Read O Debleskro Drom - I Bibla an o Romano Rakepen 2021 Debleskro tsiro 21 Bible Online

Debleskro tsiro 21 - O Debleskro Drom - I Bibla an o Romano Rakepen 2021 bible

Debleskro tsiro 21

¹Un me dikom i newo bolepen un i newi phub. O phuro bolepen un i phuri phub his buder gar koi. Un o baro pani his buder gar koi.

²Un me dikom o Debleskro foro, o newo Jerusalem, har was ko foro tele o Deblestar dran o bolepen. O foro his shukar kerdo har i terni tchai, kai romedinerell un shukar kerdo was peskro romeske.

³Un me shunom i sorelo rakepen. Kowa was kotar, kai o Debleskro beshepaskro tardo hi, un kowa penas: “Dikenn, o Debleskro kheer hi pash i menshende! Job djiwell pash lende. Un jon hi leskre menshe. Un o Dewel hi lengro Dewel kokres, un hi pash lende.”

⁴Un job khossella hake swa[74] ap lengre jaka tele. Un o merepen dell gar buder, witar kek bibacht, kek ropen un kek duka. Kowa hoi his, dell gar buder.

⁵Un kowa, kai ap o Debleskro beshepaskro beshdo hi, penas: “Dikenn, me krau lauter newes.” Un ap mande penas lo: “Tchin kal laba an i liil! Kal laba hi tchatcho. Un jaake well lauter.”

⁶Un job penas pale: Halauter was jaake, har penom. Mandar was halauter. Un lauter wella pale glan mande. Me hom o glanstuno un o palstuno. Kones trush hi, kowa lell mandar o djido pani tchitcheske.

⁷Kowa, kai soreles an o patsepen atchas, un gar pre das, kowa lell kau shukar koowa mandar. Me wau leskro Dewel. Un job well miro tchawo.

⁸Kol wawar djan an i bari jag, hoi soreles chatchella un khandella. Kote merenn le o duito kopo. Jon hi kolla, kai i darjatar gar mantsa djan, kolla, kai phukran ap pengro patsepen, kolla, kai djungelo koowa kran, kolla, kai maran wawaren, kolla, kai lubran pen trujel, kolla, kai bengeskro koowa kran, kolla, kai mangan wawar koowa an har o Debles, un i tsele chochene.

⁹Un pash mande was jek kol efta bolepangrendar, kai tchoran kol efta tchare win, te was efta kope i bari phagi pral i phub. Pal kowa was kek wawar phagi pral i phub. Ko bolepaskro was pash mande, un rakras mantsa, un penas: “Ab kai! Me sikrau tute koi tchat, kai rodas peske o terno bakro win, te romedinerell lo lat.”

¹⁰Un o Debleskro Ducho was ap mande. Un o bolepaskro anas man ap i bari, bari berga, un sikras mande o Debleskro foro Jerusalem, har ko foro tele was o Deblestar dran o bolepen.

¹¹Ko fores hi o Debleskro railepen, un hi jaake shukar, har ko kutch bar, hoi Jaspis kharella, jaake djudjo har djudji wali.

¹²Trul o foro hi i bari massuri[75]. An koi massuri hi deesh-te-dui bare wudja, ap kolende denn deesh-te-dui bolepangre jak. Un ap kol bare wudja hi i laba tchinlo kol deesh-te-dui Israeleskre tchawendar.

¹³An i massuri hi ap haki rig triin bare wudja: Kote, kai o kham pre djala hi triin wudja, un kote, kai hi o kham shila, hi triin wudja, un kote, kai hi o kham tato hi, triin wudja, un kote, kai o kham tele djala, triin wudja.

¹⁴Un koi massuri hi tardo ap deesh-te-dui sorele barra. Ap kolende hi i laba tchinlo kol deesh-te-dujendar, kai his o terno bakreskre bitchepangre.

¹⁵Un ko bolepaskro, kai mantsa rakras, koles his i sonakaskro kasht an leskro wast, te ginell lo tele[76], har baro o foro hi, un har baro lengre wudja hi, un har baro koi massuri hi, hoi djal trul o foro.

¹⁶O fores hi star rigja. Jek rig hi jaake baro har i wawar. Un o bolepaskro las ko sonakaskro kasht un dikas pal, har baro ko foro hi: Haki rig hi dui-serja-te-star-sheel (2.400) kilometarja baro. O lengstepen, o buchlepen un o pralstunepen hi lauter jek barepen.

¹⁷Un job tchiwas peskro kasht ap i massuri, hoi djal trul o foro, te dikell lo, har dur koja pral djala. Koja djal jek-sheel-te-star-deesh-te-star (144) mussja pral. Jek mussi baro pash leste hi emligo har jek mussi baro pash i menshende.

¹⁸Un i barra an koi massuri, hoi djal trul o foro, hi kutch barra, hoi kharenna Jaspis. Un o foro hi dran o latcho sonakai, djudjo har i wali.

¹⁹Un kol deesh-te-dui telstune sorele barra an koi massuri hi shukar un kutch barra. O glanstuno bar hi i Jaspis, un o duito bar hi i Safiro, o triinto hi i Kalzedon, un o starto hi i Smaragdo.

²⁰Un o pantchto hi i Sardonix, un o shobto hi i Karneol, un o eftato hi i Krisolit, un o ochtato hi i Berill, un o enjato hi i Topas, un o deshto hi i Krisopras, un o deesh-te-jekto hi i Hiazint, un o deesh-te-duito hi i Ametist.

²¹Un kol deesh-te-dui bare wudja hi deesh-te-dui mirklia[77] hako baro wudar hi jek mirkli. Un kol dromma an ko foro his dran o latcho sonakai, djudjo har wali.

²²Un me dikom kek Debleskro kheer an ko foro, kai mangenn le o Debles an. O baro Dewel kokres, kai hi o rai pral halauter, hi mashkral lende, job un o terno bakro.

²³Pral o foro hi buder kek kham un kek tchon. O Debleskro railepen hi har o kham, un o terno bakro hi i momeli o foreske.

²⁴Un i menshe an wawar themma dikenn koi momeli un wenna pash leste. Un i bare raja ap i phub anenn pengro brawlepen an ko foro.

²⁵Un o foreskre bare wudja atchenn hako tsiro pre, un wenn buder gar pandlo. Della kek rati buder.

²⁶Un i menshe dran i wawar themma anenn pengro kutch un shukar koowa un pengro brawlepen an ko foro.

²⁷Un tchi well kote dren, hoi an o Debleskre jaka pale-tchiddo hi, witar kek mensho, kai djungelo koowa krella un chochella. Kolla wenna an ko foro dren, kolengre laba an o terno bakreskro liil dren tchinlo hi. Kote hi kolla dren tchinlo, kai lenna o djipen, hoi gar pre-herella.