. Un te well lo, hunte atchell lo i tikno tsiro.

¹¹Ko viecho, hoi djido his, un kanna buder gar djiwella, job hi o ochtato. Ninna hi lo jek kol eftendar, un djal hako tsireske nashedo.

¹²Un kol deesh shinga, hoi dikal, hi deesh bare raja. Kolen hi kanna gomme kek penepaske pral i menshende. Well i diwes, kai well len i soor, te wenn le bare raja pral i menshende khetne o viecheha i tikno tsireske.

¹³Kolla rikrenn khetne, te denn le pengri soor ko vieches, te well koles bud penepaske.

¹⁴Un jon kurenn pen ko terno bakreha. Un o terno bakro hi sorleder har jon. Job hi o rai pral i tsele rajende, un o pralstuno pral i tsele pralstunende. Un pash leste hi kolla, kolen job gole das un win rodas, kolla, kai ap leste patsenna.”

¹⁵Un o bolepaskro penas ap mande: “Tu dikal, kai beshell koi djuwel, hoi wi-ladjedo koowa krell, pash bud panja. Kol panja hi menshe dran haki harmenatsjona, dran hako them, haki natsjona, un hako rakepen.

¹⁶Un kol deesh shinga, hoi dikal, khetne o viecheha wenn le chojedo ap koi djuwel, un lenn lake lauter krik, hoi lat hi, jaake te hi li nango. Un jon chan lakro mass un chatchrenn lat pre.

¹⁷Kowa das len o Dewel an lengre djia, te krenn jon, hoi job kamella. Doleske rikrenn le lauter khetne, un denn pengri soor ko viecheste. Kowa djala lauter jaake rah, bis te was lauter jaake, har o Dewel penas.

¹⁸Un koi djuwel, hoi tu dikal, kaja hi ko baro foro, hoi hi les penepaske pral i bare rajende ap kai phub.”